Boudewyn IX van Vloandern

Boudewyn IX van Vloandern (Valenciennes, juli 1171 – Bulgareye, ca. 1205) was groaf van Vloandern van 1194 toet 1205. Je was ook groaf van Henegouwn van 1195 toet 1205 ols Boudewyn VI, en keizer van Constantinopel van 1204 toet 1205 ols Boudewyn I.

Je was êen van de belangrykste leiders van de vierde kruustocht, die endigde in de veroverienge van Constantinopel, hoofdstad van ‘t Byzantyns- of Ôost-Romeins Ryk. Ze beslistn van in de plekke van ’t Grieks Ryk e nieuw Latyns Ryk ip te richtn en Boudewyn wierd doa verkoozn toet êeste keizer van et Latyns Keizerryk van Constantinopel. De 16ste meie 1204 ist ‘n gekrôond in de Hagia Sophia.

Zyn leevn

Boudewyn IX was den oudste zeune van groaf Boudewyn V van Henegouwn en van Margaretha van den Elzas, zuster en erfgenoame van Filips van den Elzas, groaf van Vloandern.

Je trouwde in 1186 mè Maria van Champagne, dochter van Hendrik I van Champagne.

Achter da zyn moeder gestorvn was in 1194 kwamt ie groaf van Vloandern, en achter den dôod van zyn voader in 1195, ook groaf van Henegouwn. Azo woarn de twê groafschappn were verênigd en da was ol geleen van in 1071. Robrecht I van Vloandern versloeg ton zyn vôorganger Arnulf III, zeune van zyn broere Boudewyn VI en van Richilde van Henegouwn, in de Slag by Kassel. Robrecht de Fries kwam ton groaf van Vloandern, mo Richilde en heur andere zeune Boudewyn hieldn Henegouwn.

D’êeste joarn van Boudewyn IX zyn regerienge lagt ’n standvastig in conflict mè de Fransche keunienk. De probleemn kwoamn nog ossan vôort uut et feit da zyn nounkel Filips van den Elzas in den tyd Artesië ofgestoan haad an Boudewyn zyn zuster, Isabella van Henegouwn, o ze trouwde mè Filips August. Boudewyn zocht steun by Hendrik VI van et Hillig Rooms Ryk en den Iengelsche keunienk Richard Leeuwenhart.

Achter da Filips van den Elzas gestorvn was en binst da Filips August weg was mè de derde kruustocht in 1191, haad den aartsbisschop van Reims hem mêester gemakt van Béthune en andere steedn van Artesië. Doarip viel Boudewyn IX Artesië binn.

In 1199 wierd de vrede van Péronne getêeknd deur Filips August en Boudewyn IX, woaby da Bethune were an Vloandern kwam. ‘t Verdrag bepoaldeg ook da Filips I van Noamn, Boudewyn zyn broere, were vry kwam achter dat ’n gevangn was deur Vrankryk.

Da zelfste joar heet ’n tegoare mè zyn vrouwe de kruusvoardersgelofte ofgeleid in de Sint-Donoaskerke van Brugge, en de 14stn april 1202 ist ‘n vertrokkn vo de vierde kruustocht.

Zyn vrouwe, die in verwachtienge was, is mor achter gegoan o ze genoeg hersteld was van de geboorte van under dochter Margaretha. Ze vertrok uut Marseille en landde in Akko (Israël), woa da z’hoorde van de veroverienge van Constantinopel en de benoemienge van heur vint toet keizer. Ze wilde vertrekkn no Constantinopel, mo z’is ziek gekommn en de 9stn ogustus 1204 is ze gestorvn.

In juli 1205 is Boudewyn IX overmêesterd gewist deur keunienk Joannitza de Zwartn van de Bulgoarn binst e veldslag en j’is gestorvn in Bulgoars gevangnschap. Z’hen nôois mêr etwa van hem g’hôord of gezien.

De groafschappn Vloandern en Henegouwn kwoamn in handn van zyn minderjoarige dochter Johanna, en in Constantinopel wierd ‘n ipgevolgd deur zyn broere Hendrik van Vloandern.

Vrouwe en jounges

Je trouwde de 6dn januoari 1186 mè Maria van Champagne. Z’haan twê dochters:

• Johanna (1199-1200 † 1244), gravinne van Vloandern en Henegouwn, getrouwd mè:
  1. in 1212 Ferrand van Portugal
  2. in 1237 Thomas II van Savoye
• Margaretha II (1202 † 1280), gravinne van Vloandern en Henegouwn, getrouwd mè:
  1. in 1212 (geschid in 1221) Bouchard van Avesnes
  2. in 1223 Willem II van Dampierre