Bevergem
Bevergem is e televisjereekse, eregisseerd deur Gilles Coulier. De reekse droait round Freddy De Vadder die olmettekè zyn entree doet in e fictif West-Vlams dorptje. Bygevolg klappn ol d'acteurs ton ouk West-Vlams. D'êeste afleverienge begost op 30 september 2015. 't Zyn in 't hêle neegn afleveriengn.
Ofleveriengn
[bewerkn | brontekst bewerken]- Loft met hof: Freddy De Vadder, die in Gent wunt, veruust na Bevergem in West-Vloandern. Claude Delvoye vereurt nem e 'loft'. Moa dat is eigentlik e boovnverdiep van de kringloopwinkel. Amar, de schôonbroere van Claude, ziet dat nie zitt'n. Bovendien komt Amar in kwestje met zijn vrouwe die an joungs wil begunn'n.
- Parmehespe: Freddy is in tusschenwyne conciërge van de loft, en e verbuuscht ol 't geld dat'n van Claude ekreegn et. Kenny en Lorenzo, die in de kringloopwinkel werk'n, komn benauwd nu da ze weet'n da ze e nieuwe boazinne goan krygn: Hilde, e socioal assistente. Me kom'n mêer en mêer te weet'n over Claude; nie ollêne nu, maar ouk in 't verleed'n wost'n nie zuver op de groat.
- Harajamar: Danny is depressif: z'en thus wel de Lotto ewonn'n, moa dat makt nem ni gelukkiger. De Bende van de Roste trekt Amar e klôot of. En intusschenwyne elpt olleman mei an de Zeugefêest'n.
- Vierwerk: Martine is in blyde verwachtieng, moar Amar is lyk minder content. Anja inviteert 'n elft van Bevergem voor e fêestje in neur chique, nieuwe doening. Kurt van de gazettewinkel is te gast by Roste Luc en de Bende van de Roste: e lêert riengel'n e nurfen.
- Voaderkesdag: Hilde is preus lik vêertig: z'et geld ekreegn van de provinsche om de Zeugefêest'n t'organiseer'n. Moa de reiste van 'n troep ziet dat lik niet zitt'n. We zien nu ouk wuk da Claude ollemoale foefelt by Service Invest: e stikt de ground vul met versleet'n frigo's en ander smeirlapry. Amar peist da zyn klêen'n nie va nem is. En Kurt et een oogsje op Hilde.
- Ufoots: Journalist Michel van De Weekbode komt Freddy teegn, en nem wèt mêer van Freddy. Kurt wilt an Hilde zegg'n wuk dat er op zyn erte legt, moa dat lukt ni zo goed.
- De Beireslikker: 't Zyn Zeugefêest'n! Op de fêest'n kiezen ze de keuning: de Beir van Bevergem. Dat is e verrassende winnoare.
- Werelderfgoed: Lorenzo et e filmpje over de Zeugefêest'n op YouTube ezet. En nu meugt Claude dat expliqueern an e masse journalist'n. Deur ol die andacht wèt Freddy da zyn anonym leventje in Bevergem na de wuppe is.
- Blinde vlekken: Deze episode is e sôorte van making of: idder personage meugt zyn zeg doen over d'opnames.
Oofdrolln
[bewerkn | brontekst bewerken]| Acteur | Personage |
| Bart Vanneste | Freddy De Vadder |
| Maaike Cafmeyer | Anja |
| Wim Willaert | Danny Vandenberghe |
| Piet De Praitere | Claude Delvoye, OCMW-vôorzitter |
| Ann Tuts | Martine |
| Ilse De Koe | Hilde |
| Han Coucke | Lorenzo |
| Zouzou Ben Chikha | Amar, garagist |
| Sébastien Dewaele | Kenny |
| Wannes Cappelle | Johan, flik |
| Dries Heyneman | Kurt, boas van de gazettewinkel |
| Luc Dufourmont | Roste Luc |
| Gunter Lamoot | Roste Stefan |
| David Galle | Roste Thierry |
| Isabelle Van Hecke | Claudine |
| Dirk Van Dijck | Burgemêester |
| Günther Lesage | Gynaecoloog |
Varia
[bewerkn | brontekst bewerken]- Bevergem bestoat nie echt. D’opnames vo de reekse gebeurnde op verschillige plekk'n: Zwevegem, Koeigem,...[1]
- De kykcyfers woarn van in 't begun styf goed. D'êeste twêe ofleveriengn oalnde op Canvas mêer of 600.000 kykers.[2]
- De burgemêesters van de streke kwaam'n in kwestje over de noame Bevergem. Burgemêester Doutreluingne van Zwevegem zei dat ollêne Zwevegem de noame Bevergem muchte gebruuk'n.[3]
Bronn
[bewerkn | brontekst bewerken]- ↑ HLN.be, Opnames Bevergem op kruissnelheid - URL bekeek'n op 13/08/2015
- ↑ Standaard.be, Kijkcijfers Bevergem in de lift - URL bekeek'n op 11/10/2015
- ↑ Demorgen.be, Bevergem-ruzie deint verder uit - URL bekeek'n op 07/11/2015