Koen Sanders

Van Wikipedia

Koen Sanders (17 december 1962) is e vroegern foetbolliest van Club Brugge, KV Mechelen en de Rôo Duvels. Zyn grotste successn oalde 'n me KV Mechelen, woamei dat 'n 'n Europeeschn Beker der Bekerwinnoars wonne teegn Ajax Amsterdam.

Koen is de broere van Dirk Sanders, e speler die de grôte periode van Club Brugge meimakte, toune an ze ounder Ernst Happel twêe Europeesche finalles speeldn.

Carrière[bewerkn | brontekst bewerken]

Sanders beguste foetbolln byn SK Êernegem en at 'n bykan 18 wos, veruusde 'n no Club Brugge, woa dat 'n 4 sezoenn blêef. By Brugge wos 'n surtout middnvelder en ne muchte nie ossan speeln. Doadeure wulde 'n nie mi by Club speeln en ne veruusde no KV Mechelen. E gienk doa 11 sezoenn bluuvn en ne makte doar olles mei: Mecheln kwam van e middnmoter e subtopper, kampioen en zest Europees bekerwinnoare were e middnmoter. E foetbolde doarachter nog byn Oarelbeke en Wevelgem City.

KV Mechelen[bewerkn | brontekst bewerken]

Achter da Sanders weg wulde byn Brugge, wos er oundermêer interesse van SV Woaregem, mo 't wos uutendelik Mecheln die nem binnoalde. Oloewel dat 'n epeisd adde dat 'n in 'n êestn ploeg, viel 'n derlaasn en moest 'n zest byn de reservn speeln. Doar et 'n elêerd (ounder invloed van Theo Custers en Benny Asselberghs) da talent ollêne nie enoeg is en daj moe werkn en vorsdoen voun etwoa te groakn. Ezo is Sanders oek ekend erocht: etwien me wel techniek, mo surtout me vele inzet beistn e match.

Koen Sanders rocht achter da joar in 'n ploeg en oundertusschn wos 'n van posiesche veraard: van middnvelder kwam 'n rekschn back. Mecheln kwaam e bitje met e kêe e topclub (vôorzitter Cordier stak e masse geld in 'n ploeg en met Aad De Mos an ze e toptrainer). De bekendste spelers woarn Eli Ohana, Michel Preud'homme, Erwin Koeman, Lei Clijsters, Marc Emmers en Bruno Versavel, mo Sanders stoeg oek vast in 'n ploeg en ne lei oek goed, Erwin Koeman zei ôois dat 'n Sanders 'n mêest ounderschattn speler van België vound. Me Mecheln wont 'n 'n beker, 't landskampioenschap en de Beker der Bekerwinnoars.

Doarachter gienk et ossan mo miender (oloewel dan ze nog êentige joarn meidein an de kop van de klasserienge), mo ne blêef egliek, e kwam toune zest kapiting. In ze latste joar kwam 'n in kweiste me 't nieuw besteur en krêeg 'n zest gin okkoazje voun salu te zeggn an 't publiek Achter de Kazerne, e publiek die nem drie kirs tout bestn speler van 't sezoen verkoozn adde.

Oarelbeke & Wevelgem[bewerkn | brontekst bewerken]

Sanders gienk nor Oarelbeke, mo doa foeterde 't nie echt omdan ze doar verwacht an dat 'n e droagnde speler kwam en dat wos 'n nie. E beleefde wel e chic moment at 'n da joar werekêerde voun e match te speeln in Mecheln, olleman stoeg rechte en klapte in d'ann.

Oek uutbolln by Wevelgem lukte nie echt mi en uutendelik schiddeg 'n uut me foetbolln.

De Rôo Duvels[bewerkn | brontekst bewerken]

Sanders et vier kirs espeeld voun de Belgn (in de periode dat 'n by KV Mechelen zat) en ne zat oek in de vôorseleksche van de Mundiale van 1990 in Itoalië. 't Wos Walter Meeuws die nem upriep, mo toune a Meeuws ofedankt wos, viel 'n of.

Achter 't foetbol[bewerkn | brontekst bewerken]

Koen Sanders gienk êest in bank gon werkn, doarachter kwam 'n bode.

In 2008 gebeurt er e drama in zyn menage: zyn zeune Bram (zevve e supporter van Mecheln) wos in Jabbeke tope me twêe moatn omverre ereen deur en otto. En overleefde 't, mo moeste achter en ende in coma eleid t'en, begunn an e lange revalidoasche.

Externe koppelienge[bewerkn | brontekst bewerken]