Burggraaf Frimoutpark

Dit artikel es geschreevn in 't Poperiengs, en da zou best ozô bluuvn.

---

't Burggraaf Frimoutpark is 't êeste stadspark van Poperienge. D'openienge gebeurde 'n 1stn september van 2002 deur Dirk Frimout, êreburger van Poperienge.

Je ku binnkomn ol de Komstroate, de Zwitsersche route (officiële noame: Switch Road) en de nieuwe bibliotheke in de Veurnstroate. 't Stadspark is oopn van zunsopgank toet zunsoendergank.

't Park is à peu près 3 etcoarn 17 grôot. 't Is langerekt en inedêeld volgens e modern principe. D'r zyn 3 zones: e demonstroasjezone mi zes lochtienksjes (legt teegn 'n Voart), een ecologische zone mi verschillige beplantiengn, en een oenstpanniengszone woa da ze nu geregeld activeitn in organiseern in oopnlucht.

In 't park stoat er oek e monument, enoamd STS-45. 't Beeldt de vlucht van de Atlantis uut woamei da Dirk Frimout de ruumte ingoenk. 't Beeld is ontworpn deur Cyr Frimout, Dirks broere.

E frimoutje zettn

"Een frimoutje zettn" is een uutdrukkieng by de jounge gastn. 't Wilt zeggen vrijen in 't Burggraaf Frimoutpark. 't Park legt juste lasen 't jeugduus De Couter; jounge koppeltjes passeern dus ol rap e kêe in 't geniep na 't park.