Avalonia

Van Wikipedia

De rotsn van Avalonia in under relative posities gedeurende 't Carboon, vô dan Europa en Nôord-Amerika geschêen wierdn. De naamn zyn in 't Frans.
De koarte toogt de posities van de rotsn van Avalonia gelik dan ze nu in Europa gevoundn wordn. De dêeln van Avalonia die nu in Iberië en Marokko liggn, koomn doa deur de rotoatie van Iberië achter de botsienge mê Gondwana. Nie ol de rotsn liggn nu an d' uppervlakte.

Avalonia is 'n microcontinent woa dan de rotsen tegenwôordig wordn gevoundn in West-Europa en den Atlantischen kust van Canada en de Verênigde Stoatn. De name komt van 't Avalonschiereiland in Newfoundland.

Ontwikkelienge[bewerkn | brontekst bewerken]

De rotsn die loater Avalonia wierdn zyn begost as 'n vulkanischen eilandenboge die mê Gondwana ê gebotst, tussn 730 en 570 Ma, en laagn ton up een brêedtegroad van 60°S. Loater, in 't vroege Cambrium (± 530 Ma) braak Avalonia los van Gondwana en reisde noa 't nôordn woada 't an 't ende van 't Ordovicium (± 440 Ma) mê zyn ôostenkant teegn Baltica gebotst et. In 't loate Siluur en 't begin van 't Devoon (400 - 390 Ma) êt den uutgestrekte westnkant van Avalonia (dat ton ol tope mê Baltica bewoog) in kontakt mê Laurentia gekomn. 't Gevolg doavan was den Caledonischen orogenie. In de Krytperiode, braak Laurasia up met d' openienge van den Atlantischen Oceoan, wa da betêeknt da sommige dêeln van Avalanonia nu in Nôord-Amerika en andere in West-Europa gevoundn wordn.

Gevolgn[bewerkn | brontekst bewerken]

Teegnwôordig zien me de rotsen van Avalonia in plekkn gelik België, 't nôord-ôostn van Vrankryk, 't nôordn van Duutsland, 't nôord-westn van Pooln, Iengeland, Wales, 't zuud-ôostn van Ierland, 't zuud-westelik dêel van 't Iberisch schiereiland, 't Avalonschiereiland, 't grotste dêel van Nova Scotia, 't zuudn van New Brunswick en 'n dêel van New England.