Naar inhoud springen

Speedrunning

Van Wikipedia
Speedrun van e SuperTux-level

Speedrunning is 't speeln van e computerspel, of e stik van e computerspel, met 't doel om 't zo zêre of meugelik uut te speeln. By speedrunning wordt er vele gebruuk gemakt van geplande routes, woaby da spelers soms sequence breaking toepassn en glitches uutbuutn om stikkn van 't spel over te sloan of rapper uut te speeln of da d' ountwikkeloars bedoeld adn. Tool-assisted speedrunning (TAS) is een ounderdêel van speedrunning da gebruuk makt van emuloatiesoftware of extra instrumentn om een uuterst precieze reekse van handeliengn te moakn, of om 't spel trager te loatn droain vo perfecte bewegiengn.

Der zyn vele online gemêenschappn die under bezig houdn me 't speedrunnen van specifieke speln; de rangschikkingn ip scorebordn (leaderboards) van de gemêenschap zyn de belangrykste maniere om speedruns te meetn. Wedstryden tusschn twêe of mêer speedrunners zyn ook e populaire vorm van competiesje. Video's en livestreams van speedruns wordn online gedêeld via mediasites lik YouTube en Twitch. Speedruns wordn somtyds getoogd ip marathon-evenementn, wa da gamebeurzn zyn woar da verschillige menschn speedruns doen van e grôte variëteit an speln.

Geschiedenisse

[bewerkn | brontekst bewerken]

Vroege vôorbeeldn

[bewerkn | brontekst bewerken]

Speedrunning makt ol dêel uut van computerspeln sedert de vroege doagn van 't medium, vergelikboar me 't joagn ip ôogste scores, ol krêeg 't pas in 1993 echt brêde anandacht. De boasis vo wa da loater moderne speedrunning zou wordn, wierd geleid deur id Software binst d' ountwikkelienge van Wolfenstein 3D (1992). Toch moedigden eerdere speln lik Metroid (1986) en Prince of Persia (1989) 't speedrunnen ol an deur den tyd van de speler te tôogn otn ze bepoalde doeln adn bereikt, woarounder 't uutspeeln van 't spel. Wolfenstein 3D ield e "par time"-statistiek by, gebaseerd ip de persôonlikke records van John Romero vo ieder level. Romero zyn beste tydn wierdn ook afgedrukt in 't officiële tippnboekje, da te krygn was via 't zelfste postordersystêem da gebruukt wierd om 't spel te verdêeln. Zyn bedoelienge was da spelers zoudn probeern om zyn tydn te kloppn.[1]

1993–2003: Doom en Quake demo's, vroege internetgemêenschappn

[bewerkn | brontekst bewerken]

D' ountwikkelienge van e sterke speedrun-gemêenschap wordt over 't algemêen toegeschreevn an 't computerspel Doom uut 1993.[2][3][4] 't Spel behield de "par time"-mechaniek van Wolfenstein en voegde e functie toe woamee da spelers under gameplay kostn ipneemn en ofspeeln in bestandn die demo's wierdn genoemd (ook wel game replays). Demo's woarn lichte bestandn die makkeliker kostn wordn gedêeld of videobestandn ip de bulletin board systems van 't internet van dien tyd.[5] Intern[6] makte Universiteit van Waterloo-studente Christina Norman in januoari 1994 een FTP-server speciaal vo 't verzoameln van demo's, noamelik de LMP Hall of Fame (genoemd noar de .lmp-bestandsextensie die deur Doom-demo's wierd gebruukt). De LMP Hall of Fame inspireerde de creatie van de Doom Honorific Titles deur Frank Stajano, e catalogus van titels die e speler kost krygn deur bepoalde uutdagingn in 't spel te voltooin.[5][3] De Doom-speedrun-gemêenschap ountstond in november 1994, toet da Simon Widlake COMPET-N iprichtte, e website me leaderboards speciaal vo 't rangschikkn van d' uutspeeltydn van de singleplayer-levels van Doom.[5][7]

In 1996 brocht id Software Quake uut lik ipvolger van de Doom-reekse. Juuste lik zyn vôorganger ad Quake e demo-opnoamefunctie en trok 't d' anandacht van speedrunners.[5][7] In april 1997 makte Nolan "Radix" Pflug Nightmare Speed Demos (NSD), e website vo 't byhoudn van Quake-speedruns.[5] In juni 1997 brocht Pflug e volledige speedrun-demo van Quake uut, genaamd Quake Done Quick, die speedrunning by e brêder publiek introduceerde.[5][3] Quake-speedruns woarn ipmerkelik vo under brêde reekse an bewegingstechniekn, woarounder "bunny hopping", e maniere om snelheid te moakn die ook anwezig was in toekomstige schietspeln lik Counter-Strike en Team Fortress.[5][3] In april 1998 smolt NSD soamen met een andere demo-website om d' Speed Demos Archive (SDA) ip te richtn.[5]

