Art Nouveau (Blanknberge)

Van Wikipedia
Maison Duysburg in de Weststroate
Ticheltableau met e visscher

Art Nouveau is e kunststromienge die ip verschillige plekkn in Europa ipkwam tusschn 1880 en 1914, ook in Blanknberge. Art nouveau is Frans vo nieuwe kunst.

In de twiddn helft van de 19ste êeuw, de periode da Blanknberge uutgroeide van e schoamel visschersstadje nor e mondaine kustplekke, was ter e nieuwe kunststyl in ipgang die de "Art Nouveau" genoemd wierd. Belgische architectn lik Victor Horta, Henri Van de Velde, Paul Hankar, Gustave Serrurier-Bovy geraktn weireldbekend met hunder bouwwerkn. Den anleg van den yzern weg in 1863 gaf 't toerisme in Blanknberge een enormn impuls. Ryke menschn zochtn e verbluuf vo hêel hunder familie. Ip kortn tyd wierdn der nieuwe stroatn angeleid en vulgebouwd me chique villa's. Architectn van de streke inspireerdn hunder ip de nieuwe styl. In dien tyd woarn Ostende en Blanknberge de twèe belangrykste toeristische kustplekkn.

Binst den Êeste Weireldoorloge was 't gedoan met de Art-Nouveaubewegienge. Tusschn de twèe weireldoorloogn wierd er druk bygebouwd mor in een andern trant. Achter de twidde weireldoorloge zyn der vele beschoadigde gebouwn geweune ofgebrookn.

Ticheltableaus[bewerkn | brontekst bewerken]

In Blanknberge zyn der nog styf vele huuzn uut de periode tusschn 1890 en 1915. Deur de speciale weersomstandigheedn an de kust gebruuktn ze geglazeurde stêens vo de gevels en ze wierdn versierd me ticheltableaus. Grôte en gekende gebouwen zyn der wel nie, moa Blanknberge wordt gerekend by d' Europeesche topklasse ip gebied van kwaliteit, varioatie en antal van zyn ticheltableaus.

Toerisme[bewerkn | brontekst bewerken]

In Blanknberge wordn der geregeld "Art-Nouveau-wandeliengen" uutgestippeld langs de schonste huuzn. Der wordn ton platselikke anekdotes verteld over de nostalgische Belle-Epoque-sfeer. Sedert november 2008 ist er ook e museum, 't Belle Epoque Centrum.

Externe koppelienge[bewerkn | brontekst bewerken]