Odo I van West-Francië

Odo I van West-Francië, of Odo I van Vrankryk, (ca. 860 – La Fère 1 januoari 898) was e zeune van Robert de Sterkn, van de familie van de Robertynn. Je was groaf van Parys en markgroaf van Neustrië.

De 29stn februoari 888 wierd ie in Compiègne gekrôond tout keunienk van West-Francië, oundanks ’t feit da Karel de Simpeln eigentlik de wettign ipvolger was, moa nog te jounk. Odo was den êeste Fransche keunienk van et huus van de Robertynn.

J’is surtout bekend deurdat ie hem goed verdedigde teegn de Vikings binst de belegerienge van Parys (885-886). Je kost under ton acht moandn teegn houdn. Vo die reedn wierd ie achter den dôod van Karel den Dikkn verkoozn tout keunienk van West-Francië.

Je blêef vechtn teegn de Vikings en je versloeg ze in 888 in de slag by Montfaucon en in 892 by Montpensier.

J’het de reste van zyn leevn moetn vechtn teegn Karel de Simpeln, die zyn recht ip de krône blêef ipeisn. Je kwam ook in stokkn mè Boudewyn II van Vloandern, die profiteerde van de conflictn, vo zyn groafschap Vloandern uut te breidn.

Karel de Simpeln krêegt de steun van sommigte edeln en aartsbisschop Fulco van Reims, en den 28stn januoari 893, an zyn dertien joar, krôondn z'hem tout keunienk van West-Francië, moa je wierd moar officieel erkend achter Odo zyn dôod in 898.

Odo zocht steun by Arnulf van Karinthië, de keunienk van Oost-Francië, die van 894 partye trok vo Karel de Simpeln.

Vrouwe en jounges

Je trouwde in 884 mè Theoderade van Troyes.

Under zeuns Rudolf, Arnulf en Guy zyn jounk gestorvn.

Ofbeeldiengn die ier by passn ku je vien in de categorie Odo of France van Wikimedia Commons.