Wikipedia:Twidde Gebrukersbyêenkomste

Van Wikipedia
Naar navigatie springen Naar zoeken springen
De (mêeste) anwezign ip de twidde gebrukersbyêenkomste: van links noa rechts: D-rex, Patrick, Filibertus, Tbc en Jonas

De Twidde Gebrukersbyêenkomste es deure gegoan up vrydag den neegs'n moarte 2007.

Bedoelienge[brontekst bewerken]

Gelyk ip iedere byêenkomste, wos de bedoelienge van deze byêenkomste vôorol om de 'nieuwe' minsn te lêern kenn. De pogieng'n om het Nôord'n mêer te betrekk'n by de wiki ein duudelyk udder vrucht'n ofgeworp'n, want het Nôord'n wos goe verteegnwoordigd deur Filibertus, Jonas en Zeisterre. 't Gift de dêelnemers de gelegeneid om elkoar beter te lêern kenn, en elkoars interesses en gevoeligheedn te lêern appreciêern.

Doarnoast wos't de bedoelienge om een poar discussiepunt'n van het SV te bespreek'n.

Plekke en tyd van de byeenkomste[brontekst bewerken]

W'èn dizze kee ofgesprook'n in e babbelcafé me ne symbolische noame De Groote Stooringe (zie kartje) up et Sint-Michielspling van Roeseloare. D'uutnodigienge stoat ier.

Wien ester ofgekommn[brontekst bewerken]

D'upkomste wos fenomenoal: twêe kêes zo vele lyk de vôrige kêe (stoan de kapkes goed D-rex?). De Groote Stooringe (me moet'n die gast'n olliek ne kee serieus SV leern schryvn) wist nie woa dan ze't add'n: moa liefst zes enthousiaste fanoat'n van d'n West-Vlamschn Wikipedia die ne heeln oavond over under dialect en d'inrichtiege van under web site zoat'n te kwebbeln. En d'r ad d'r ene woarempel eurn vint nog mègepakt ook, en dien kwam nog goed van passe want m'èn nog gin Roeseloarsche gebrukers.

Woarn present: D-rex, Filibertus, Jonas, Patrick, Tbc, Zeisterre + eur ne vint.

Lyk da je ziet, 50 % kwam uut 't noord'n van de provinsje, wien a da gepeisd zeg. De zudelyke addn 't nie oessan gemakkelyk voo die gast'n goed te verstoan. Moa gauw, me zyn d'r uuteindelyk toch uutgerocht.

Agenda[brontekst bewerken]

Regionoal Patrôon[brontekst bewerken]

Up verschillende discuusjebladzyd'n bleek dat er nogol wa vroagn woarn over da regionoal patrôon.

Versus SV[brontekst bewerken]

Gif et regionoal patrôon lyk {{plat|Brugs}} an schryvers carte blanche vo de SV-spellienge lienks te loat'n liggen? Die discuusje wos idder gestart up Discuusje_gebruker:D-rex#SV_versus_regionale_template.

Bykan olleman vond da j'up e blad mè et streektoalpatrôon je gin SV moe volgn. Dat es juste d'enigste occoazje woa da je joen eigen dialect elegansn tot zyn recht kut loat'n komm'n. 't Es wel wienschelyk da 't SV gebruukt es up de streektoalbloadn, moa ge zyt vry vo da wel of nie te doen.

Gebruuk[brontekst bewerken]

Voorstel:

  • osan by steed'n en gemeent'n
  • vo olle andere artikels zy je vry in 't gebruuk
  • oeter twyfel es over wel of gin toepassienge van 't patrôon, osan eest up et discuusjeblad d'rover babbeln mè 'n auteur van 't artikel. Kwestje van nie te kort te zyn in 'n ommegank mè d'andere gebrukers.

SV-y[brontekst bewerken]

Sommigste vondn dat SV-y nie van toepassienge zoe moet'n zyn up de finale ie, dus: brouwerie, partie, gie, mie.

Want die ie es osan lyk 'ie' uutgespook'n, over de uutsproake es d'r dus gin twyfel meugelyk.


SV: finale -en + glottisslag[brontekst bewerken]

D'r èt nogol gediscussieerd gewist over de spellienge van finoale -en en 't gebruuk van de glottisslag. Uutendelyk kost'n m'uus ollemoale erkenn in e voorstel van Tbc:

  • Olgemene regel: doffe e wegloat'n
    • leezn, spriengn, volln (AN lezen, springen, vallen)
    • ook: bindn, ondn, verzendn, oudn (AN binden, honden, verzenden, houden)
  • Uutzonderiengn:
    • werkwoordn woavan de stam endigt op p,t,k: doffe e vervangn deur glottisslag: klapp'n, buut'n, drukk'n (AN klappen, buiten, drukken)
    • wordn die in 't AN endigen up -(n)nen: ollene -nn overoudn, lyk in: binn, weunn, keunn, kenn (AN binnen, wonen, kunnen, kennen)

De motivoasje vo bindn, ondn... te schryvn es da we gin glottisslag oorn, dus schryvn m'em ook nie (de latste lettergrepe spreek'n de meeste om zeggens elegansn nie mè uut), moa toch 'dn' overoud'n vo 't leesboar 't oudn.

