De Barakken

Van Wikipedia
Sint-Jozefskerke
Frans wienkeltoerisme de zundag

De Barakken is een arbeiderswyk in de Belgische stad Mêenn, geleegn tussn de Leie en de Fransche grenze. De wyk ligt in tegenstellienge toe Mêenn-centrum ip de zudeliken oever van de riviere, en de bebouwienge vormt een geheel met dien van de Fransche stad Oalewyne.

De Ryselstroate, d'hoofdstroate deur de wyk, is surtout de zundag vree druk, deur 't drukke wienkeltoerisme van Noord-Franschn die noa doa kommn.

Geschiedenisse[bewerkn | brontekst bewerken]

Ip 't gebied van De Barakken, dat by anpassiengn van de grenzen in de 17sten en den 18sten eeuw by Mêenn kwam, lag 't er vroegertyd e stik van de vestiengn va Vauban. Dedie woarn doar angeleid in de periode 1679-1689 in ipdracht van de Fransche keunienk Lodewyk XIV. Doaby was 't er e stikske van 't oude centrum van Oalewyne geweunn verdween. Ounder Lodewyk XV werd er in 1744 olwere e stik van 't hoornwerk ofgebrookn, en achter de Belgischen onafhankelikheid werd 't gebied vodder ountmanteld. Vanaf olverwege de 19sten eeuw werdn de groundn verkocht.

In 't latste decennium van de 19sten eeuw werd er begonn met bouw van e wyk ip 't groundgebied. E poar nieuwe stroatn werdn angeleid, den eersten in 1891. Mêenn ad in dien tyd en groeiend antal inweuners, deur de grensarbeid in de Noord-Fransche industriesteedn, en de wyk werd vodder uutgebreid met nieuwe stroatn. Al in 1897 kreeg de wyk z'n eign parochie. In 1900 schounk de stad Mêenn e stik ground an de Sint-Jozefsparochie voe de bouw van e kerke, die de 26sten september 1904 werd ingewyd. Ip 't ende van da joar weundn der ol 4401 menschn in die nieuwe wyk.