2003–nu: Speed Demos Archive en 't dêeln van video's

[bewerkn | brontekst bewerken]

Vuuf joar lank hostte Speed Demos Archive exclusief Quake-speedruns, moar in 2003 publiceerdn ze een 100%-speedrun van Metroid Prime, uutgevoerd deur Pflug. Zesse moandn loater begost SDA runs van olle speln t' anveirdn. In teegnstellienge toet zyn vôorgangers, makte SDA gin leaderboards vo under speln; ze toogdn allêene moar de rapste speedrun van ieder spel.[5] Toet da SDA in 2004 uutbreidde noar andere speln of Quake, wierdn ingezoundn speedrunvideo's surtout noar de vroege videospel-recordhouder Twin Galaxies gestuurd.[5][7] De video's wierdn vele nôoit openboar gemakt, wa da zörgde vo probleemn met de verifieerboarheid die SDA wilde anpakkn. 't Was vele ounmeugelik om te bepoaln wukke strategieën da der woarn gebruukt om die records te vestign, wa da d' ountwikkelienge van speedrun-techniekn teegnwerkte.[5] Websites toegewyd an speedrunning, woarounder spel-specifieke websites, begostn de subcultuur round speedrunning ip te bouwn. Die sites wierdn nie ollêne gebruukt om runs te dêeln, moar ook om soamen te werkn en tips te dêeln om tydn te verbetern, wa da leidde toet gezamenlikke inspanningn om speedrun-records ip bepoalde speln constant te verbetern.[8]

In 2003 krêeg e video die e TAS van Super Mario Bros. 3 toogde, weireldwyd anandacht ip 't internet; vele speedrunners noemn dit lik under êeste kennismoakienge met de hobby. 't Wierd uutgevoerd en gepubliceerd deur e Japansche gebruker die Morimoto noemde. De video miste context om an te geevn dat 't e TAS was, woardeure da vele menschn dochtn dat 't een echte menselikke prestoatie was. 't Krêeg kritiek van kykers die under "bedroogn" voeldn otn Morimoto loater 't proces uutlegde woamee da j' de video ad gemakt en em excuseerde vo de verwarrienge.[5] In december 2003, achter dat em de TAS van Morimoto ad gezien, makte e gebruker die Bisqwit noemde TASVideos (in 't begun NESVideos genoemd[9]), e site die gewyd was an 't tôogn van tool-assisted speedruns.[10]

LiveSplit, een open-source speedrun-timer die de uudige boastiêd (pace) toogt in e speedrun van The Legend of Zelda: The Wind Waker.

D' iprichtienge van websites vo 't dêeln en streamen van video's an 't einde van de joarn 2000 en 't begun van de joarn 2010 droeg by an e verôogde toegankelikheid en populariteit van speedrunning. In 2005 makte d' iprichtienge van YouTube 't meugelik vo speedrunners om video's van speedruns t' uploadn en te dêeln, en strategieën te bespreekn ip de internetforums van SDA.[5] Twitch, e livestreamwebsite speciaal vo computerspeln, wierd gelanceerd in 2011. De komst van livestreaming zörgde vo een makkelikere verificoatie en bewoarienge van speedruns, en sommigte speedrunners geloovn da 't verantwoordelik is vo e verschuvienge noar soamenwerkienge tusschn leedn van de gemêenschap.[5] In 2014 wierd Speedrun.com ipgericht, dat e stik mindere strenge richtlynn vo inzendietiengn ad dan SDA en bedoeld was om speedrun-leaderboards vo vele verschillige speln te centraliseern. De verschuvienge van speedrunners noar 't gebruuk van Speedrun.com en sociale mediaplatformn lik Skype en Discord droeg by an 't ofneemn van de relevantie van SDA in de joarn 2010.[5] Verschillige programma's wierdn gemakt om te helpn by 't speedrunnen, lik speedrun-timers die den uudign en beste tyd van de stikkn van 't spel tôogn, de twêe vergelykn en de verschilln markeern.[11]

Methodologie

[bewerkn | brontekst bewerken]

Gameplay-strategieën

[bewerkn | brontekst bewerken]
Speedrunners viendn dikkers oungewone routes die tyd bespoarn.

