Spierekanoal
't Spierekanoal (Frans: Canal de l'Espierres) es 'n kanoal da de verbiendienge makt tusschn de Schelde by Spiere en 't Kanoal van Roboais an de Schreve by Leers-Nôord (wa eigntlyk geweunweg in't verlengde ligt van't Spierekanoal mor ier in Vrankryk en and're noame eit). 't Kanoal es 8,4 kilomèiters lank en lôopt vo 't grôotste stik deur Enegouwn en vo en klêen stikske (dichte by Spiere) deur West-Vloandern.
't Spierekanoal es en ounderdêel van de verbiendienge tusschn de Schelde en de Deule, tôope me 't Kanoal van Roboais en de gekanaliseerde riviere de Marke. 't Wierd gegroavn tusschn 1840 en 1843, vlak neefest 't riviertje de Grôote Spiere. 't Doel van't Spierekanoal wos ounder and're d'industrie in de streke van Rysel, Roboais en Terkoeje van stêenkooln te vôorziene. Achter de joarn 1950 gienk den traffiek en 't ounderoud van't kanoal achteruut tôope me d'achteruutgank van de zwoare in't nôordn van Vrankryk. 't Woater wos ôok vrêe vervuuld. Tusschn 1985 en 2011 voer der gin êen bôot mêer ip't Spierekanoal. Mor deur 't internationoale soamnwerkiengakkôord en restoroasjeprojekt Blue Links es't kanoal were bevoarboar gemakt vo bôotn van Klasse I.