Athanasius van Alexandrië

Van Wikipedia
Ga naar: Begunplekkn, zoeken
Athanasius van Alexandrië

Athanasius (Grieks: Ἀθανάσιος, Athanásios) (Alexandrië, ungevir 295 - Alexandrië, 2 meie 373) was patriarch van Alexandrië, kerkvoader en wordt verêerd os hillign dur de mêeste christelikke denominoaties die hillign erkennn. Zyn fêestdag is in d'Orthodoxe Kerke ip 18 januoari, in de Rooms-katholieke Kerke ip 2 meie en in de Koptisch-orthodoxe Kerke ip 15 meie.

Je makte nog de vrêe christenvervolgiengn oender de keizers Diocletianus en Galerius mee. Ip 8 juni 328 wierd je toet ipvolger van patriarch Alexander gewyd, die tjie os secretoaris ip 't Concilie van Nicea haad bygestoan. Je was e bestryder van 't arianisme, omdat tje deur 't Concilie verordild was voe ketterye.

Volgns Athanasius is d'herscheppienge van de mens allêne reël os zyn verlosser woarlik God is. Je wierd 'Voader van de rechtzinnigheid' genoemd omdat tje me grôote vastoudendeid de kettersche lêerstelliengn van Arius probirde te weerleggn.

Vuuf kirs wierd je gedwoengn in balliengschap te goan, in totoal twientig joar. J'oenderield goeie betrekkiengn mé monniken, wiens ideoalen dat je beschreef in 't Leven van Antonius. Deur de Rooms-katholieke kerke wierd je loater hillig verkloard en toet kerkvoader verheevn. J'is êen van de vier belangrykste kerkevoaders van d'Orthodoxe Kerke en wordt dorom 'Athanasius de Grôotn' genoemd.

In 't verleedn wierd de Geloofsbelydenisse van Athanasius, die em ook teegn 't arianisme kirt, an em toegeschreeven, mo woarschynlik is tje toch nie den oteur dervan. Athanasius schreef wel de Verlêediengn in de Woestyne, 't leevn van den hilligen Antonius. Oak zyn vil van zyn geschriftn teegn Arius bewoard gebleevn. J'hield contact met de gelovign deur zyn Poasbrievn, waarin dat je oender andere informirde wanneer Poasn gevierd zoe wordn.

In 365 kirde tjie weere van zyn latste balliengschap. In 367 schreef tje zyn Poasbrief van da joar, waarin datje t'ie ols êerste e lyste ipgaf van de 27 nog oltyd gangboare boekn van 't Nieuw Testament, de Canonvormienge van 't Nieuw Testament woamee dat de christelikke Bybel ur huudige vorm kreeg, oloewel dat er over 't boek Openboaringn nog een antoal eeuwn wierd gediscutird. In 373 stierf 't y.

Wikimedia Commons

Externe links[bewerkn | brontekst bewerken]