Tony Parker

Tony Parker

William Anthony (Tony) Parker jr (Brugge, 17 meie 1982) is een basketspeler die in den NBA vo de San Antonio Spurs speelt. J’ is ook de kapiting van de Fransche nationale basketploeg.

Z’n voader, den Amerikoan Tony Parker sr, was ook een basketter en je speeldege in ‘t begun van de joaren 80 by de West-Vlamsche basketploeg “Avanti Brugge”. Azo komt et da Tony jr in Brugge geboorn is. Z'n moeder is een Ollandsche. Loater zyn ze vertrokkn noa Frankryk en azo et Tony Parker de Fransche nationaliteit. J’ è nog twêe broers die ook basket speeln.

Carrière

Vo dat ‘n vertrok noa den NBA, was Parker twêe joar actief in de Fransche basketliga (van 1999 tout 2001) vo Paris Basket Racing. Parker speeldege ip 30 november 2001 z’n êeste match met de San Antonio Spurs. Je was ton de twêede Fransche speler ooit in den NBA. Parker is ook de joungste speler die ooit by de Spurs terechtekwam. Je was nog moa 19 joar oud.

Parker ielp z’n ploeg an de overwinninge in den NBA-finale van 2003 teegn de New Jersey Nets. De Spurs wonn de titel were in de finale van 2005 teegn de Detroit Pistons en in 2007 teegn de Cleveland Cavaliers. Parker is verkoozn tout MVP in de play-offs van da joar.

Varia

• Tony Parker is ip 7 juli 2007 getrouwd met Desperate Housewives-actrice Eva Longoria.
• Tony Parker is een fan van hiphopmuziek en rap. J’ èt een Fransche hip-hop-album uutgebrocht me producer Polygrafic (Sound Scientists). Den êeste single "Top of the Game" kwam uut in moarte 2007.
• Parker is de best betoalde Fransche sportman ooit. Je komt dus vo voetboller Zinedine Zidane.