Anton Geesink

Anthonius Johannes (Anton) Geesink (Utrecht, 6 april 1934 – zelfste plekke, 27 ogustus 2010) wos een Hollandsche judoka, weireld- en olympisch kampioen judo en lid van 't Internationoal Olympisch Comité (IOC). Anton Geesink wordt algemêen anzien lik de beste judoka oller tydn.

Anton Geesink weireldkampioenschap (1961)

Carrière

Anton Geesink begost zyn carrière ols worsteloare by "De Halter" in Utrecht woar dat hy ôok ênigte titels g'hoald hèt, noamelyk drie kêers nationoal kampioen worsteln Grieks/Romeins. Doarneffest giengt hy hem bekwoamn in de judosport. In ze leevn hèt hy in 1951 d' Hollandsche kampioenschappn gewonn, e joar loater d' Europeesche kampioenschappn, in 1961 in Parys de weireldkampioenschappn, in 1964 in Tokio de weireldkampioenschappn en d' Olympische Speeln en in 1965 in Rio de Janeiro ook de weireldkampioenschappn. In totoal hèt den Utrechtse judokampioen 21 Europeesche titels veroverd in 't zwoargewicht en de klasse 'alle categorieën'. Den titel die Anton Geesink won ip d' Olympische Speeln in 1964 in Tokio wordt gezien lik zyn grotste prestoasje, moa d' echte deurbroake van Anton Geesink was drie joar idder ost hy binst de weireldkampioenschappn in Parys in 1961 drie Japanners tereke versloeg ols niet-Japanner, etwadde da nog nôois idder in de geschiedenisse van de judosport wos vôorngekommn en hiermee d' allêenheerschappy van Japan in die tak van de sport deurbrak. In 1997 wos Anton Geesink houder van de 10e dan. (groad in de vechtsport) Doarneffest wos Anton Geesink ôok trainer, coach en scheidsrechter.

Fotogalery

• 
  Anton Geesink (1959)
• 
  Buste van Anton Geesink in Wyk C in Utrecht woar dat hy geboorn is (buste deur Theo van de Vathorst, 1995)
• 
  Herinnerienge an 't vroeger gebouw van de worstelverênigienge "De Halter" ounthuld ip 06-02-2012 an de Bollenhofsestroate 102 in Utrecht
• Wassnbeeldnmuseum Madame Tussaud" an de Dam in Amsterdam, mè loopster Fanny Blankers-Koen, judoka Anton Geesink en bokser Bep van Klavern met Olympiade tembers
  Wassnbeeldnmuseum Madame Tussaud" an de Dam in Amsterdam, mè loopster Fanny Blankers-Koen, judoka Anton Geesink en bokser Bep van Klavern met Olympiade tembers

Trivia

• Der is in Utrecht e stroate genoamd noar Anton Geesink, d' Anton Geesinkstroate woar dat hy zelve ôok weunde boovn zyn eign judoschole.
• In 't museum "Madame Tussaud" an de Dam in Amsterdam stoat neffest d' Hollandsche bokslegende Bep van Klavern en looplegende Fanny Blankers-Koen ôok Anton Geesink zyn wassnbeeld.
• In d' Hollandsche film "Rififi in Amsterdam" uut 1962 speelt Anton Geesink de rolle van rechercheur, en in de film "I grandi condottieri" (Gideon en Samson) uut 1965 van den Italioansche filmregisseur Marcello Baldi speelt Anton Geesink d' hoofdrolle van Samson.
• De Anton Geesinkmars is e muziekstik vo droaiorgel, specioal vo Geesink gecomponeerd.

Externe koppeliengn

• Website Anton Geesink - antongeesink.com
• Anton Geesink uitgeroepen tot judo-legende - historiek.net
• Over Anton Geesink - 't Utrechts Archief

Ofbeeldiengn die ier by passn ku je vien in de categorie Anton Geesink van Wikimedia Commons.