Velokoerse

Bels kampioenschap op de weg 2006

Vélokoerse of kortweg koerse ès een sport. De bedoelinge ès om met ne vélo zo rap meuhlik van start tot finish te geroaken. Tès nen echten ploehsport. Nen ploeh bestoat typisch uit 1 of eventueel 2 kopmann'n, en mièrdere helpers, en weirdt heleid deur nen sportdirecteur. Oloewel professioneel wielerploehen uit soms 30 coureurs bestoan, magt der an iedere koerse toh moar nen ploeh van 8 tot 10 coureurs startn.

Sôortn wielrenn'n

Oloewel het vélokoerse ip de weeh, die ier beskreevn weirdt, het mièst hekend es, zin der wok nog andere disciplines:

• koerse ip de piste: coureurs droaien ip een heslootn circuit zo rap meuglik rondjes.
• cyclo-cross: wielerkoerse, moa ton in het veld (mo wok in't zand of deur't bos).
• Mountenbiken: nen extremeren vorm van veldrien, zo moetn der bvb wok over rotsen hereedn wordn.

Olle disciplines zin Olympisch, utgenoomn cyclo-cross.

Koerse ip de weeh

De discipline met de mièste internationoale utstroalinge es de koerse ip de weeh. Het wielersezoen start in januari, en endiht in november. Der zin twiè sôorten koersen:

Ièndahswedstriden

Ièndahswedstriden zin, zoals de noame ol suhhereerd, wedstriden die over iène dah hereedn wordn. Der zin veel ièndahswedstrid'n, inhedèld in catehorieen volhens hun belang. De belangrikste wedstriden zin sedert 2005 hehroepeerd in de UCI Pro Tour. De belangrikste periode voo de ièndahswedstriden is moart-april, met een ipienvolhinge van Pro Tour wedstriden. Een ander belangrike periode es het nojoar, met een twiède reeks wedstriden eindihend in het Weireldkampioenskap. Een aantal van de belangrikste wedstriden zin:

• Milaan-San Remo
• Ronde van Vlaonderen
• Paris-Roubaix
• Luk-Bastenoak'n-Luk
• Ronde van Lombardije
• Hent-Wevelhem
• Amstel Gold Race
• Woalse Pijl
• Vattenfall Cyclassics
• Clasica San Sebastian
• GP Ouest France-Plouay
• Kampioenskap van Zürich
• Paris-Tours

West-Vloandern eit een rike tradisie in de koerse, en vele gemêenten ein wok under eigen koerse. Een aantal vôorbeeldn: E3 Pris Vloandern, Kuurne-Brussel-Kuurne en Twis deur Vlaonderen

Het peleton in de Ronde van Vrankrik

Wielerrondes

Verspreid over het hièle joar zin der veel kortere rittnwedstriden, moar de belangrikste ein platse van mei tot september: Ronde van Itoalje, Ronde van Vrankrik, Ronde van Spanje. De mièste rondes ein een ofwisselend palet an rittn: vlakke rittn, berhrittn, tidrittn, ploehentidrit,.... In de wielerrondse ei je verskillende klassementen: iederen dag dat er nen rit hereden weird es't er nen dahwinnoare. De belangrikste pris es de overwinninge in tid (olle tiden van olle rittn weirden tôopeheteld, en deen met minste tid wint de ronde. Doarnoast ei je wok nog het puntnklassement (aan de ankomste weirdn der puntn heheven in platse van no den tid te kikken), het bergklassement, het klassement voor de beste jongere, de aanvalslust,...

West-Vloandern eit ièn wielerronde: de Driedoagse van De Panne.

Subdisciplines en specialisoasie

Der bestoan verskillende types van renners, noarhelang under kwaliteitn (vôorbeeld de sôorte spiern da ze ein):

• Sprinters: da zin coureurs die meedoen voo de overwinning oat het peloton in hroep ankomt an de finish. Een vôorbeeld es Tom Boonen en Mc Ewen.
• Tidridders: zin coureurs die hoe zin in nen tidrit, die dus rap alliène keun rien. Tes het slag coureurs die, os ze meekeun'n in de berhen, nohal dikwijls favoriet zin voo de eindoverwinninge in een wielerronde. Vôorbeeld: Lance Armstrong
• Berhheitn: hasten die hemakkelijk berhip keun'n rien. Vôorbeeld: Marco Pantani, Lucien Van Himpe
• Aanvallers: coureurs die geirne in de ontsnappinge hoan, mièstal in vlakke ritt'n en zohenoamde overhangsritten (ritten tussen twiè berhritten in). Vôorbeeld: Johan Museeuw, Nico Mattan.

Verder weirden coureurs nog in twiè catehorieën onderverdield:

• Kopmann'n: hasten die ièn van de kwaliteitn van ierbôovn ein, en dus daordeure veel winn'n.
• Knecht'n: die iets mindere kwaliteiten ein, en doardeur vôoral de kopmann'n moeten help'n (vb. woater han oaln bie de ploehleider, tempo bepoaln van het peloton, de kopman ut de wind zettn, nen velo ofstoan an de kopman o tie plat riedt,...).

Stratehieen

Der zin verskillende stratehieën:

• O ne ploeh nen hoeien sprinter in us eit, hoan ze trachten om het peloton soamen te oudn tot an de meete.
• Ploehen zonder sprinter hoan aanvalln, d.w.z. nen coureur hoat trachten te demarreren ut het peloton en alliène, of in een klièn hroepke de meete trachtn te oaln.
• In een berhrit zal nen ploeh met nen hoeie klassementsridder de koerse tracht'n te controleern deur zin ploeh het tempo te loaten bepoalen. Klassementsridders die hoe berhip keun'n rien hoan ton ip de latste berhen trachten te demarreren.

Doping

De koerse es een sport die nohal heploahd es van Dopinge, wa nen smet leht ip hièl de sport.