Frank Vandenbroucke (coureur)

Frank Vandenbroucke

VDB op 't Dernycriterium in Antwerpn (08/08/2007)
Persoonlikke informoatie
Noame	Frank Vandenbroucke
Bynoame	VDB, Bimbo (d'oro), Franky boy
Gebortedoatum	6 november 1974
Geborteplekke	Moeskroen, Belgie
Lengte	179 cm
Gewichte	68 kg
Specialisoatie	rouleur en klimmer; nôordelikke klassiekers, klindere roundes
Ploegen
Ploeg van nu	Down Under-Cinelli
Ploegen van toun
2008 2006-2007 2006 2004-2005 2004 2003 2002 2001 1999-2000 1998 1995-1997 1994	Mitsubishi-Jartazi Acqua & Sapone Unibet.com MrBookmaker.com-SportsTech Fassa Bortolo Quick·Step-Davitamon Domo-Farm Frites Lampre-Daikin Cofidis Mapei-Bricobi Mapei-GB Lotto-Caloi
Portoal Sport

Frank Vandenbroucke (Moeschroen, 6 november 1974) is e Belgschen coureur. E wos e grôte belofte die ol in 1999 op zyn oogtepunt wos. Doarachter kwam 'n surtout op e kwoalikke maniere in 't nieuws.

Leevn & carrière

Jeugd

Frank Vandenbroucke groeide op in Ploegsteirt. Zyn voader, Jean-Jacques, wos e tydege coureur. Zyn moeder Chantal doet e café oopn, Hostellerie de la Place, in 't centrum van Ploegsteirt. Frank Vandenbroucke dei e masse sportn geirn: azo speelnde voetbol, en e dei an atletik. In de cross komt 'n zelfs kampioen van Belgie by de pupilln. Uutendelik kiest 'n vo de villo. In 1989 krygt Vandenbroucke e licensje by de nieuweliengn. Van nu of start zyn koerscarrière.

Succesjoarn

In 1991 komt Vandenbroucke kampioen van Belgie by de nieuweliengn. E wos zo goed dat 'n ier en doar e joar van zyn reekse oversloeg. In 1993 kwam Vandenbroucke prof by Lotto, woa da zyn nounkel Jean-Luc sportdirecteur wos. E têeknde e contract van 2 joar, moar en et dat ni uutedoan. D'r kwam e proces van, moar uutendelik koste Vandenbroucke toch vroeger overstappn na Mapei-GB. E ploeg woa da 'n de medische en professionele begeleiding krêeg da 'n zo geirn wilde. Olleman zei da VDB de grotste belofte van Belgie wos. In 1995 wint VDB Parys-Brussel, zyn êestn grôotn koers by de profs. In 1999 goat 'n over na Cofidis. E wint in 't begun van 't sezoen 'n Omloop Het Volk. En is twiddn in de Rounde van Vloandern, zevensn in Parys-Roubaix en e wint Luuk-Bastenoakn-Luuk woa dat 'n attakeert op de plekke dat 'n anekondigd adde. Tusschenin komt 'n in de probleem. Cofidis zet nem een endetje buutn omda 'n in verband is ebrocht mi dopieng. VDB is vry esprookn, moar e krygt e krak. Op 't ende van 't sezoen doet 'n, zounder vele ambisje, mei an de Rounde van Spanje. In de latste weekn demonstreert 'n zyn grôte klasse: e wint 2 rittn en e pakt 't puntnklassement.

Mindere joarn & comebacks

Toet 1999, zyn absoluut topjoar, at 'n 't êne succes achter 't ander, mo in dazeste joar wost 'n verdacht van dopienggebruuk. 't Feit dat 'n e goe reloasje adde mi Bernard Sainz, e dokteur die op een 'ongeweune' maniere sporters begeleidt, dei zyn zoake ouk gin goed. Sedertien ging 't bergof mi VDB; e kwam zelfs depressief.

Begun 2002 voengn ze by een uuszoekieng doping by Vandenbroucke. Doarom wos 'n eschorst. 't Parket van Dendermonde wilde nem ouk strafrechtelik vervolgn. VDB's advocoatn argumenteernde dat etwien gin twi keirs kut estraft zyn vo dezelfste feitn. Vandenbroucke krygt toch e werkstraffe van 200 eurn. E goat in beroep, moa ton kryg 't e boete van 250.000€. Vandenbroucke goat in cassoasje en 't arrest is verbrookn. Begun 2007 is Vandenbroucke vryesprookn deur 't Of van Beroep in Brussel, moa 't parket-generoal têeknt op zyn tour beroep an teegn de vrysproake.

