De Fonteintjes
De Fonteintjes zyn e reekse van deêls kunstmoatige, deêls nateurlikke duneplassn, dunerietlandn en dunestruukn geleegn langst e 4 km lange stroke tusschn de dunegordel en de kustboane van Zêebrugge noa Blanknberge. Oendanks under liggienge vlak by de zeê, hen ze zoet woater. Vandoar de noame Fonteintjes. 't Woater komt uut de groend.
't Styf zeldzoam milieu zorgt vor een uutzoenderlikke plantegroei. In 1868 schreêf Crepin, één van de grotste Belgische plantkundign: "ces prairies sont les plus intéressantes de tout le littoral", d' interessantste van heêl de kust. Surtout de vele soortn orchideeën zyn uutzoenderlik.
De zes nu nog overbluuvnde depressies (leêger geleegn gebiedn), zyn van mekoar geschid deur dwarsdyksjes die terzelfdertyd ook als toegangsweg noa 't strange fungeern. Vanof 't wandelpad ip de Groaf-Jansdyk e je e goed overzicht over heêl 't gebied, de zeê en d' achterliggende polders. Informoatiebordn zorgn vo den nodigen uutleg. De vier depressies vanof Zêebrugge vormn 't eigentlikke reservoat beheerd deur Natuurpunt vzw. Ze zyn alleêne moa toegankelik oender begeleidienge van e gids. Ipvallnd is d' ofwisselienge van biotoopn binn zuk e relatief kleên gebied.
Wandelienge [bewerkn]
- E wandelienge start an den eêste vyver, 't Eendefonteintje in Zeêbrugge. Die plas is kunstmoatig uutgegroavn. Alleêne moar an de landkant ist er nog riet. Tusschn de vyvers en de kustboane ligt er een wilgebusje. An de dunekant was 't heêlegans g'erodeerd deur overbetredienge en de begroeiienge was bykan totoal verdwenen. Vo da proces definitief were te droaien is 't gebied ofgeslootn. Nu is 't herstelproces vulip bezig.
- Da kustverdedigienge en nateurbeheer perfect tegoare kunn goan wordt dudelik by 't twidde 'Fonteintje'. De duunn zyn veel hoger en der is een echt bus oentwikkeld. 't Orchisfonteintje dankt z'n noame an ze styf ryke vegetoatie lik Vleêskleurign Orchis, Rietorchis, Moeraswespnorchis en de styf zeldzoame Byenorchis. 's Wienters stoan der grote deêln van 't relatief droge kruudnryke en oorsproenkelik kalkachtig dunegrasland oender woater. 's Zomers bluuft alleêne moar in 't oôstelik deêl e kleêne oendiepe plas over.
- 't Busfonteintje toogt e heêl ander beeld: in den oôstelikkn helt viend j' oopn woater me rietveldjes der roend en in den hoek e wilgebusje. An de westelikkn helt ist er e droger gedeêlte met e kruudnryke duunrietvegetoatie en e moerasbusje me Wilg en Sleedoorn. De dunevoet is dichtbegroeid me Vlier en Wittn Abeel en in mindere moate me Duundoorn.
- De Rietfontein, 't latste ofgeslootn reservoatgedeêlte, bestoat uut uutgestrekte rietveldn met in 't centrum twi plekkn oopn woater me Kleêne Lisdodde der roend. Ieder seizoen zyn der typische rietveugels, lik rietgors en blauwborst. An de dunevoet groeit er were Wilg, Vlier en Duundoornstruukn.
De latste twi vyvers zyn ook visvyvers. Ze zyn alletweê uutgegroavn roend 1860 ter verstevigienge van de Groaf-Jansdyk woarip dat den yzern weg noa Knokke angeleid is.
An de zeêkant wordt 't zand vastegeleid deur 't stevig Helmgras. An de kant meêr landinwoarts van de duunn is den invloed van de wiend al veel klinder. Doa zie j' ip vele plekkn Duundoornstruukn en Rimpelroos ofkomstig uut China, moa die nu ingeburgerd is in uze duunn.
't Is ook e plekke die vele trekveugels antrekt. En 't stik oopn ruumte is e buffer tusschn Blanknberge en d'hoave van Zeêbrugge.
