Karel van Provence

Karel van Provence (of Karel den Joungn), (845 - 24 januoari 863) was de joungste zeune van keizer Lotharius I en Irmingard van Tours. Je was keunink van de Provence van 855 tout an zyn vroegn dôod in 863.

Zyn voader Lotarius I verdêelde zyn Middnryk in 855, nie lange vo zyn dôod, by 't Verdrag van Prüm:

• Lodewyk II, den oudstn, krêeg Nôord-Italië met de keizerskrône
• Lotharius II krêeg et nôordelik dêel van ’t middnstik. Zyn ryk wierd regnum Hlotharii genoemd.
• Karel krêeg et zudelik dêel van ’t middnstik. Zyn keuninkryk wierd regnum provinciae genoemd.

Achter ‘t Verdrag van Verdun in 843 was ’t nôordwestelik stik van Bourgondië by West-Francië gekommn en de reste by ‘t Middnryk. Karels ryk bestound uut ’t zudelik stik van Bourgondië me Provence, Lyon en Vienne.

Karel was nog mo tien joar oud os zyn voader stierf. Groaf Gerard de Roussillon was zyn regent en Karel et eigentlik nôoit zelve geregeerd.

In 860 probeerde zyn nounkel, Karel den Kletsn, zyn gebiedn te verovern, mo dat is nie gelukt.

Karel van Provence stierf in 863 zounder jounges. Zyn bezittiengn wierdn verdêeld ounder zyn twi broers.

• Lotharius krêeg zyn nôordelik stik derby me ‘t bisdom van Lyon, Vienne en Grenoble.
• Keizer Lodewyk II krêeg ’t zudelik stik, Provence met Arles, Aix en Embrun en je kwam azo ook keunink van Provence.

Karels keuninkryk in 't roze achter de verdêlienge by 't Verdrag van Prüm

Bourgondië tusschn 534 en 843, me de grenze in 't oranje tusschn 't nôordwestelik stik by West-Francië en de reste by Middn-Francië, achter 't Verdrag van Verdun