Routing is e fundamenteel proces in speedrunning.[12][13] Routing is 't ountwikkeln van een optimoale reekse van acties en fasen in e computerspel. E route kan inoudn da êen of mêerdere belangryke vôorwerpn of stikkn wordn overgesleegn. 't Oversloan van e stik van e computerspel da normoal nôdig is vo vodder te groakn, wordt sequence breaking genoemd,[13] e term die vo d' êeste kêer wierd gebruukt in verband me 't actie-avontuurnspel Metroid Prime uut 2002.[5] Computerspel-glitches kunn gebruukt wordn om sequence breaks te bereikn,[13] of ze kunn gebruukt wordn vo andere doeln lik 't oversloan van cutscenes en 't verôogn van de snelheid of de schoade van de speler.[5][14] Sommigte menschn, "glitch-hunters" genoemd, kiezn derveurn om under te focussn ip 't viendn van glitches die nuttig goan zyn vo speedrunners.[15] In sommigte speln zyn willekeurige code-uutvoeriengn (arbitrary code execution) meugelik, woardeure da spelers under eign code in 't geheugen van 't spel kunn schryvn. Verschillige speedruns gebruukn een "credits warp", een sôorte glitch die d' aftitelienge van 't spel direct lat begunn, wa da willekeurige code-uutvoerienge kan vereisn.[16][17][18] 't Gebruuk van glitches en sequence breaks wierd in 't verleedn ounder de regels van de vroege leaderboards van Twin Galaxies nie toegeloatn. Otn speedrunning wegtrok van Twin Galaxies noar ounoafhankelikke leaderboards online, wierd under gebruuk assan moar gewuuner.[7][19]

Tool-assisted speedruns

[bewerkn | brontekst bewerken]

Hoofdartikel: Tool-assisted speedrun

E vôorbeeld van e tool-assisted speedrun invoerbestand, dat toogt wukke knoppn ip wuk moment in de reekse ingedrukt wordn.

E tool-assisted speedrun (TAS) is e speedrun die gebruuk makt van emuloatiesoftware en instrumentn om e "theoretisch perfecte playthrough" te moakn.[7] Volgens TASVideos zyn veelvôorkomende vôorbeeldn van instrumentn: 't spel frame per frame vodder loatn goan om 't spel preciezer te speeln, stikkn van de run ipnieuw probeern met behulpe van savestates, en hex-editing.[20] Die instrumentn zyn ountworpn om de beperkiengn van menselikke reflexn weg t' oaln en optimoale gameplay meugelik te moakn.[21][22] De run wordt ipgenoomn lik e reekse van controller-invoern die bedoeld zyn om ip volgorde were an 't spel gevoed te wordn.[5] Olwel da 't over 't algemêen ip een emulator wordt ipgenoomn, kunn TAS'en ook ip d' originele consolehardware afgespeeld wordn deur invoern noar de controllerpoortn van de console te zendn, e proces da consoleverificoatie wordt genoemd (omda sommigte exploits meugelik zyn ip emuloatie moar nie ip e console).[23][24] Om ze te ounderscheidn van tool-assisted speedruns, wordn speedruns zounder hulpe somtyds real-time attack (RTA) speedruns genoemd. Omdat er gin mens 't spel in realtime speelt, wordn TAS'en nie lik concurrentie vo RTA-speedruns anzien.[5]

Categorieën en rangschikkienge

[bewerkn | brontekst bewerken]

Speedruns wordn ounderverdêeld in verschillige categorieën die extra beperkiengn ipleggn an e loper. 't Is gebruukelik da categoriebeperkiengn vereisn dat e bepoalde oeveelheid content in 't spel wordt voltooid.[5] Ieder computerspel kan zyn eign speedrun-categorieën en, moar sommigte categorieën zyn populair, oungeacht 't spel.[7] De mêest vôorkomende zyn:

  • Any%, wa da bybedoelt da je zo zêre of meugelik 't einde moe bereikn zounder kwalificoatie,[5][25]
  • 100%, wa da de volledige voltooiienge van e spel vereist. Da kan inoudn da je ol de vôorwerpn moe verzoameln of e bepoalde andere metriek moe gebruukn.[5][25]
  • Low%, 't teegnovergestelde van 100%, wa da vereist da de speler 't spel uutspeelt binst dat em de minimum oeveelheid meugelik voltooid.[5][25]
  • Glitchless, wa da de speler verbiedt om binst de speedrun glitches uut te voern.[13][7]
  • No Major Glitches, wa bestoat uut 't zo rap meugelik uutspeeln van 't spel zounder "game breaking" glitches te gebruukn.

