Psalmn

Psalmrolle.

De Psalmn ( Tibêerioans Hebrêewsch : Təhillîm; Modern Hebrêewsch : Tehillim, תְהִלִּים, of "lofpryziengn" ), is e' boek van den Hebrêewsche Byble en van de Kristlyke Byble. Allemalle t'ope zyn da' 150 gedichtn die "al de schakeeriengn van 't gelove van Israël weeregeevn"

'Êrkomste van 't wôord

't Wôord psalmn komt van 't Grieksch Ψαλμοί (Psalmoi), da' messchiens ôorsprounklyk wilde zegn "meziek van de liere" of "gezangn by de harpe" en tonne ook glyk wuk stik meziek, te begunn’ by psallein "speeln ip e snaor instrument" en 't endig'n mê "meziek ip glyk wukke wyze".

Saamnstellienge e' tellienge

't Boek van de Psalmn i' ze mêest gebruuklikke vorm bestoat uut 150 gezang'n e' gebeedn die êk apart e' psalm 'êet en die verdêeld wordn in 'oofstikn e' verzn. Z'ên allemalle e' dichtrlik karaktre mê dikkers 't gebruuk van glykloopnde gedachtn of 'êr'aaliengn. Boovn’ip de tietle van de verzaamlienge, die zoveele wil zeggn' lik "gezang" of "lofpryzienge" zowel in 't Hebrêewsch of in 't Grieksch, stoandr oundretietls boovn vele van de psalmn. De deeze geevn muziekale anduudiengn va' vôojzetjies die wêl zoe'n gekend gewist zyn deur vroegre godsdienst'ge genôotschappn. Gezang'n die'j gemaklik ku't erkenn'n in de Psalmn omvatt'n gezang'n van dankgeevienge ( byvôorbeeld Ps. 30 ), lofzang'n ( byvôorbeeld Ps. 117 ) e' keunienklikke psalmn, die kunn'n gebruukt word'n by krôoniengn e' bruuloftn. Êrkennienge va' sommigte psalmn lik gebeedn zyn ook te ziene in de tekste, byvôorbeeld ip 't ende va' Psalm 72, "De gebeedn van David zeune va' Jesse zyn gedaon." 't Grotste part van de Psalmn, 'oewel nie lik dusdoanig 't 'oope gezet in de tekste, zyn smeekbeedn. 't Zietr ook noar uut dat de psalmn e' bedoelinge 'addn va' de wet te verduudlikkn ( byvôorbeeld Psalm 1 en Psalm 119).

D'oederdom van d'ofzounderlikke psalmn is moeilijk te schattn, en somtyds nie 't achtre'aaln. Vele zoendr geschreevn zyn vroeg in de geschiedenisse van 't oede Israël ( duusd joar vôo Christus of nog iddre ) binst datr andre zoe’ kunn geschreevn zyn achtre de Babyloniesche Gevang'nschap, die platse gevoenn’ ê i' de zesde êeuwe vôo Christus. Byble-gelêerdn zienn' in de vroegste tyd vuuf verzaamliengn lik of dat ook is in de Torah of Pentateuch ( de êeste vuuf boekn van de byble ). Pertanks, andre reedns vo 't boek ip die maniere te verdêeln ligndr nie vo d'and. De schryvrs zyn eignlik nie echt gekend oundanks da veele psalmn an David toegeschreevn zyn .

Tellienge

Hebrêewsche Psalmn	Grieksche Psalmn
1–8	1–8
9–10	9
11–113	10–112
114–115	113
116	114–115
117–146	116–145
147	146–147
148–150	148–150

De saamnstellienge en de nummrienge van de psalmn verschilt lichtjes tusschen de Mazoretische tekste en de Grieksche 'andschriftn van de Septuagint.

Kristlikke tradieschjes verschilln :

• De Katlieke offisjêele liturgie volgt de Grieksche nummrienge, mo moderne katlieke vertoaliengn gebruukn dikkers de Hebrêeuwsche tellienge, somtyds zettn ze de Grieksche nummrienge dr'ook by tusschn 'akschjies.
• De Ôostersch-Orthodoksche vertoaliengn steun’ uddre ip de Grieksche tellienge.
• By de Syrisch-Orthodoksche Kerke Peshitta zyndr 155 psalmn.
• Protestansche vertoaliengn volgen de Hebrêeuwsche nummrienge.

In 't artiekle 'ier wordt de Hebrêeuwsche nummrienge gevolgd, tezy dat anders gezeid is.

Externe koppliengn

• Psalmn in 't Hebrêeuwsch
• Psalmn in 't Iengels (en)

Verwyziengn

<references>