Frans I van et HRR

Frans Stefan (Nancy, 8 december 1708 – Innsbruck, 18 ogustus 1765) was de twidde zeune van Leopold van Lotharingen en zyn vrouwe Elisabeth Charlotte van Orléans.

Je volgde zyn voader ip in 1729 ols hertog Frans III van Lotharingen, mo je verloor zyn titel in 1739. ‘t Was de bedoelienge da Frankryk uutendelik Lotharingen zou kunn annexeern deur under kandidoat Stanisław Leszczyński doar an te stelln. Leszczyński was de schônvoader van Lodewyk XV van Frankryk en je krêeg Lotharingen ip vôorwoarde dat et achter zyn dôod in handn zou kommn van Frankryk.

Frans Stefan krêeg ols compensoasje et grôothertogdom Toscane, woa da Gian Gastone, de latste Medici, gestorvn was zoender ipvolger.

In 1736 ist ‘n getrouwd mè Maria-Theresia van Ôostnryk, dochter van Karel VI. Tegoare hen ze de Habsburg-Lotharingen dynastie gesticht.

De Fransche beloofdn dan ze de Pragmatieke Sanctie zoun anveirdn, woadeure dan de dochters ook de trône van under voader kostn ervn, en ook dan ze Maria-Theresia zoun steunn ols ipvolger van d’Habsburgsche bezittiengn.

In 1745 mocht 'n Karel VII ipvolgn ols Rôoms-Duuts keunienk en keizer van et Hillig Rôoms Ryk, oender de noame Frans I.

Under joenges

Frans Stefan en Maria-Theresia haan 16 joenges. (elf meisjes en vuuf knechtn).

Under joengste dochter was Maria Antonia, beter bekend lik Marie-Antoinette, die trouwde mè keunienk Lodewyk XVI van Frankryk. Twi zeuns, Jozef II en Leopold II kwoamn keizer.

• Maria Elisabeth
• Maria Anna
• Maria Karolina
• Jozef II, keizer
• Maria Christina
• Maria Elisabeth
• Karel Jozef
• Maria Amalia
• Leopold II, keizer
• Karolina
• Maria Johanna Gabriela
• Maria Josepha
• Maria Carolina
• Ferdinand
• Maria Antonia (Marie Antoinette)
• Maximiliaan

Frans Stefan is ol met e ki gestorvn in zyn koetse, ol were kêern van den opera in Innsbruck. J’is begroavn in de Kapuzinergruft in Weenn, siddert 1633 de keizerlikke crypte van de Habsburgers.

Frans Stefan mè Maria-Theresia

't Woapn van Habsburg-Lotharingen