SV-ei[brontekst bewerken]

Kort[brontekst bewerken]

Nogol wa gebrukers vondn de spellienge ik ei, mei, ein (AN ik heb, met, hebben) nie dudelyk. Surtout by de gast'n dien dat anders uutspreek'n want zyders peinzn da't e tweeklank es.

't Voorstel wos vo ier de Fransche letter è te schryvn (lyk Fr. élève), wuk da overeenkomt mè die uutsproake: ik è, mè, èn.

Lank[brontekst bewerken]

Woord'n lyk AN paard, staart, hebben, graag: oe ommegoan mè de streekafankelyke uutsproake?

  • zudelyk; pèèrd, stèèrt, èèn
  • noordelyk: pêêrd, stêêrt, èèn → de êê stoat ier vo de e in pet moa lank uutgesprook'n

Moe oe goan me da schryvn? D'r zyn twee voorstelln gewist.

  1. we schryvn ollemoale peerd, steert, geerne (klankneutroale spellienge)
  2. we schryvn lyk of da m'et uutspreek'n:
noordelyk: pêêrd, die êê stoat vo de e in pet moa lank uutgesprook'n
zudelyk: peird of pèèrd ??

Ook woord'n lyk zee, een (getal 1) volln binn die categorie.
Wuk doen me mè greit'n, bleit'n? Best de ei oudn?

Die discuusje es nie mè en dudelyk voorstel geëindigd.

Finale -ing[brontekst bewerken]

De SV-spellienge es nie echt en probleem: keunienk, veranderienge.


Finale -tie[brontekst bewerken]

D'uutsproak'n verschilln nogol:

  • conversoatie of conversoasje?
  • traditie of tradisje?

Me vondn da de SV-regel (osan -tie schryvn) nog 't best van ol es.
In artikels mè e regionoal patrôon meug je vaneigens wel schryvn lyk of da j'et uutsprikt.

Diftongering ee en Diftongering oo[brontekst bewerken]

Ook ier verschilln in uutsproake:

  • ook, oge, klene, zee (AN ook, oog, klein, zee)
  • wok, woge, kljene, zjee/zjèè/zèè

D-rex vond da je osan da kapke moe zett'n. Wien da gin tweeklank oort, moe ton moa gin uutspreek'n.

't Probleem es ollene da je nie up olle ee's en oo's zuk kapke meugt zett'n (veel moe blykboar gin kapke èn). Voor gastn die gin tweeklank oorn, es da dus niet te doene zonder te missn.

Ook ier vond'n me de SV-regel (zet e kapke oe j't oort en anders nie) nog 't best van ol.

Eigennoamn[brontekst bewerken]

SV zegt nu: persoonsnoamn nie verwestvlamsn.

De meeste vond'n da me doa nie te strieng meugn in zyn: Koarel d'n Stout'n, Boudewyn van Vloandern moe kunn.

Me moet'n wel nie overdryvn, concreet: bynoamn meug je niet deur andere woord'n goan vervangn.
Dus gin Koarel de Kletse, Koarel n' Kletsekop, Koarel de Pleite of zukke toestand'n, moa meug wel: Koarel d'n Koaln.

Da verwestvlamsn es gin verplichtienge, moa zoe wel moet'n kunn.

-lyk of lik?[brontekst bewerken]

Oe schryvn me 't achtervoegsel -lijk: lyk lyk of lyk lik?
Zie Discuusje_gebruker:Foroa#-lyk_in_SV_1.1a

D'r wos bykan niemand te vindn vo -lik te schryvn, kwestje van consequent te bluuvn en 't nie onnodig te compliceern.


Gebrukersportoal[brontekst bewerken]

Tbc stelt voorn vo e gebrukersportoal te begunn lyk da olle serieuze wiki's ol èn.

Da gebrukersportoal kut goan over:

  • overzicht en gebruuk van (meest courante) patrôonn
  • lyste van de moderatoorn, sysops...
  • lyste mè peiliengn dien an 't loop'n zyn
  • lyste mè gebrukers en under erkomste
  • overzicht van de bereikte mylpoaln (wuk es 't schoo Vlams word eigentlyk?)
  • vaste rubriek'n lyk: trekzakartikel van de weke woaby da olleman uutgenodigd es om zyn leenn te zett'n achtern en onnozel artikeltje vo d'r etwod schoons van te moak'n. En lat uus eerlyk zyn: d'r zyn nog genoeg trekzakartikels up uuzn wiki.