Speedrunners competeren in die categorieën deur tydn ip online scorebordn (leaderboards) te rangschikkn.[5] Volgens Wired is de absolute topwebsite vo speedrun-leaderboards Speedrun.com. Vanaf juli 2021 host de site leaderboards vo mêer of 20.000 computerspeln.[26] Lopers neemn over 't algemêen beeldmaterioal van under speedruns ip vo nauwkeurige tydsmetienge en verificoatie, en ze kunn e timer in under video's steekn. Ze gebruukn dikkers timers die de "splits" byhoudn — den tyd tusschn de start van de run en 't ofwerk'n van e bepoald stik of doel.[5] Verificoatie wordt mêestal gedoan deur leaderboard-moderators die inzendietiengn bekiekn en de geldigheid van individuele speedruns bepoaln.[11]

Gemêenschap

[bewerkn | brontekst bewerken]
Twêe speedrunners speeln The Legend of Zelda: Ocarina of Time ip Mang'Azur 2013

Volgens vele speedrunners is de gemêenschap e belangryk aspect van de hobby. Matt Merkle, directeur operoaties by Games Done Quick, zegt da speedrunners "de soamenwerkienge weirdêern die de gemêenschap anmoedigt,"[15] en vele speedrunners en gezeid da under mentoale gezoendheid is verbeterd deur under betrokknheid by de gemêenschap.[26] Erica Lenti, schryvend vo Wired, zei dat e gemêenschapsgevoel cruciaal is vo speedrunning omdat et spelers motiveert en helpt by d' ountwikkelienge van routes en truucs die in speedruns gebruukt wordn,[26] en Milan Jacevic benoadrukte "joarn van ounderzoek" en gezamenlikke inspanningn van de gemêenschap die bydroagn an weireldrecords.[27]

Speedrunners gebruukn mediasites lik YouTube en Twitch om video's en livestreams van speedruns te dêeln.[11] De speedrunning-gemêenschap is ounderverdêeld in vele subgemêenschappn die gericht zyn ip 't speedrunnen van specifieke speln. Die subgemêenschappn kunn under eign ounoafhankelikke leaderboards vormn en over under speln communiceern via Discord.[5][11] Vele gemêenschappn gebruukn de gecentraliseerde leaderboard-hosting site Speedrun.com sedert d' iprichtienge dervan in 2014.[5]

Marathons

[bewerkn | brontekst bewerken]

Zie ôok: Games Done Quick en European Speedrunner Assembly

Speedrunning-marathons, e vorm van e gamebeurze,[11] toogn e reekse van speedruns deur mêerdere speedrunners. Binst da der weireldwyd vele marathons wordn g'houden,[28] is 't grotste evenement Games Done Quick (GDQ), een olfjoarlikse marathon in de Verênigde Stoatn.[29] Vanaf januoari 2022 en ze ol mêer of $37 miljoen vo goeie doeln ingezoameld sedert 't begun in 2010.[30] De grotste marathon in Europa is d' European Speedrunner Assembly, g'houden in Zweedn. Beide evenementn zendn de speedruns uut ip Twitch en zoameln geld in vo verschillige goede doeln.[4] Speedruns ip marathons wordn in êen pogienge gedoan en wordn vele vôorzien van commentoar.[5] Vele menschn anzien marathons ols belangryk vo lopers en toeschouwers in de speedrun-gemêenschap. Peter Marsh, schryvend vo den Australian Broadcasting Corporation, zegt da de Games Done Quick-evenementn een inclusieve plekke biedn vo vrouwn en de LGBTQ-gemêenschap, in teegnstellienge toet d' anverwante cultuurn van gaming en Twitch-streaming.[31] Alex Miller van Wired zegt da d' evenementn e belangryke rolle en gespeeld in 't verbindn van menschn en 't oundersteunn van d' internationale humanitaire organisoatie Artsen zonder Grenzen (Médecins Sans Frontières) binst de COVID-19-pandemie.[32]

Speedrun races

[bewerkn | brontekst bewerken]

Races tusschn twêe of mêer speedrunners zyn e vele vôorkomend wedstrydformoat. 't Vereist da spelers goed zyn in 't herstelln van teegnslagen binst e speedrun, omda ze nie ipnieuw kunn begunn.[7] Af en toe wordn der races g'houden ip marathons; e 4-spelers Super Metroid-race is e populair en weerekêrend evenement ip Games Done Quick marathons.[5] De Global Speedrun Association (GSA) et head-to-head toernooien georganiseerd vo mêerdere speln, woarounder Celeste, Super Mario 64 en Super Mario Odyssey. In 2019 organiseerde GSA e fysiek speedrun-race-evenement genaamd PACE. Under inspanningn en kritiek gekreegn van sommigte speedrunners die geloovn da ze "de gemêenschapsgeest oundermynen", woaby da ze pryzengeld citeern ols incentives om soamenwerkienge me andere speedrunners te vermydn en speln zounder pryzengeld te negeern.[33] Computerspel-randomizers — ROM-hacks die de locaties van vôorwerpn en andere in-game content willekeurig deur mekoar schuddn — zyn ook populair vo speedrun-wedstryden. Toernooien en andere evenementn zyn georganiseerd vo randomizer races, en ze zyn vertoogd ip speedrun-marathons.[34]

