Margaretha van Male

Margaretha van Male

1350-1405
Hertoginne van Bourgondië (huwelik me Filips van Rouvres) Hertoginne van Bourgondië (huwelik me Filips den Stoutn)
Periode 1357-1361 1369-1404 Vôorganger Johanna III van Bourgondië Ipvolger Margaretha van Beiern-Straubing
Groaf van Vloandern Groaf van Artesië Groaf van Franche-Comté
Periode 1384-1405 Vôorganger Lodewyk van Male Ipvolger Jan zounder Vrees
Groaf van Nevers
Periode 1384 Vôorganger Lodewyk van Male Ipvolger Filips II van Nevers
Groaf van Rethel
Periode 1384-1393 Vôorganger Lodewyk van Male Ipvolger Antoon van Bourgondië
Voader Lodewyk van Male Moeder Margaretha van Broabant

Margaretha van Male (Male (by Brugge), 13 april 1350 - Atrecht, 16 of 21 moarte 1405), was gravinne van Vloandern, Artesië, Franche-Comté, Nevers en Rethel, en twè kêers hertoginne van Bourgondië. Met heur êeste vint, Filips van Rouvres, van 1357 tout 1361 en met heur twidde vint, Filips den Stoutn, van 1369 tout 1404.

Deur heur huwelik mè Filips den Stoutn was ze de stammoeder van d’hertogelikke Valois-dynastie van Bourgondië.

Heur leevn

Margaretha van Male was d’ênigste dochter en erfgenoame van Lodewyk van Male. Heur moeder, Margaretha van Broabant, was de twidde dochter van Jan III, hertog van Broabant, Lothier en Limburg.

In 1357, an heur zeevn joar, wierd ze uutg’huwelikt an Filips van Rouvres, die ton elf joar oud was. Je was hertog van Bourgondië en groaf van Artesië en Franche-Comté, mo je stierf ip 21 november 1361.

’t Hertogdom Bourgondië gienk no keunink Jan II van Frankryk, die ’t twi joar loater gaf an z’n joungste zeune Filips den Stoutn. In 1369 trouwde Margaretha met hem en kreeg z’heur vroeger hertogdom were.

O Margaretha 's voader stierf in 1384 erfdn zy en heur vint de groafschappn Vloandern, Nevers, Rethel, Artesië en Franche-Comté.

D’erfregelienge an heur moeders kant

Heur moeders voader Jan III van Broabant stierf in 1355. Zyn oudste dochter Johanna van Broabant (de tante van Margaretha van Male) erfde zyn hertogdommn, omda zyn twi zeuns ol dôod woarn. Mo die erfregelienge wierd betwist deur heur schonbroers Lodewyk van Male en Reinoud III van Gelre. Die familieruuzje leidde tout de Broabantsche Successieoorloge.

In 1383 stierf Johanna ’s vint Wenceslaus I van Luxemburg. Achter zyn dôod begost ze mêer en mêer partye te kiezn vor heur neve Filips den Stouten, die in 1390 zyn vrouwe Margaretha van Male (dochter van Johanna ’s joungere zuster) ols erfgenoam liet erkenn, en in 1404 wierd under twidde zeune Antoon anveird ols ruwoard. Achter Johanna ‘s dôod in 1406 erfde Antoon ’t hertogdom Broabant, Lothier en Limburg.

Under jounges

Z’han acht jounges:

• Jan (1371-1419)
• Karel (1372-1373)
• Margaretha van Bourgondië (1374-1441), trouwde mè Willem II van Beiern (groaf van Henegouwn-Holland-Zêeland), d’ouders van Jacoba van Beiern
• Katharina (1378-1425), getrouwd in 1393 mè Leopold IV van Habsburg.
• Bonne (1379-1399)
• Maria (1380-1428), getrouwd in 1401 mè Amadeus VIII van Savoye
• Antoon (1384-1415)
• Filips (1385-1415)

Den oudstn, Jan zounder Vrees, volgde Margaretha ip in 1405 ols hertog van Bourgondië en groaf van Vloandern, Artesië en Franche-Comté.

Antoon erfde in 1393 Rethel en in 1406 Brabant, Lothier, en Limburg.

Nevers gienk no de joungstn, Filips van Nevers.

Filips den Stoutn stierf in 1404, en Margaretha van Male ‘t joar d’r ip.