Pepeyn van Italië

Pepeyn van Italië (geboortenoame Karloman), (773/777 - 8 juli 810) was de derde zeune van Karel den Grôotn. Je was keunink van Italië ounder ’t gezag van zyn voader. Zyn moeder was Karels twidde wettelikke vrouwe Hildegard van Vintzgau.

Mè zyn êeste vrouwe Himiltrude ha Karel den Grôotn gin wettelik huwelik. Ze was zyn concubine en met heur had 'n e dochter Amaudru en e zeune Pepeyn. Je zetteg heur an de kant vo te kunn trouwn me de Langobardische prinsesse Desiderata.

Zyn oudste zeune Pepeyn met de Bulte kwam nie in anmerkienge vo d’erfipvolgienge en in 780 ounterfde Karel den Grôotn hem officieel. Je liet de noame van Karloman in Pepeyn verandern, omda Pepeyn e belangryke noame was in de Karolingische dynastie.

Keunink van Italië

Karel den Grôotn was keunink van de Langobardn (of Lombardn) van 774. In 781 bezocht ‘n ’t gebied vor orde ip zoakn te stelln en ’t land ounder Karolingisch gezag te briengn. Je stelde zyn zeune Karloman an ols keunink van Italië. Karloman wierd den 15stn april 781 deur paus Adrianus I gekrôond me d’yzere Lombardische krône en zyn noame wierd veranderd in Pepeyn. Je vestigdeg hem in Pavia, d’hoofdstad van Lombardye.

Vrouwe en jounges

Je trouwde me Bertha, dochter van de groaf van Toulouse en z’han vuuf dochters:

• Adelaide, trouwde me Lambert I van Nantes. Hunder zeune Guido I van Spoleto was de voader van Guido van Spoleto, keunink van Italië en keizer van ‘t Hillig Rôoms Ryk.
• Atala
• Gundrada
• Bertha
• Tetrada,

J’had ook ’n ounwettige zeune Bernard.

Divisio Regnorum

Met de Divisio Regnorum regelde Karel den Grôotn in 806 de verdêlienge van zyn ryk, vor achter zyn dôod. Pepeyn zou neffest de gebiedn van Italië ook stikkn van Beiern, Karinthië en den helt van Alemannië krygn, mo ’t kwam nie zo verre, want je stierf in juli 810. Olhoewel da zyn zeune Bernard ounwettig was mocht ’n van Karel den Grôotn zyn voader ipvolgn in Italië. Pepeyns oudere broere Karel den Joungern stierf in 811 en doarom erfde zyn joungere broere Lodewyk den Vroomn ’t Frankisch Ryk.