Padde

Dit artikel es geschreevn in 't Ypers, en da zou best ozô bluuvn.

---

Geweune padde
Taxonomische indêlienge
Ryk: Animalia (Bêestn) Stamme: Chordata (Chordabêestn) Klasse: Amphibia (Amfibieën) Orde: Anura (Puutn en paddn) Familie: Bufonidae (Echte Paddn) Geslacht: Bufo (Paddn) Laurenti, 1768
Sorte
Bufo bufo Linnaeus, 1758

E padde (Bufo bufo) is e bêeste die vele in West-Vloandern vôornkomt. 't Is en amfibie, e leeft dus in en buutn 't woater.

Leevnswyze

Paddn leevn zevve nie in 't woater, ze kêern wel ieder joar were voen eiers te leggn.

Je viendt paddn in olle sôortn streekn (wêen, busschn, stikkn,...) en ze koloniseern oek zêre nieuwe pittn (oek dedie die nie nateurlik zyn), mo je zie ze nie vele omdan ze mêestol moa met 'n schemer uutkommn.

Z'eetn olle sôortn fernient en aar bêestn (tettienks, slekken,...)

Nunder grotste bedreigiengn zyn reigers, vossn en fiesjows (die 't vel, woa dat er vergif inzit, ofdoen).

Paddntrek

Ieder joar tusschn begun februoari en oof april trekkn paddn were no de woaterpittn woa dan ze ebôorn zyn (oungeveer, want nieuwe woaterpittn in 'n omtrek van bestoande pittn groakn oek ekoloniseerd) voun te poarn en eiers te leggn. Doavôorn moetn ze mêestol e hêel ende were kêern en an ze toune e grôte boane over moetn steekn, zyn der vele plat ereen. Doavôorn zyn der in vele gemêentn overzetaksjes voe de bêesn t'epn.

Achter dan ze epoard en, kêern z'oek were, mo nie me zovele in ekê.

Vôortplantienge

E padde legt eiers in 't woater in lange droan, mêestol round en tusschn woaterplantn edroaid. At wuvetje die eiers legt, bevrucht 't vintje ze beist dat 'n up neur rik zit. Achter en ende kommn der doa dikkoptjes uut, die van e padde ossan schoezwort zyn. Z'eetn toune surtout algn. Doarachter groein ze vors en ze krygn êest achterpôotn en toune mo vôorpôotn. Loater verteirt nunder steirt en krygn ze de vorme van en echte padde. 't Is van toune vors dat 'n up 't land go goan leevn.

Aar paddn in West-Vloandern

• Vroedmêesterpadde (Alytes obstetricans): round Gilwe is er e populoasche, mo dat zyn der die uutezet zyn en die van uut Itoalië kommn. Vroeger en der in West-Vloandern wel nog eleefd. De populoasche roend Gilwe is wel goed bezig. 't Vintje droagt de bevruchte eiers up ze rik mei. En oudt ze nat en smyt ze an ze bykan moetn uutkomn in 't woater.
• Rugstreeppadde (Bufo calamita): e klêene padde met e strepe up ze rik. Komt ollêne nog vôorn an de kust in De Panne, Koksyde en Nieuwpôort. Styf bedreigd.

Externe koppeliengn

• Mêer uutleg over de paddn
• Woa dat de geweune padde vôornkomt in Vloandern