Valsspeln (Cheating)

[bewerkn | brontekst bewerken]

Zie ôok: Valsspeln in computerspeln

Methodes

[bewerkn | brontekst bewerken]

Splicing

[bewerkn | brontekst bewerken]

Splicing (an mekoar plakkn) is veruut de mêest populaire maniere van valsspeln by speedrunning.[35][36] Ierby wordt e speedrun nie constant ipgenoomn lik of dat et normoal moet zyn, moar wordt 't soamengesteld uut verschillige videofragmentn die ip verschillige momentn zyn ipgenoomn, somtyds me gameplay die gestooln is van TAS-moakers of legitieme spelers.[35]

Ip SGDQ 2019 gebruukte speedrunner "ConnorAce" e gesplicete run om ounrechtmoatig 't weireldrecord ip Clustertruck te claimn vo de "NoAbility%"-categorie, woardeure dat de legitieme recordhouder dervan wierd weerehouden om vo 't evenement uutgenodigd te wordn. De run wierd met achterdocht behandeld omda 't nie officieel wierd ingediend by Speedrun.com, binst dat de video verborgen stound ip YouTube vôorn de acceptoatie van ConnorAce by SGDQ. In oktober 2019 wierd de run van ConnorAce ountmaskerd deur YouTube-documentoairemoaker Apollo Legend.[37]

In e typisch geval lat splicing 't toe om moeilike stikkn toet in de perfectie t' herhoaln en ze doarachter toet êen lijkend deurloopnd gehêel an mekoar te monteern, wa da somtyds d' oeveelheid tyd die nôdig is om e vergelikboare score te grindn (haaln), serieus kan vermindern.[36] E gesplicete run wordt echter nie lik valsspeln anzien ost et by d' inzendienge wierd angekondigd ols een multi-segment run; een vôorbeeld is deze multi-segment compiloatie vo Super Mario Bros., gemakt deur de gemêenschap.

TASbotting

[bewerkn | brontekst bewerken]

By 'TASbotting' nimt de speler zyn controller-invoern ip lik e tool-assisted run in een extern toesteh, om da toestel loater d' invoern te loatn herhoaln ip een echte console.[36] Juuste lik by splicing kunn d' invoern van individuele stikkn gekombineerd wordn en, lik of dat gebruukelik is vo tool-assisted runs, kunn d' invoern frame per frame wordn gemakt. Zolange da die invoern authentiek zyn en realistisch lykn vo e mens, zyn zukke manipuloaties in 't final videoproduct vele moeiliker t' ontdekkn of splicing.[36] Ast e TAS an den anderen kant nie wordt uutgegeevn ip d' originele hardware moar, lik ols geweunlik, ip emulators, kan 't somtyds uut de resulteerende video beweerd wordn da zukke hulpprogramma's wierdn gebruukt; doaboovnip imiteern sommigte emulators de gewenste hardware nôoit hêlegans perfect, wa da synchronisoatieprobleemn kan verôorzaakn by 't afspeeln ip e console.[36]

Den timer of afspeelsnelheid anpassn

[bewerkn | brontekst bewerken]

't Anpassn van in-game timers, surtout by pc-speln, is een andere vele vôorkomende maniere om de ipgenoomn tydn te verbetern. Da is wel e stief ipvallende manipuloatie, surtout in stief competitieve omgeviengn, omda de speedruns in 't ôogste stik van scorebordn herhaaldelik geanalyseerd wordn deur andere spelers om under legitimiteit en afspeelboarheid te controleern, inclusief e tydscontrole die gekend stoat lik "retiming". Da briengt vele verschilln an 't licht tusschn de ipnoametyd van êentwien en e speedrun in de leaderboards.[36]

Een andere maniere, een varioatie van splicing, omvat 't versnelln van cutscenes of 't comprimeern van zwarte schoarmn tusschn transities. Opnieuw is 't woarschynlik da zulke manieren deur e speedrun-moderator ountdekt wordn, ol kunn sommigte speln, zeker woar de snelheid van de pc invloed kan hen, effectief variëren afhankelik van de hardware.

Ten slotte is een andere vele vôorkomende maniere van valsspeln 't speeln van 't spel met frame-per-frame vôoruutgang of in slow motion. Da is gelykoardig an normoale tool-assisted speedrunning moar zounder de meugelikheid om invoern ipnieuw te doen. Speeln in slow motion is vele effectief vo speln die stief precieze bewegiengn vereisn.

Anpassn van in-game bestandn

[bewerkn | brontekst bewerken]

Olwel dat 't vele meugelik is om traditionele cheats lik e GameShark te gebruukn om de snelheid, de kracht, de gezoendheid enz. van e karakter te verôogn, zyn zukke cheats over 't algemêen redelik makkelik t' ontdekkn deur een ervoarn moderator, zelfs ot 't subtiel wordt toegepast. Echter kan de manipuloatie van interne bestandn om de RNG (Random Number Generation) te verbetern vele moeiliker t' ontdekkn zyn.

