Stêenstroate (Brugge)

Van Wikipedia

D' alletorre vanuut de Stêenstroate.
De Sint-Salvatorskateedroale vanuut de Stêenstroate in 1890.
De Sint-Salvatorskateedroale vanuut de Stêenstroate in 2005.

De Stêenstroate is e stroate in 't êrte van Brugge. Ze stoa bekend lik belangryke wienklstroate en is ook êen van d' oedste weegn in de Westvlamschn oofstad en zyn oemgeevienge.

Geschiednisse[bewerkn | brontekst bewerken]

De Stêenstroate is e stiksje van e weg die geschiedkundign de Zandstroate êetn. Die is geleegn ip 'n ooge zandrugge, tgêen zichboar is an de Sint-Salvatorskateedroale, vandoar ook de noame. De benoaminge "Zandstroate" bestoa nog offiesjêel in bv. de Brugsche dêelgemêente Sint-Andries en in Vassenoare.

De Zandstroate verboend OednburgEirdnburg en liep deur de dorpn Ettelgem, Jabbeke, Vassenoare en Sint-Andries, deur de stad Brugge (lanst de teegnwôordige Smeestroate, Zuudzandstroate, Stêenstroate, Grôote Mart, Burg, Oogstroate en Langestroate) en tonne deur Sinte-Kruus voddr nor Eirdnburg. Misschiens wierd die weg aa gebruukt vôo den invol van de Romeinn, en woarschynlik woarn ziedr 't die trajêkt bygewerkt ên vor e beetr bruukboare weg te krygn lik oendrdêel van tgêene bekend stoat lik de Romeinsche heirboann.

De noame "Stêenstroate" ê verzeekrs te moakn mê 't feit dat 't êen van d' êeste Brugsche stroatn was die verard wierd en van stroatstêenn verzien. 't Kan ook betêekn dat 't de stroate was die no 't 'Stêen' ip de Burg liep. Of misschiens zeifs da in die stroate (of ip de Mart) 'n êeste, nodien verdweenn, 'Stêen' stoend, veroendrstellienge die Karel de Flou dei in 1875.

Was d' ôorsproenkelikke noame verzeekrs Zandstroate, dan wierdn achtre zeekre tyd vo die stroate drie noamn gebruukt:

Zuudzandstroate : vo 't gedêelte vanaf 't Zand toe an de Sint-Salvatorskerke.
Ongepluumde Veuglstroate: vo 't gedêelte vanof de Sint-Salvatorskerke toe an 't Westvlêesuus (teegnwôordig Simon Stevinpling). De noame was ofkomstig van 'n uus mê die noame da in de stroate lag. Y verdwêen teegn 't ende van d' achtienste êewe.
Stêenstroate: vo 't gedêelte van 't Westvlêesuus toe an de Mart en, achtr 't verdwynn van 'Oengepluumde veuglstroate', ook voor da dêel.

Wienklstroate[bewerkn | brontekst bewerken]

Tegoare mê de Zuudzandstroate vormde ze de zuudlikke van de twêe assn die 't Zand met de Grôote Mart verbienn. De nôordelikke is de Nôordzandstroate/Geldmuntstroate. De twêe assn zyn de dag van vandoage de belangrykste wienklstroatn in de binnestad van Brugge. De Stêenstroate lopt oovre twêe derdn van die zuudlikke asse en begunt, kommnde van 't Zand, ter ogte van de kateedroale en moendt uut ip de Grôote Mart. Zy wordt lik êen van de belangrykste wienkelstroatn in België anzien en wordt mêesta in êen oasm genoamd mê de Brusselsche Niewstroate, den Antwerpsche Meir en de Gentsche Veldstroate. Lik in die steedn is de Stêenstroate, mê de Zuudzandstroate, de stroate woa de wienklkeetns undre in Brugge by vôorkeure vestign.

E bitje voddr kykn[bewerkn | brontekst bewerken]

  • (fr) Verschelde, Karel 1875 : Etude sur les noms des rues et des maisons de la ville de Bruges, in: Handelingen van het Genootschap voor Geschiedenis, Brugge.
  • (fr) Duclos, Adolphe 1910 : Bruges, histoire et souvenirs, Brugge.
  • (nl) Michiels, Guillaume 1958 : Historische schets en iconographie van de Steen- en Zuidzandstraat en het Simon Stevinplein, Brugge.
  • (nl) Schouteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
  • (nl) Beernaert, Brigitte e. a. 1997 : Steenstraat 38-40, Ambachtshuizen van de timmerlieden en de schoenmakers, in : Monumenten en arbeid. Open Monumentendagen Brugge 1997, Brugge.
  • (nl) Beernart, Brigitte 2005 : Steenstraat 38-40, Ambachtshuizen van de timmerlieden en de schoenmakers, in : Monument en hout, Open monumentendagen Brugge 2005, Brugge.
  • (nl) Debrabandere, Frans 2012 : Brugse plaatsnamen, in: Brugge die Scone, blz. 48.
Wikimedia Commons