Jan zounder Vrees

Jan zounder Vrees

1371 – 1419
Jan zounder Vrees, portret uut 1415 deur ‘n oungekendn meester uut de Zudelikke Nederlandn
Ertog van Bourgondië
Periode 1404 – 1419 Vôorganger Filips de Stoute Ipvolger Filips de Goede
Groaf van Vloandern
Periode 1405 – 1419 Vôorganger Filips de Stoute en Margaretha van Male Ipvolger Filips de Goede
Voader Filips de Stoute Moeder Margaretha van Male

Jan zounder Vrees (Dijon, 28 meie 1371 – Montereau 10 september 1419) was ertog van Bourgondië van 1404-1419 en groaf van Vloandern vanof 1405. Je was den eeste zeune van Filips de Stoute en Margaretha van Male.

Jan zounder Vrees dankt zyn lapnoame an z’n deelnoame an de kruustocht teegn de Ottomoanse sultan in 1396.

Woapnschild van Jan zounder Vrees

Jan zounder Vrees is in 1385 ip dertienjoarige leeftyd getrouwd me Margaretha van Beieren-Straubing, een dochter van Albrecht van Beieren, groaf van Enegouwn, Olland en Zêeland, vo zyn positie in de lege landn te versterkn. Ip de zelfstn dag trouwde z’n zuster met de zeune van de zelfste groaf. Dien dubbeln trouw legde de groundslag van de loatere eenmoakinge van de Nederlandn.

Juste lik zyn voader Filips de Stoute was Jan zounder Vrees nie styf vele in Vloandern en wast’n meer bezig met de Fransche politiek. Die machtstryd et em uutendelik zyn leevn gekost. In 1419 ist’n ip de brugge van Montereau deur politieke teegnstrevers vermoord, tegoare me zyn lyfwacht. Ook z’n twi broers Antoon en Filips zyn ip ’n gewelddoadige maniere an under ende gekomn in de slag by Azincourt teegn de Iengelschn in 1415.

Jan zounder Vrees is ipgevolgd deur zyn zeune Filips de Goede.

Varia

• De Groaf-Jansdyk an uze kust is noar em vernoemd.
• In ’n poar volkssoagn in Antwerpn ist er sproake van ’n anderen Jan zounder Vrees.