Louis Colens

Van Wikipedia
Kanunniek Louis Colens.

Ludovicus Colens beter bekend as Louis Colens (Brugge, 1 december 1877 - Brussel, 16 januoari 1936), was een rooms-katholiekn paster en socioal hervormer die êen van de stichters van 't ACV en 't ACW was.

Je was de zeune van de notoaris Philippe Charles Colens (1832-1894) en Marie De Brouwer (1839-1906). Zyn voader haad zijn notarioat in de Ridderstroate en loater up de Malbergplatse.

Studies[bewerkn | brontekst bewerken]

Louis Colens dee zyn middelboare studies aan het Sint-Lodewykscollege in Brugge. Vandoa gienk tje noa 't Leo XIII College in Leuvn en promovèrde in 1899 toet docteur in de filosofie. Van 1899 toet an 1901 deed je zyn seminoariejoarn in Brugge. In 1901 wierd je toet priester gewyd. Je gienk ton noa 't Heilig-Geestcollege in Leuvn en promovèrde in 1905 toet docteur in de godsgelêerdheid.

Êeste activiteitn[bewerkn | brontekst bewerken]

Colens wierd hulppaster in Toeroet (1905) en ounderpaster in Ostende (1906). 't Was in Ostende dat zyn socioaln inslag begost. In 1912 was tje medestichter van 't Algemeen Christelijk Vakverbond (ACV), en in 1921 wierd je toet proost van de christelike moatschappelike werkn vo 't arrondissement Ostende benoemd.

Nationoal leider[bewerkn | brontekst bewerken]

In 1921 was Colens de stichter, en wierd je den olgemêenn proost en de facto leider van 't Algemeen Christelijk Werkersverbond (ACW-MOC), een federoasje van verschillende arrondissementêle boundn. 't Doel van de nieuwe organisoasje was van d' inspanniengn van vakboundn, ziekenboundn, mannen- en vrouwenbewegiengn t' hope te briengn.

Gedeurende verschillende joarn zettigde Colens hem in vo d' organisoasje van 't ACW, en je verdedigde d' ACW-belangen in de nationoale polletiek met d' hulpe van de loatere minister Philip Van Isacker, die in 1919 as volksvertegenwôordiger was verkoozn, en ook van de loatere ministers Paul-Willem Segers en Oscar Behogne.

Andere activiteitn[bewerkn | brontekst bewerken]

In 1922 was Colens de medestichter van de Socioale schole in Heverlee en je was ook betrokkn by de Socioale schole vo vrouwn in Brussel. Je was ook hoofdredacteur van De gids op maatschappelijk gebied.

In 1924 naamt Colens 't initiatief met d' oprichtienge van de Belgische Arbeiderscoöperatie mè zyn Welvaartwinkels. Je was ter vo joarn vôorzitter en directeur.

In 1925 laagt je an de basis van de Spaarbank der Christelijke Werklieden, de loatere BAC of BACOB, die loater wierdn upgenoomn deur Paribas en ton Dexia.

In 1929-31 was Colens de stichter en actieve leider van de Centrale voor Volksontwikkeling die loater de KWB wierd, en woaruut dat 't KAV, de KAJ en de VKAJ ountstoundn.

Louis Colens naam goandeweg mêer dêel an 't openboar debat in boekn, artikels en hounderdn bydroagn in verschillende publicoasjes. Azo protestèrde tje teegn Léon Degrelle en REX.

In 1934 wierd je toet êrekanunniek van de Sin-Savoaderskathedroale in Brugge benoemd. In Ostende wierd achter zyn dôod de vôormoalige Stockholmstraat ommegedopt toet Kanunnik Dokter Louis Colensstraat.

Je stierf van kanker in Brussel op 16 moarte 1936 en wierd up 't Brugs kerkhof in de familiekelder Colens bygezet.

Werkn[bewerkn | brontekst bewerken]

  • De vorming van leiders voor sociale werken, Leuven, 1929.
  • Het Concordaat tusschen den Heiligen Stoel en het Derde Duitsche Rijk, Brugge, 1935.
  • De priesterlijke zending van de proosten in de christelijke arbeidersorganisatie voor volwassenen, Brussel, 1935.
  • Ce que nous pensons de REX, Antwerpen, 1935.
  • L'examen critique du Rexisme, Brussel, 1935.

Literateure[bewerkn | brontekst bewerken]

  • J. PERQUY, Kanunnik Colens, in: De Gids op maatschappelijk gebied, februari 1936.
  • E. GERARD (red.), De kracht van een overtuifging. 60 jaar ACW (1921-1981), Brussel, 1981.
  • Andries VAN DEN ABEELE, De familie Colens in Brugge vanaf de 18de eeuw, in: Handelingen van het genootschap voor geschiedenis te Brugge, 2007, blz. 414-434.

Externe koppelienge[bewerkn | brontekst bewerken]