Kemmelberg

'n Berg van ol de moeilikste (westelike) kant

De Kemmelberg is een getuugnheuvel in West-Vloandern. 't Is mi zyn 156 meiters 't hoogste punt in Vloandern. Op 't stêegste punt goat et 23% omhoge. De Kemmelberg legt op 't groundgebied van de gemêente Euvelland. 't Is e styf schône omgevienge voar e toertje te doen, te voete of mi de vèlo.

Geologie

De Kemmelberg is, juuste lik de mêeste heuvels in 'n omtrek, ontstoan uut een duunnformoasje op 't moment dat de Nôordzêe nog zoaverre 't land binn'n edroungn et. In 't duunnzand (van 't Diestiaan) zit er veel yzer, en doadeure is de ground doar arter en zyn d'euvels nie weggeërodeerd lik de rèste van 't landschap. 't Feit da je hoaietandn kunt vyngn is e bewys dat 't zand vantydn ouk ounderwoater zat.

Êestn Weirldôorlog

Monument voa de Franse soldoatn van 'n Êestn Weirldôorlog

Bissen 'n Eestn Weireldôorlog wos 'n Kemmelberg, die 1,5 km te zuudwestn van 't dorp Kemmel legt, e strategisch punt. 't Wos deur olletwêe de partyen zwoar bevochtn. Bissen 't offensif in 'n uutkom van 1918 bezettn de Duutsche troeps 'n Kemmelberg. 'n Noastn dag wos 't er e teegnaanvol van de Fransche troepn. Azoa et der over 'n Kemmelberg evochtn ewist tout da 'n eroverd wos op 'n vuufden september. Achter 't vichtn was 'n euvel hêlegansn kletse, en e moest hêlemoale erplant zyn mi boomn.

Op 'n top stoat er e monument by 't Frans massagraf. Officêel noem 't monument "Monument Aux Soldats Français". Moa terplekke noemn ze 't "'n Iengel". D'er stoat ouk een uutkyktôorn die oopn is voa 't publiek.

Ounder 'n Kemmelberg legt er e commandobunker uut de Koudn Ôorlog, die sedert 2007 inericht is lik e ôorlogsmuseum.

Koers

'n Kemmelberg is dikkers angedoan in koersn lik Gent-Wevelgem, de Driedaagse van West-Vloandern by de profs, Gent-Yper of de Kattenkoers by d'amateurs en Ledegem-Kemmel-Ledegem by de juniors. Deur 't gevoar van volpartyn wordt der nie mi ofgedoald over de koschien: 't parcours begunt d'ofdoalieng nu an 'n gasfalteerdn zuudkant, 't nimt toen e klêen asfaltwegeltje met e boge noa 't Frans kerkhof en vandoar uut 't g'asfalteerd dêel van de westelike ofdoalieng.

Kemmelberg-ôost
Top	156 m
Locoatie	Euvelland
Startplekke	Kemmel
Ôogteverschil	122 m
Lengte	3.000 m
Stygiengs-% (gem)	4,0 %
Steilste stik	22 %

Kemmelberg-west
Top	156 m
Locoatie	Euvelland
Startplekke	Kemmel
Ôogteverschil	109 m
Lengte	2.500 m
Stygiengs-% (gem)	4,4 %
Steilste stik	23 %

Kemmelberg-zuud
Top	156 m
Locoatie	Euvelland
Startplekke	Kemmel
Ôogteverschil	109 m
Lengte	1.400 m
Stygiengs-% (gem)	7,8 %
Steilste stik	17 %

Ofbeeldiengn die ier by passn ku je vien in de categorie Kemmelberg van Wikimedia Commons.