Markgroafschap Antwerpn

De mark Antwerpn binn et Hertogdom Broabant (1477)

Et markgroafschap Antwerpn wierd in 974 gesticht deur keizer Otto II van 't Ottoons Huus.

’t Lag ton in Lotharingen, dat in 925 ounder Hendrik I de Veugeloare definitief by ’t Duuts ryk gevoegd was.

In de 7e êeuwe was et oud Romeins Toxandrië ipgesplitst in verschillige gouwen of pagi. ’t Gebied da nu ’t Antwerpse is, was de pagus Renensium, ook et land van Ryen genoemd.

Deurdat Oost-Francië en Lotharingen in 925 êen land gekommn woarn, da van ton et Duuts Ryk genoemd wierd, was de ryksgrenze in westelikke richtienge ipgeschoovn en stoendn Duutsland en Frankryk nu tegenover makoar an de Schelde, die de grenze vormde.

Vo zyn westgrenze te beschermn teegn Frankryk en de groavn van Voandern, die olsan mo mêer macht krêegn, stichtte Otto II in 974 drie belangryke sterk bewoapnde versterkiengn an de rechterkant van de Schelde: de markgroafschappn Antwerpn, Ename en Valenciennes.

De pagus Renensium krêeg nu et specioal statuut van markgroafschap met e markgroaf an ‘t hoofd. Den êeste markgroaf van Antwerpn en Ename was Godfried van Verdun, die in 963 getrouwd was mè Mathilde van Saksn, de moeder van groaf Arnulf II van Vloandern, en dus zyn stiefvoader. Da was e slimme zet van Otto II, die wist dat Arnulf doadeure an zyn kant zou stoan, vor in 't geval da Lotharius van Frankryk hem were zou willn bemoein mè Lotharingen.

Van 1106 krêegn de groavn van Leuven den titel. In 1183 wierd et hertogdom Broabant gecreëerd en kwam et groafschap Leuven ounder et hertogdom. Hendrik I, zeune van Godfried III van Leuven, die groaf van Leuven, landgroaf van Broabant, markgroaf van Antwerpn en hertog van Neder-Lotharingen was, was den êestn hertog van Broabant.

Binn et hertogdom Broabant blêef et markgroafschap Antwerpn toch apart, met ’n eign plekke in d’administroasje, de Stoatnvergoarienge genoemd.

In 1430 kwoamn d’hertogdommn Broabant en Limburg e stik van de Bourgondische Nederlandn, ounder den hertog van Bourgondië Filips de Goein, en in 1482 kwoamn z’ounder de Habsburgers.

De Habsburgers creëerdn in 1482 de functie van gouverneur, en in 1549, mè de Pragmatieke Sanctie van Keizer Karel V, kwam et markgroafschap Antwerpn met et hertogdom Broabant êen van de Zeventien Provinciën.

Markgroavn van Antwerpn

• 969 - 1002 Godfried van Verdun
• 1008 - 1044 Gozelo I de Grôotn
• 1045 Boudewyn VI van Vloandern
• 1046 - 1065 Frederik van Luxemburg
• 1065 - 1069 Godfried met den Board
• 1070 - 1076 Godfried met de Bulte
• 1076 - 1100 Godfried van Bouillon
• 1101 - 1106 Hendrik I van Limburg
• 1106 - 1139 Godfried I van Leuven
• 1140 - 1142 Godfried II van Leuven
• 1142 - 1190 Godfried III van Leuven
• 1190 - 1235 Hendrik I van Broabant