Êen van de mêest beruchte vôorbeeldn van bestandsmanipuloatie woarn verschillige valse runs van de speedrunner Dream in 2020. Zyn geluk wierd anzien lik zodanig extreem in e reekse van Minecraft-speedruns dat et uuterst ounwoarschynlik wierd geacht da da zounder valsspeln gebeurd was (met e kanse van oungeveer 1 ip 20 sextiljoen, lik ofgeschat deur Matt Parker van Numberphile). Da wierd bevestigd deur zowel de moderators ip Speedrun.com lik verschillige YouTubers, lik Karl Jobst en Matt Parker, van wien under video's over Dream teegn januoari 2024 tegoare respectievelik 5,7 miljoen en 6,5 miljoen kêers bekeekn woarn.[38][39][40][41][42][43] Dream gaf round vuuf moandn loater toe dat zyn runs vals woarn achter da ze woarn geweigerd, ol beweerde hy dat em nie wist dat em een angepaste versie van 't spel gebruukte.[44][45][40] Bykan twêe joar loater wierd de speler die meehielp an 't ontdekkn van Dream zyn valse runs, MinecrAvenger, in d'n helft van 2022 ook betrapt ip 't gebruuk van vergelykboare geluksmanipuloatie.[46]

Liehn over tydn

[bewerkn | brontekst bewerken]

Binst da ol de vôornoemde methodes misleidend van oard zyn, is de simpelste maniere van valsspeln nateurlik geweune liehn over e tyd. Êen van de mêest beruchte gevolln doavan was da van Todd Rogers. Verschillige van zyn records zyn kritisch bekeekn omda ze schynboar ounmeugelik woarn of omda der tewinnig bewys was. In 2002 annuleerde Robert Mruczek, ton ôofdscheidsrechter by Twin Galaxies, officieel Todd zyn recordtyd in Barnstorming achter dat andere spelers ipmerktn da zyn tyd van 32,04 secondn ounmeugelik leek, zelfs os 't spel gehackt wierd om ol d' obstakels weg t' oaln. Achter vodder ounderzoek kostn de scheidsrechters van Twin Galaxies gin ounoafhankelikke verificoatie vo die tyd viendn, en bleek da ze in de plekke doarvan gesteund adn ip foute informoatie van Activision.[47][48]

Lik vermeld ip 't leaderboard van Twin Galaxies toet januoari 2018, was Rogers zyn record in 't Activision-spel Dragster uut 1980 e tyd van 5,51 secondn uut 1982.[49] In dien tyd verifieerde Activision ôogste scores via e polaroidfoto.[50] Volgens Rogers wierd em, achter dat em e foto van die tyd ad ipgestuurd, gebeld deur Activision. Ze vroegn em om te verifiëren oe dat em zo'n score ad behaald, omda zynder e 'perfecte run' van 't spel adn geprogrammeerd en gin betere tyd kostn hoaln of 5,54.[51] De programmeur van 't spel, David Crane, bevestigde loater dat em een voage herinnering ad an 't programmeern van testruns, moar herinnerde zyn eign de resultoatn nie mêer.[50] In 2012 krêeg Todd e Guinness World Record vo 't langst stoande computerspelrecord, vo zyn Dragster-record uut 1982.[52] In 2017 ontleedde e speedrunner die Eric "Omnigamer" Koziel noemde de code van 't spel en kwam toet de conclusie da de rapst meugelikke tyd 5,57 secondn was. Met een tick rate van 0,03 secondn is de geclaimde recordtyd twêe ticks rapper of de data van Omnigamer en êen tick rapper of de gerapporteerde 'perfecte run' van Activision.[53]

Cheat-detectie

[bewerkn | brontekst bewerken]

Om de mêeste van die methodes te vôorkommn, vereisn sommigte speln e video van d' handn ip de controller of 't toetsenbord ("handcam"), boovnip d' opnoame van 't scherm, zoda spel-specifieke moderators die de verantwoordelikheid hen om een inzendienge t' authenticeren, zekers kunn zyn da d' invoern echt gedoan wordn in de angegeevn combinoatie en deur e mens.[54] Andere methodes omvattn forensische audio-analyse, wa da e vele vôorkomende maniere is vo 't ontdekkn van veelzeggende têkens van videosplicing; da's de redn da speedruns zounder kwaliteit-audio-streams dikkers geweigerd wordn ip speedrun-scorebordn.[55][56][57][58]

