Cyriel Van Hauwaert

Dit artikel es geschreevn in 't Môoslees, en da zou best ozô bluuvn.

---

Cyriel "in actie"

Cyriel Van Hauwaert (officieel "Cyrille van Hauwaert"), geboren te Môoslee de 16de december 1883, gestorvn te Zellik de 15 februoari 1974.

Cyriel Van Hauwaert wos als joenk vintje stookre in d'alkoholfabrieke van Camiel Lammertyn. Je moste van zynen boas wok d' andelsbrievn oltemets me zyn velo roenddroagn, ofdat da nu in Môoslee wos of in Ostende. Camiel Lammertyn zoag rap dat Cyriel koersebêenn ad en kochte ne koersevelo vor em. Vanof zyn 14 moest ie no Vrankryk in de stêenovens goan werkn. Da wos zwoar labeur vo winnig geld ... Doarom wilde ie in Vrankryk goan koersn, omdat ie wiste da ze doa toamlik veel geld kostn verdienn. De grôte velofabriekn addn ol eigen ploegn en ne coereur krêeg materioal en elpers van under.

In 1907 trok Van Hauwaert noa Parys vo te proberen te startn in Parys-Roubaix. Moa van de direksje kreegt'en gêen gangmoakers. Ze wilden zyn kostn vo de terugreize betoaln, moa da wos nie nôdig: je wos me zyn velo noa Parys gekomn! Je startte toch, volgenst de legende "me twêe reservetuben, twêe eiers en n floske limenoade". An den arrivee in Roubaix wos tie twidde, achter n volparty kort voa 't binnryen van de velodrom! Twêe moandn loatre woen tie Bordeaux - Parys (Bordeaux-Parijs ). Doardeure wierd ie in Belgje lik nen nationoalen eld oentvangn.

De velosport wierd wok van langsom poppulairdre. Vele joenge gasten begosten wok te koersn, omda ze zoagn dat er mêer mee te verdienn viel dan me te goan werkn. Van Hauwaert krêeg noamelik zêre 'n contract van ne Franske ploeg en je verdiende 3000 fr in e moand!

Je wos dus eigentlik den êesten Flandrien en je krêeg de bynoame "De Leeuw van Vloandern".

In Môoslee es 't er 'n stroate genoemd noar em.

Cyriel met 90 jarige vader bie 't ouderlyk uus in Slyps

Vôornamste uutsloagen

1. 1907: 2e in Parys - Roubaix
2. 1907: 1e in Bordeaux - Parys
3. 1908: 1e in Miloan - San Remo
4. 1908: 2e in Belgisch kampioenskap
5. 1908: 1e in Parys - Roubaix
6. 1908: 2e in Parys - Brussel
7. 1908: 2e in Bordeaux - Parys
8. 1909: 1e in Belgisch kampioenskap
9. 1909: 1e in 2e rit Roende van België, Yper
10. 1909: 1e in 4e rit Roende van België, Noamen
11. 1909: 3e in klassement Ronde van België
12. 1909: 1e in 1e rit Tour de France, Roubaix
13. 1909: 1e in Bordeaux - Parys
14. 1910: 1e in Parys - Mêende (Nederlands: Menen)
15. 1910: 2e in Parys - Roubaix
16. 1910: 4e in klassement Tour de France
17. 1910: 3e in Parys - Brussel
18. 1911: 3e in Belgisch kampioenskap
19. 1911: 3e in Parys - Roubaix
20. 1911: 2e in Parys - Tours
21. 1911: 2e in Zottegem
22. 1911: 3e in Roende van Lombardije
23. 1912: 2e in Zesdoagse van Brussel
24. 1913: 2e in Bordeaux - Parys
25. 1913: 2e in Parys - Brussel
26. 1914: 1e in Zesdoagse van Brussel
27. 1914: 3e in Bordeaux - Parys
28. 1915: 1e in Zesdoagse van Brussel

Achter zyn lôopboane als coureur èt ie de bloeinde zoake 'Cycles Van Hauwaert' in Ronse upgericht.