Jean-Pierre Coopman

Jean-Pierre Coopman (°Iengelmunstr, 11 juli 1942) wos e bokser by de zwoargewichtn. En is surtout bekend ebleevn vo zyn kamp teegn Muhammad Ali. Achter zyn carrière blêefn in 't milieu: e begunt mi schildern (van bokskampn) en e traint jounge boksers.

Jeugd

Jean-Pierre Coopmans voader gink dôod toen da Jean-Pierre zeevn joar wos. Ze moeder gink goa werkn in de fabrieke en de joens moestn mei-elpn op e boerdery. Loater wos Jean-Pierre stêenkapper.

Vroege carrière

Coopman smôorde lik e ketter en e dei ni vele an sport. Op ze 25ste (in 1967) begost 'n per toeval te boksen. Coopman trainde dikkers mi Gilbert Monteyne, Belgs amateurkampioen by de zwoargewichtn. Op e dag moestn vo nem involln in Rumbeke. Dat lukte goed, en Coopmans carrière wos e alanceerd. Monteyne wos zyn êestn trainer. Coopman stopte radicaal mi drienkn en smôorn, en e leefde ollêne nog vo zyn sport.

Zyn êestn profkamp wos in 1971 teegn Bosch. Op e bepoald moment roept de referee voor e break, 't têekn dat de boksers uut makoar moetn goan. Moa Coopman adde dat ni ôord, en e sloeg Bosch knock-out. Dat wos ni reglementair, en doadeure verlôor Coopman zyn êeste kamp.

Coopman tegen Ali

De weuge na de top kwam mi ze manager Charles De Jaegher. De Jaegher adde vele menschenkennisse; e kôos styf goed de teegnstanders vou zyn poulain. Vôorn da 'n 't goed e wel wist, stoeg Jean-Pierre in 1976 nummer 15 op de weireldranglyste. Op da moment zocht Muhammad Ali e gemakkelikkn tegenstander, want en ad juste zwoar evochtn tegen Joe Frazier.

Iederêen lachte mi Coopman. De bokspromoteurs in New York noemdn nem De Lêeuw van Vloandern. Moa Ali zei ol lachen da Coopman a sweet little pussycat wos. D'n êeste kêe da Coopman en Ali makoar zaagn, vieln ze in mekoars armes; Coopman gaf Ali e koppel piepers.

De match wos op 20 februari 1976 in San Juan, Puerto Rico. Ze deurde vuuf roundn (14' 46"). Coopman kwam t'r ni an te passe. Ali wos ol over zyn oogtepunt moa wos nog ossan e superieurn bokser. Coopman wos zo slim om nem, achter e reke zwoare sloagn, te loatn voalln in de plekke van nem te loatn ofslachtn in een rounde of tiene. Loater van tyd gaf 'n toe dat 'n nog adde kunn opstoan, moa da dat gin goe gedacht zou ewist zyn.

Loater

• In tegenstellieng tout ander boksers die tegen Ali gevochtn addn, e Coopman loater nog schône dingn loatn zien. En is zefs nog Europees Kampioen gekomn in 1977 achter e kamp teegn de Spanjoard Urtain, in 't Sportpaleis in Antwerpn.
• Coopman adde vele geld verdiend mi de match teegn Ali. In Izegem boksnde vo om en by de 10.000 Belgische frank per kamp. Moa vo de kamp teegn Ali adde 'n Amerikoanchen bokspromoteur Don King voor e beurze van 50.000 dollar ezorgd. Coopman stak zyn geld in e café in Roeseloare (Taverne San Juan), moa da gink overkop.
• Coopman stopt zyn carrière in 1980.
• E makt nu schilderyen en têkeniengn va boksers e kampn. Iddern dag stoat 'n nog in de rienk in boksclub Capitole in Gent om jounge gastjes te begeleidn.

Varia

Jean-Pierre Coopman is 'n ênigstn sportman uut Belgie die op de cover stoeg van 't bekende Amerikoansche magazine Sports Illustrated.

Referensjes

• Geen dag zonder Ali - tv-documentaire uutezondn op 28/01/2008 op Canvas.
• Humo 3415 van 14/02/2006