Extra detectiemethodes zyn 't gebruuk van wiskunde (lik in de vôornoemde Dream-zoake) of menselikke moderoatie van verdachte invoern (in speln die ze ipneemn, lik Doom en TrackMania). Cheat-detectiesoftware die vo TrackMania was gemakt, wierd gebruukt om mêer of 400.000 replays t' analyseern en e handvul valsspelers t' isoleren. Da leidde toet d' ountdekkienge da bounderdn weireldrecords valsspeeldn via vertragings-instrumentn. Da was inclusief d' records van Burim "riolu" Fejza, die getêkend was by 't eSports-team Nordavind (nu gekend lik 00 Nation) vôorn dat em achter 't schandaal g'ountsloagen wierd.[59][60][61][62][63]

Zie ôok

[bewerkn | brontekst bewerken]

Referensjes

[bewerkn | brontekst bewerken]
  1. ↑ Romero, John. DOOM Guy: Life in First Person. Abrams Press (2023), p. 126–146. ISBN 978-1419758119.
  2. ↑ Paez, Danny. "Coined: How 'speedrunning' became an Olympic-level gaming competition". Inverse (10 moarte 2020).
  3. 1 2 3 4 Turner, Benjamin. "Smashing the Clock". 1Up.com (10 ogustus 2005).
  4. 1 2 Carter, Max. "A Quick History of Speedrunning: From Then to Now". ViewSonic Elite Gaming (28 juli 2018).
  5. 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 Snyder, David. Speedrunning: Interviews with the Quickest Gamers. McFarland & Company (2017). ISBN 9781476630762.
  6. ↑ Wall, Darren. "A Brief History of Speedrunning". Read-Only Memory (1 februoari 2017).
  7. 1 2 3 4 5 6 7 8 Platts, Kieren. "Keeping Up: An Introduction To Speedrunning". Redbrick (24 moarte 2020).
  8. ↑ Lenti, Erica. "Why Do Gamers Love Speedrunning So Much Anyway?". Wired (10 juli 2021).
  9. ↑ Simpkins, Jen. "Rise of the Robot". Edge (12 september 2019).
  10. ↑ "SiteHistory". TASVideos.
  11. 1 2 3 4 5 Elker, Jhaan. "Speedrunning's starting line: An intro guide to gaming's seemingly intimidating subculture". The Washington Post (13 juli 2021).
  12. ↑ Sayer, Matt. "VICE - Routers Are the Pros Who Make Speedrunning Possible". Vice.com (23 november 2016).
  13. 1 2 3 4 Groß, Matthias; Zühlke, Dietlind; Naujoks, Boris. "Automating Speedrun Routing: Overview and Vision". Applications of Evolutionary Computation. Lecture Notes in Computer Science. 13224: 471–486 (2022). DOI:10.1007/978-3-031-02462-7_30. ISBN 978-3-031-02461-0.
  14. ↑ Li, Roland. "Making money as a Zelda speed runner". Polygon (9 januoari 2014).
  15. 1 2 Muncy, Julie. "Why It's So Fascinating to Watch Videogame Speedruns". Wired (8 januoari 2016).
  16. ↑ "How Super Mario World Speedrunners Beat The Game in 40 Seconds By Writing Code With Koopa Shells". TheGamer (1 meie 2021).
  17. ↑ "Speedrunners Shatter Ocarina of Time World Record By Warping Into The Credits". Kotaku (16 januoari 2020).
  18. ↑ "Paper Mario Speedrunner Skips Straight To Credits With Help From Ocarina Of Time". GameSpot.
  19. ↑ Orland, Kyle. "How a speedrunner broke Super Mario Bros.' biggest barrier". Ars Technica (9 april 2021).
  20. ↑ "Glossary". TASVideos.
  21. ↑ "FAQ/Site". TASVideos.
  22. ↑ Degraffinried, Natalie. "Speedrunner Smashes A Computer-Assisted Super Mario Bros. Record By A Single Frame". Kotaku (1 meie 2019).
  23. ↑ Orland, Kyle. "How an emulator-fueled robot reprogrammed Super Mario World on the fly". Ars Technica (14 januoari 2014).
  24. ↑ "ConsoleVerification/Movies". TASVideos.
  25. 1 2 3 Carter, Max. "A Quick History of Speedrunning: From Then to Now". ViewSonic Elite Gaming (28 juli 2018).
  26. 1 2 3 Lenti, Erica. "Why Do Gamers Love Speedrunning So Much Anyway?". Wired (10 juli 2021).
  27. ↑ Jacevic, Milan. "A Study in Practice" (PDF). PhD Thesis, The Royal Danish Academy of Fine Arts, School of Design (2022), p. 3, 131–133.
  28. ↑ "There's An Aussie Speedrun Marathon At PAX Australia". Gizmodo Australia (22 oktober 2017).
  29. ↑ Newell, Adam. "AGDQ 2019 raised over $2.39 million for charity". Dot Esports (13 januoari 2019).
