Rozendoale (Vrankryk)

Van Wikipedia
De wyk Rozendoale (in't dounkergroen) ip e koarte van Duunkerke

Rozendoale (Frans: Rosendaël, Nederlands: Rozendaal) es nen wyk in de Franschn stee Duunkerke. De wyk ligt an den ôostkant van Duunkerke-Centrum, tusschn de wyk Malo en de gemêentn Tetegem en Nieuw-Koukerke. Rozendoale it en ippervlakte van 3,97 vierkante kilomèiters en telt bikkans 18.270 inweuners. Langsn de zuudkant van de wyk strôomt et Kanoal Nieuwpôort-Duunkerke en langsn de westkant ligt et ofvoerkanoal ("canal exutoire") tusschn de binn'nhoavn van Duunkerke en de zêe.

Tout in de Karoliengischn tyd lag 't gebied van 't huudige Rozendoale ounder woatr. Rozendoale wos lange tyd mo e vrêe klêen dorptje. Achter de Slag der Duun'n die in 1658 round Duunkerke wierd uutgevochtn stoundn der nog mo enigste uuzzetjes rechte. Achter 't têeken'n van de vrede, toen Duunkerke in d'andn van d'Ingelsche kwam, installeerde de loatere Ingelsche keunienk Jacobus II van Ingeland (die ton nog geweun Ertog van York wos) zyn ôofdkwartier in Rozendoale en zyn soldoatn sloegn der ulder kamp ip.

Rozendoale wierd en zelfstandige gemêente in 1860, toen et ofgesplitst wierd van Tetegem en Nieuw-Koudekerke. In 1891 verloor Rozendoale zelve e stik van zyn gebied, da de zelfstandige gemêente Malo gienk komn. In 1972 wierd de gemêente juuste lyk Kleen-Sintn ipgeheevn en by Duunkerke gestookn.

Wikimedia Commons