Halloween

Uit Wikipedia

Halloween is 'n feestdag dan ze viern ip den 31sten oktober.

[bewerkn] Oorsprong

Me spreekn van duuzndn joarn geleen. Ton was't 'n Europeesche en heidense feeste. 't Was de viering van 't end van den oogste en ook 'n vruchtboareidsfeeste. De noame Halloween is 'n verbasteringe van 't Ingelsche all hallow's eve, de vooroavnd van Allerillign. De Keltn vierdn de dag voor Allerillign Samhain, de feeste woarup dan de dooë werekeerdn. De Christelikke leer èt da loater overgenoomn.

[bewerkn] Overgewoaid nor Amerika

In dn tyd dan de Ieren en Schottn nor Amerika uutweekn noamn z'under feeste mee no doa. Ze gebruuktn ton roapn of beetn. D'Amerikoann en da loater stilletjesan veranderd. In plekke van roapn en beetn begostn ze doa pompoenn te gebruukn. En de Keltische offers veranderdn in trick or treat. De joungns goan ton verklid goan zingn vo snoep, lik dan ze dat ier doen mè Sinte-Moartn. Up sommigte plekkn doen ze da nog mè lanteirns gemakt van beetn met 'n luchtje of keirse dr in.

[bewerkn] Weregewoaid

Up 't ende van de twintigste eeuwe is 't ton were van Amerika overgewoaid nor Europa. De pompoenkweek is ier ton enorm omoge gegoan. En 't ziet er nie noar uut da 't gauwe were go verdwynn. De winkels profiteern van de stille periode tusschn 'were no 't schole' en 'Sint-Nikloai'. De schooln doen dr ook an mee en de joungns begunn veel tuug te koopn vor under te verkleeën. Oe meer dan ze malkoar kunn benauwd moakn oe liever. En deur de interesse vo heidense ritueeln begunn dr ook veel jounge gastn no midzomer-en midwinterfeestn te goan.

Halloween is dus nie ollene e kwestje van commerce mo kan ook gezelligeid bringn up 'n moment dat 't vroeg donker is.

Mêer ofbeeldiengn die ier by passn ku je vien ip Halloween ip Wikimedia Commons.