Sint-Annareie

Dat artikel es geschreevn in 't Noordelik West-Vlams.

---

Liggienge van de Sint-Annareie (doenkreblow).

De Sint-Annareie is e woatrelôop en e stroate in 't centrum van Brugge. De reie lopt van de byêenkomste mê de Groenereie en de Koepeure toe an de Speeglreie. De glyknoamige stroate ligt ip den ôostelikkn oevre en lopt van de Carmersbrugge toe an 't Minnebopling en de Leffingestroate. Ip de westelikkn oevre ligt de Verversdyk. De Sint-Annareie wordt oovrspann deur de Meulnbrugge, de Sint-Annabrugge en de Strôobrugge.

De noame "Sint-Annareie" verwyst no de in 't ôostn angrenznde wyk en prochje Sint-Anna. Ôorsproenklik êete de stroate Sint-Annarei "Schottndyk", no de doa gevestigde Schotsche kommêrsantn.

Oovre de kunstmoatigeid van de Sint-Annareie bestoatr weinig duudlikeid. Meuglik is 't de kanaliezeerienge van de beneenlôop van 't Vuldersreitje, e woatreloptje da vanuut Assebroeke kwam. Vanof 1127 makte de Sint-Annareie dêel uut van de êeste stadsomwollienge van Brugge. Dichte by de Meulnbrugge stoend d' Oede Meulnpôorte. Tusschn 1623 en 1855 was de Sint-Annareie oenderdêel van 't kanoal tusschn Ostende, Brugge en Gent. Noadien pakte de Riengvoart die rolle oovre. In 1750 wierdn alle bruggn oovre de Sint-Annareie vervangn deur oetn (en loatre yzrn) droajbruggn, vo de deurvoart vo grotre scheepn meuglik te moakn. Loatre wierdn de bruggn weere vervangn deur de teegnwôordige stêenn bruggn.

Van de middlêewsche kommêrsjêele aktievieteitn getuugt nog 't vroegre pak-uus nr. 4. Vors telde de stroate e twêetol belangryke broweryn: an den êene kant browery Den Hert, oendregebrocht in 't uus nr. 17, en an den andre kant browery Den Arend, loatre browery Aigle Belgica, oendregebrocht in de pandn nrs. 23-27.

• 
  E poar uuzn lanst de Sint-Annareie.
• 
  De Sint-Annareie vanip de Meulnbrugge, mê rechs ip den achtregroend de torre van de Sint-Annakerke.
• 
  E poar geevls an de Verversdyk.
• 
  't Europacollege campus Verversdyk lanst de Sint-Annareie.
• 
  De Sint-Annareie vanip de Strôobrugge.

Befoamde inweuners

• Achiel Van Acker
• Erik Van Biervliet

E bitje voddr kykn

• (fr) Duclos, Adolphe 1910 : Bruges, histoire et souvenirs, Brugge.
• (nl) Schouteet, Albert 1977 : De straatnamen van Brugge. Oorsprong en betekenis, Brugge.
• (nl) Beernaert, Brigitte e. a. 2002 : Sint-Annarei 12, de tuin van Jules Busschop, in : Een tuin is meer dan er staat, Open Monumentendagen 2002, Brugge.
• (nl) Beernaert, Brigitte e. a. 2002 : Sint-Annarei 22, in : Wandelgids met 33 verhalen uit de oude stad, Brugge.

Eksterne koppliengn

• (nl) De Sint-Annarei in de Inventaris van het onroerend erfgoed.