  30. ↑ Bankhurst, Adam. "Awesome Games Done Quick 2022 Sets a New Record By Raising Over $3.4 Million for Charity". IGN (16 januoari 2022).
  31. ↑ Marsh, Peter. "Awesome Games Done Quick is about two things — going really fast and raising millions for charity". ABC News (4 januoari 2020).
  32. ↑ Miller, Alex. "The Games Done Quick Marathon Is More Important Than Ever". Wired (2 juli 2021).
  33. ↑ Garst, Aron. "PACE is bringing competition and controversy to speedrunning". ESPN (24 april 2019).
  34. ↑ White, Scott. "How 'randomizers' are breathing new life into old games". Ars Technica (3 december 2019).
  35. 1 2 Frank, Allegra. "Cheating in speedrunning is easier than you'd think". Polygon (22 meie 2017).
  36. 1 2 3 4 5 6 Ars Staff. "How the scourge of cheating is changing speedrunning". Ars Technica (22 december 2019).
  37. ↑ "Summer Games Done Quick Returns to Live Events After 2 Years". PCMAG (29 juni 2022).
  38. ↑ "Dream did cheat or he's statistically luckiest person that has ever walked the planet, at least according to the Science Channel's Matt Parker". GINX (13 februoari 2021).
  39. ↑ Orland, Kyle. "After months of drama, Minecraft speedrunner Dream admits he used mods". Ars Technica (2 juni 2021).
  40. 1 2 "Dream's Cheating Confession: Uncovering The Truth". (30 juni 2021).
  41. ↑ "The Biggest Cheater In Minecraft History Was Just Exposed". (27 november 2022).
  42. ↑ "The Biggest Cheating Scandal In Speedrunning History". (31 december 2020).
  43. ↑ "How lucky is too lucky?: The Minecraft Speedrunning Dream Controversy Explained". (4 februoari 2021).
  44. ↑ Chalk, Andy. "Minecraft speedrunner Dream admits to accidentally cheating in record-setting run". PC Gamer (1 juni 2021).
  45. ↑ Michael, Cale. "Dream admits to cheating in Minecraft speedrun, claims he was unaware of illegal mod". Dot Esports (30 meie 2021).
  46. ↑ Stanton, Rich. "Minecraft world record speedrunner who exposed Dream as a cheat is exposed as a cheat". PC Gamer (1 december 2021).
  47. ↑ Robert Mruczek. "Barnstorming - Game #1 - 32.04 - What the...?!?!!". AtariAge. Page 8. #200 (17 juli 2002).
  48. ↑ Beschizza, Rob. "Video game record-setter accused of cheating". Boing Boing (24 januoari 2018).
  49. ↑ "Longest-standing videogame record". Guinness World Records.
  50. 1 2 "Dragster Designer David Crane Has No Doubts Of Todd Rogers' Record". Twin Galaxies (23 januoari 2018).
  51. ↑ "- YouTube". YouTube.
  52. ↑ "Gamers on the Edge: Meet Todd Rogers". WMOR-TV (5 meie 2017).
  53. ↑ Alexandra, Heather. "Doubt And Drama Still Haunt An Old, Seemingly Impossible Atari World Record". Kotaku (7 juli 2017).
  54. ↑ Ritchie, Stuart. "Why Are Gamers So Much Better Than Scientists at Catching Fraud?". The Atlantic (2 juli 2021).
  55. ↑ "10 Speedrunners Who Were Caught Cheating". YouTube (13 december 2017).
  56. ↑ Wright, Steven T. "How the scourge of cheating is changing speedrunning". Ars Technica (22 december 2019).
  57. ↑ Ritchie, Stuart. "Why Are Gamers So Much Better Than Scientists at Catching Fraud?". The Atlantic (2 juli 2021).
  58. ↑ "Rules - SDA Knowledge Base". kb.speeddemosarchive.com.
  59. ↑ "These DOOM Cheaters Were Caught Red Handed". YouTube (25 november 2019).
  60. ↑ "The Biggest Cheating Scandal in Trackmania History". YouTube (23 meie 2021).
  61. ↑ "Multiple Speedrunners Caught Cheating In Trackmania!". YouTube (31 meie 2021).
  62. ↑ Plunkett, Luke. "Trackmania Cheating Scandal Is Utterly Fascinating". Kotaku (25 meie 2021).
  63. ↑ Clayton, Natalie. "Cheating allegations catch up with some of Trackmania's fastest drivers". PC Gamer (25 meie 2021).

Externe koppeliengn

[bewerkn | brontekst bewerken]
Overgenomen van "https://vls.wikipedia.org/w/index.php?title=Speedrunning&oldid=325989"