De vroage wos ollene: wien kut/wil an da portoal begunn?

Me woarn ollemoale van 't gedacht da Tbc da styf goed zoe kunn :-)


Deureverwyzingn die nie in 't SV zyn[brontekst bewerken]

Oed'n of wegsmyt'n?

Wuk moet er gebeurn oe ne toevallige surfer up internet, die uuzn wiki andoet, intikt: Izegem, Kortrik, Iper...

Dat es ginne SV-spellienge, die artikels noemn nu Yzegem, Kortryk, Yper. Moa wien wit er da?

Tbc vindt da we nie te strieng meugn zyn en ook deurverwyziengn moet'n toeloat'n (en voorziene) die meer kanse moak'n vo ingetikt te zyn dan de SV-variant.

Moa we verstoan ook d'upmerkienge van Foroa (up discuusjebloadn) da we gin verkeerde spellienge meugn ankweek'n. Die extra deurverwyziengn moet'n dus binn de perk'n bluuvn.

Recloame[brontekst bewerken]

De latste moand'n èn me styf vele andacht gekreegn. M'èn ol mêer of vieroenderd gebrukers, moa oe keun je da nog veroogn?

Volgens D-rex moet'n me d'r rekenienge mè oudn dat et de komende tyd wel ne kee stiller zoedt kunn zyn up uuzn wiki. In e joar tyd meer of 1300 artikels, dat es gin kleen bier. We moet'n uus realiseern dat we verzekers niet zo goan keun bluuvn groein.

Dat es nie meer dan normoal, olle wiki's èn ofwisselend goeie maand'n en kalmere periodes.

Varia[brontekst bewerken]

Peiliengn[brontekst bewerken]

Tbc vroeg om d'r up te lett'n da me by peiliengn in 't vervolg d'r osan by zeggn:

  • wanneer da de peilienge juste stopt
  • oeveel gebrukers d'r minstens e menienge moet'n gegeevn èn vo geldig te zyn
  • oeveel % van die gebrukers vo en alternatief moe gekoozn èn vooraleer da voorstel anveird gerakt

Typische West-Vlamsche spreekgewent'n[brontekst bewerken]

Da zoe meer moet'n gedocumenteerd zyn. En poar voorbeeld'n:

  • dubbel gebruuk van 't persoonlyk voornamwoord: è je gy my geziene? me weet'n wyder da nie, ge zyt gy zeker zot?
  • dubbele negoasje:'k è da nog nooi nie g'oord
  • dubbel negoasje (bis): Ik en en dat nog nôois ezeid
  • dubbel negoasje (tris): Ge moet nie sloan nie Sterk anwezig in Oarelbeke#Toale en er bitje gedocumenteerd.

Meschiens etwodde vo in de grammatica's?

Nieuweliengn en SV[brontekst bewerken]

Nieuweliengn zyn nogol schuw van de uutgebreide SV-regels woa da't voorblad noa verwyst. 't Voorstel wos ier:

  • om under dudelyk te moak'n dan ze fout'n meugn schryvn
  • om up 't voroblad en up 't Ulp-blad nie mè direct na de lange beschryvienge van 't SV te verwyzn, moa wel na de soamnvattienge


Ofsluutienge[brontekst bewerken]

De doagn en week'n die kommn goan me die voorstelln an d'andere gebrukers presenteern. Zo keunn ze zyder ook under gedacht zeggn. Wuk dan ze vaneigens nu ol kun up et discuusjeblad.

W'addn nen vulln agenda, moa m'èn em nog keun ofrond'n ook. Da wos nie osan styf gemakkelyk want die pint'n bleevn moa kommn, 't wos soms moeilyk vo te volgn. Rond 'n enen èn me nog e slapmutske gepakt, en vondn toen dat tyd wos vo de boek'n te sluut'n.

En me goengn ollomoale akkoord mei d'upmerkienge van D-rex: up na de 2500 !!!

Verdimme ogliek[brontekst bewerken]

'k En etwot emist enni! 't I mo t'oopn dakke der de noaste kê wel kun by zyn, mo ke zyn betoald voe me werk te doen en nie voen over 'n West-Vlamschn wikipedia te koutn. Spytig vaneigens (ol doe'ke me werk wel stief geirn wi ;)). Proficiat met junder werk, 'k gon't toene ollemoale ekir up me gemak bekykn en men upmerkiengn deure geevn. Meuzel