Velokoerse: verschil tussen versies

Van Wikipedia
k sv 1.1b
Tbc (discuusjeblad | bydroagn)
k Vélokoerse ernoemd noar Velokoerse: vo wuk dat accentje?
(geen verschil)

Versie van 21 jul 2007 12:38

Bels kampioenschap op de weg 2006

Vélokoerse of kortweg koerse ès een sport. De bedoelinge ès om met ne vélo zo zêre meuglyk van start tot finish te geroaken. 't Es nen echten ploegsport. Nen ploeg bestoat typisch uit êen of eventueel twêe kopmann'n, en mêerdere helpers, en weirdt geleid deur nen sportdirecteur. Oloewel professioneel wielerploegen uut soms 30 coureurs bestoan, magt er an iedere koerse toch moar nen ploeg van 8 tot 10 coureurs startn.

Sôortn wielrenn'n

Oloewel het vélokoerse ip de weg, die ier beschreevn weirdt, het mêest gekend es, zyn der ôok nog andere disciplines:

  • koerse ip de piste: coureurs droaien ip een geslootn circuit zo zêre meuglyk rondjes.
  • cyclo-cross: wielerkoerse, moa ton in het veld (mo ôok in't zand, de moze of deur't bos).
  • Mountenbiken: nen extremeren vorm van veldryn, zo moetn der bievôorbeeld ôok over rotsen gereedn wordn.

Olle disciplines zyn Olympisch, uutgenoomn cyclo-cross.

Koerse ip de weg

De discipline met de mêeste internationoale utstroalinge es de koerse ip de weg. Het wielersezoen start in januari, en endigt in november. Der zyn twêe sôorten koersen:

Êendagswedstryden

Êendagswedstryden zyn, zoals de noame ol verklapt, wedstryden die over êne dag gereedn wordn. Der zyn veel êendagswedstryd'n, ingedêeld in categorieen volgens hun belang. De belangrykste wedstryden zyn sedert 2005 gegroepeerd in de UCI Pro Tour. De belangrykste periode voo de êendagswedstryden is moart-april, met een ipienvolginge van Pro Tour wedstrrden. Een ander belangryke periode es het nojoar, met een twêede reeks wedstryden eindigend in het Weireldkampioenschap. Een aantal van de belangrykste wedstryden zyn:

West-Vloandern eit een ryke tradisie in de koerse, en vele gemêenten ein ôok under eigen koerse. Een aantal vôorbeeldn: E3 Prys Vloandern, Kuurne-Brussel-Kuurne en Twis deur Vloandern

Het peleton in de Ronde van Vrankryk

Wielerrondes

Verspreid over het hêle joar zyn der veel kortere rittnwedstryden, moar de belangrykste ein platse van mei tot september: Roende van Itoalje, Roende van Vrankryk, Roende van Spanje. De mêeste rondes ein een ofwisselend palet an rittn: vlakke rittn, bergrittn, tydrittn, ploegentydrit,.... In de wielerrondes ei je verschillende klassementen: iederen dag dat er nen rit gereden weirdt es't er nen dagwinnoare. De belangrykste prys es de overwinninge in tyd (olle tyden van olle rittn weirden tôpegeteld, en deen met minste tyd wint de ronde. Doarnoast ei je ôok nog het puntnklassement (aan de ankomste weirdn der puntn gegeven in platse van no den tyd te kyken), het bergklassement, het klassement voor de beste jongere, de aanvalslust,...

West-Vloandern eit êen wielerronde: de Driedoagse van De Panne.

Subdisciplines en specialisoasie

Der bestoan verschillende types van renners, noargelang under kwaliteitn (vôorbeeld de sôorte spiern da ze ein):

  • Sprinters: da zyn coureurs die meedoen voo de overwinning oat het peloton in groep ankomt an de finish. Een vôorbeeld es Tom Boonen en Robbie Mc Ewen.
  • Tydryders: zyn coureurs die goe zyn in nen tydrit, die dus zêre allêne keun ryn. Tes het slag coureurs die, os ze meekeun'n in de bergen, nohal dikwijls favoriet zyn voo de eindoverwinninge in een wielerronde. Vôorbeeld: Lance Armstrong
  • Klimmers: gasten die gemakkelijk bergip keunn ryn. Vôorbeeld: Marco Pantani, Lucien Van Himpe en ier ôok Lance Armstrong
  • Aanvallers: coureurs die geirne in de ontsnappinge goan, mêestal in vlakke rittn en zogenoamde overgangsritten (ritten tussen twêe bergritten in). Vôorbeeld: Johan Museeuw, Nico Mattan.

Verder weirden coureurs nog in twêe categorieën onderverdêeld:

  • Kopmann'n: gasten die êen van de kwaliteitn van ierbôovn ein, en dus doardeure veel winn'n.
  • Knechtn: die iets mindere kwaliteiten ein, en doardeur vôoral de kopmann'n moeten elp'n (vb. woater goan oaln bie de ploegleider, tempo bepoaln van het peloton, de kopman ut de wind zettn, nen velo ofstoan an de kopman o tie plat rydt,...).

Strategieën

Patrick Lefevere, ex-coureur e nu sportdirecteur

Der zyn verschillende strategieën:

  • O ne ploeg nen goeien sprinter in us eit, goan ze trachten om het peloton tôpe t'oudn tot an de mete.
  • Ploegen zonder sprinter goan aanvalln, da wil zeggen: nen coureur goat trachten te demarreren ut het peloton en allêne, of in een klêen groepke de mete trachtn t'oaln.
  • In een bergrit zal nen ploeg met nen goeie klassementsryder de koerse trachtn te controleern deur zyn ploeg het tempo te loatn bepoalen. Klassementsryders die goe bergip keun'n ryn goan ton ip de latste bergen trachten te demarreren.

Dopieng

De koerse es een sport die nogal geploagd es van Dopinge, wa nen smet legt ip hêel de sport.