Wikipedia:Standoardvlams

Van Wikipedia
(deureverweezn van Standoardvlams)

Binn et West-Vlams zyn d'r nogol wuk ounderlienge verschilln. De bedoelienge van 't Standoardvlams, ofgekort tot SV, es om ne norm vaste te leggn tusschn ol de schryvers die up dizzn Wikipedia actief zyn omtrent de maniere woarup da 't West-Vlams hier geschreevn es.

't Standoardvlams es dus e West-Vlamsche spellienge. Die spellienge es 't resultoat van ne compromis. En dienen compromis wos nôdig. Up langern termyn wil da Standoardvlams de referensje kommn vo olle West-Vloamiengn die in hunder eigen toale willn schryvn, en dat es ambitieus. Moa 't es et SV in d'eeste plekke te doene voe olle West-Vlamsche tekstn serieus én anveirdboar te moakn vo niet-West-Vloamiengn, wuk da ollene moa meugelik es oe olle West-Vloamiengn up dezelfste maniere schryvn.

Uus SV es nie ountworpn by en universiteit moa es 't resultoat van vele voorstelln en verbeteriengn die kommn van de schryvers up den West-Vlamschn Wikipedia die die spellienge ol en ende gebruukn. Ol die gastn hèin en upmerkelik gevoel vo toale. Da Standoardvlams zou dus vo olle West-Vloamiengn gemakkelik herkenboar moetn zyn en nie vree moeilik vo te gebruukn en te schryvn. En dat es uuz'eeste bedoelienge.

Et Standoardvlams es nog in vulle ountwikkelienge. 't Goat surtout over de spellienge van klankn woavan da d'uutsproake nogol streekgeboundn es. D'r bestoan ook artikels over woordnschat en grammatica van 't West-Vlams, ge moe gy moa ne kee goan kykn na uus Portoal over Toale.

De regels lik of dan ze nu zyn[brontekst bewerken]

Hèi je goestienge vo mei te discuteern over uze spellienge? Gif joun upmerkiengn toun ma up et discuusjeblad van de spelliengsregels.

Standoardvlams of Standoard West-Vlams?[brontekst bewerken]

Sommigste hèin vroagn by 't gebruuk van "Vlams" in de noame "Standoardvlams".

't Es verkeers van den toalkundign term "Vlams" t'associeern mèi 't Belgs gewest Vloandern. De Vlamsche streektoale (of dialect oe je da liever hèit) van nu es 'n upvolger van de Middelnederlandsche toale dan ze koutndn in 't middeleeuws groafschap Vloandern. En de grenzn van da groafschap vieln helegansn nie t'hope mèi dedie van 't Vlams gewest van nu. Zo zyn ook het Frans-Vlams en Zeeuws-Vlams Vlamsche streektoaln moa da wil doavoorn nie zeggn dan de Frans-Vloamiengn en Zeeuws-Vloamiengn in 't Vlams gewest weunn. (Wuk da nie wil zeggn dan ze zynder hunder gin Vloamienk voeln, controarje!) Juste lik of da j'ook nie kut zeggn dan olle Broabanders of Limburgers in 't Vlams gewest weunn.

't Es dus ol gin avance voe de toale dan ze nu in 't Vlams gewest koutn "Vlams" te noemn want ze spreekn doa verschillige streektoaln die styf anders klienkn. Nevers 't Vlams (in de provinsjes West- en Oost-Vloandern) koutn z'in 't Vloandern van nu ook nog Broabants (in Antwerpn, Vlams-Broabant en 't Brussels Hoofdstedelik Gewest) en Limburgs (in de provinsje Limburg).