Pietjesbak

Van Wikipedia
Dit artikel es geschreevn in 't Ypers, en da zou best ozô bluuvn.

E pietjesbak (of pietebak) is en achtoekig dienk voun in te pietn. 't Is mêestol in out emakt en an de binnekant is't er mêestol etwot in zochte stofoasche eplakt, want pietn doe je me teirlienks en aars makt dat te vele leevn.

Pietn gebeurt vele up café. 't Bestoan verschillnde speln.

421[bewerkn | brontekst bewerken]

Benôdigdeedn[bewerkn | brontekst bewerken]

  • Pietjesbak (1)
  • Teirlienks (3)
  • Pietjes (vlootn of bierulletjes) (11)
  • Krytje (1)

Verloop[bewerkn | brontekst bewerken]

421 of quat-vingt-et-un is 't mêest ekend. Je speelt met minstens 3 spelers. Je ku speeln voe de leute, mor oltemets speeln ze dat 'n verliezer e toernee moe zettn voun ol dedie die mei doen. 't Bestoan vaneigens oek verschilln in 421, no volgens wien dat er speelt.

Êest moetn de pietn verdêeld groakn. Doavôorn smytn de spelers ek up ze toer en 'n dienn die 't lêegste esmeetn et, krygt zovele pietn of dat 'n ogsn esmeetn et (Kombienoasches in 421). Toune erbegunt 'n verliezer en ezô goat 't vors toet dan de pietn verdêeld zyn. Doarachter begunt de finalle. In de finalle doen ollêne de spelers mei die pietn en en dus kunn ollêne zyder e striepe krygn (3 striepn is 1 zettn).

'n Speler die 't latste pietn ekreegn et, meugt begunn in de finalle. At zyn êeste smete nie goed is, meugt 'n nog eki smytn en doarachter nog eki. Mor at 'n achter êne ki stopt, meugn d'ander spelers oek mor êne ki smytn. Smyt 'n 3 kirs, toune meugn zyder oek 3 kirs smytn.

Je meugt oek teirlienks uut 'n bak oaln (mor eki daj z'uutoald et, moetn ze deruut bluuvn). Aangezien daj me pietn (de intjes) van d'ogste kombienoasches makt, zyn dedie der mêestol uutoald. De kombienoasches zyn 't zeste lik in 't verdêeln, mor a je 421 smyt, goat et over de reste van je pietn. Etwien die toune oek ze pietn wult kwyt groakn, moet oek e 421 smytn. 'n Dien die de lêegste kombienoasche esmeetn et, krygt de pietn. An d'ogste of de lêegste kombienoasches deur mêerder spelers esmeetn zyn, moet er ebarreerd zyn. 'n Dien die 't latste de kombienoasche esmeetn et, meugt êest ze teirlienks smytn en toune zyn 't d'oogn die telln ('n dienn met de mêeste oogn wint of verliest nie).

In de finalle is 't de bedoelienge voun ol je pietn kwyt te groakn. 'n Dienn die ze ollemoale et (dus 11), krygt e strieptje.

En ezo got vors toet an ze 't moe zyn.