De Klokke
De Klokke (officiële benamienk: Albert Dyserynckstadion) is 't oegde stadium wor dat Club Brugge gespêeld êet van 1912 toet meie 1975.
Geschiedenisse
[bewerkn | brontekst bewerken]De Klokke goat terug toe in 't joar 1912. Ton ad 't besteur van de Club beslist vor e nief pling t'eurn langst de Toeroetschen Steinweg en doar e poar tribuungs round te zettn. Da pling werd "De Klokke" genaamd omdat er an den overkant en erberge wos met die noame, zelve ofgeleid van't (nat) stik groend dat ol in de 17sten eeuwe de "Klockemeersch" heette.
In 1920 en ze tonne beslist van da veld an te koopn. Da moste 40.000 BEF kosttn en in dienen tyd was da nie mis. 3 leedn van 't besteur en thopegeleid: erevorzitter Alfons Demeulemeester vo den elt en vorzitter Albert Dyserynck en besteurslid Prosper De Cloedt vo de reste. Enigte joarn loater êet Albert Dyserynck tonne d'andere 2 uutgekocht en 't pling vor e symboliekn frank an de Club gegeven. In 1932, e joar achter dat ie overleedn wa, êen ze tonne De Klokke hernaamd no 't Albert Dyserynckstadion.
Ip De Klokke êet de Club vele bloed, zwêet en troanen geloaten. Z'en doar e poar kis gedegradêerd moar ied're ki were gekommn ôok. Mo teegn 't ende van de joarn '60 begoste 't zeere beter te goan en de successn kwaamn were. Roend diene tyd wer ôok de Spionkop ipgericht no 't voorbild van de buutnlandsche ploegn.
In 1975 verhuusde de Club ton no 't Olympiastadion (nu: Jan Breydelstadium). De Klokke blêef van de Club mo Eendracht Brugge êet er nog enigte joarn ip geshot. 't End joarn '90 en ze die ground ton verkocht an 't stad Brugge en in 1999 gienk de latste tribune teegn dek vor e verkoavelienge. 't Enigste da nu nog overgebleevn is van De Klokke is de stêen die boovn de ingangspoorte stound en da nu ingemetst is in de Clubshop aan 't Olympia.