Vandenbroucke krêeg nu en ton nog e sportivve eroplevieng. In 2003 ist 'n twiddn in de Rounde van Vloandern, moa doarachter kwamn d'r ni vele topprestoasjes ne mi. Ouk in zyn privé-leevn foutert 't ni. Op 26 juli 2004 krygt 'n ruuzje me zyn vrouwe, Sarah Pinacci, en e probeert nem van kant te moakn.

Op 7 juni 2007 rochte bekend da Vandenbroucke, de dag dervôorn, were e zelfmôordpogieng oundernoomn adde. Op 24 juni 2007 krygt 'n were een inzienkieng, en zyn ouders loatn nem opneemn in 't Eilig Erte in Yper. Doarachter begoste VDB an zyn zoveelsn comeback. Anno 2008 rydt 'n nog ossan, moa e stapt mêer of, of dat 'n koersn uutrydt. In 2008 rêed 'n tout 17 april 2008 vo Mitsubishi-Jartazi, moar op dien dag makte de ploeg bekend da ze (vôorlopig) uut makoar giengn. Begun april 2008 rocht ouk bekend da VDB in 't begun van 't joar coacaïne ekocht adde. Doavôorn goat 'n verzekers gin sportieve straffe krygn omdat 'n gin drugs gebruukt adde vo koersn.

2009

In 't najoar van 2008 makt VDB bekend dat 'n by Cinelli-OPD goa ryen - de ploeg woavôorn da Nico Mattan 'n nieuwn sportdirecteur goa zyn. Mattan en Vandenbroucke zyn ossan styve goe moatn ewist. Achter dat uutkomt da Cinelli gin licensje krygt vo de mêeste vôorjoarskoersen, zorgt Mattan d'r vôorn da VDB ku koersen by Fuga-Down Under, e Belgschn-Oostroalischn ploeg. De ploeg noemt nu: Down Under-Cinelli. Met diejn ploeg rêed VDB vôorjoarsklassiekers in Vloandern lik de Driedoagsche van West-Vloanderen, Nokere Koerse en Dweirs deur Vloandern. In de zomer van 2009 protesteert VDB teegn zyn ploeg: in e poar klinder koersn doetn e anoniemn tenue an, zounder sponsors. D'ofsproake was dat 'n gounk betoald zyn lik e prof van 't moment da Cinelli geld gink en, moar achter e poar moandn adde VDB nog gin frang ezien.

Grotste overwinniengn (profs)

1994 (2 overwinniengn)

• 6e etappe van de Rounde van de Middellansche Zêe

1995 (7 overwinniengn)

• Parys-Brussel
• 1ste etappe van de Rounde va Luxemburg

1996 (15 overwinniengn)

• 5de etappe van de Rounde van de Middellansche Zêe
• proloog, 3e, 6e en 8e etappe van de Rounde van Ôostenryk
• Trofeo Laigueglia
• Grôte Prys van Plouay
• Scheldeprys
• proloog, 2de en 5de etappe van de Rounde van het Woalsche Gewest

1997 (8 overwinniengn)

• 3de etappe van de Rounde van Luxemburg
• Trofeo Matteotti
• 2de, 4de en 8ste etappe van de Rounde van Ôostnryk

1998 (13 overwinniengn)

• Gent-Wevelgem
• 1ste en 5de etappe en eindklassement Parys-Nice
• 3de en 6de etappe van de Rounde van het Woalsche Gewest

1999 (8 overwinniengn)

• 3de etappe-b in de Driedoagsche van De Panne
• 16e en 19e etappe van de Rounde van Spanje
• Puntnklassement in de Rounde van Spanje
• Luuk-Bastenoakn-Luuk
• Omloop Het Volk
• GP La Marseillaise
• 4de etappe van de Ruta del Sol
• 7de etappe van Paris-Nice
• 3de etappe van de Driedoagse van De Panne

2000

• ploegntydrit in de Ster van Bessèges

2004

• Zwevegem

2005

• Zwevegem

2009

• 2e etappe Boucle de l'Artois
• Dernycriterium Woaregem

Boekn

Ik ben god niet (2008), ottobiografie, Borgerhoff & Lamberigts, ISBN: 978-9077941300

Externe koppelienge

• Zyn website