Magnitude

Van Wikipedia
Ga naar: Begunplekkn, zoeken

De magnitude van en emellichoam es e getal dat de strafte van dat emellichoam beschryft.

In de klassiekn tyd deeldn ze de sterrn in in zes klassn volgens under strafte: 1m, 2m ... 6m. Die "m" stoat voor magnitude, dat es Latyn vo grotte. Moar let up: oe klinder 't getal, e stravver da 't es!

Die magnitude es de schynboare magnitude, dat es de strafte lik of da je 't emellichoam ziet vanup d'eirde en zegt dus nietn over de absolute strafte.

Mè de komste van telescoopn woarn d'r zwakkere sterrn en planeetn te ziene. De dwergplanete Pluto byvoorbeeld èt magnitude 13,8. Die kun je ollene moa ziene mè ne groddern telescoop, lik ne reflector van 15 cm diamèter.

De magnitudeschoale es e logaritmische schoale. Da wilt zeggn da 't verschil tusschn twee upeenvolgende magnitudes ofgeround 2,512 es. Magnitude 1 es dus 2,512 keers stravver dan 2m, en 2m es 2,512 keers stravver dan 3m enz.

Sommigste emellichoamn zyn zo straf da under magnitude negatief es. De zunne èt up nen kloarn dag -26m.5. De vulle moane es -12,5. De strafte van planeetn varieert nie ollene van undern ofstand tout d'eirde moar ook van under schyngestalte (lik by de moanfoazn).

Emellichoam Magnitude
Zunne -26,5
Mercurius -1,3 tout 2,7
Venus -4,4 tout -3,3
Moane (vul) -12,5
Mars -2,1 tout 1,8
Vesta (de strafste planetoïde) 6,4 tot 8,4
Jupiter -2,0 tout -1,2
Saturnus -0,2 tout 0,6
Uranus 6,1 tout 6,3
Neptunus 7,7 tout 7,8
Pluto 13,8
Sirius (de strafste sterre) -1,46