Flandrien

Van Wikipedia

E Flandrien is een uutdrukking om e coureur te benoemn die ni kapot te krygn is. En attakeert va mitte datn kut, en e gift nôois op.

Ôorsproeng van de noame[bewerkn | brontekst bewerken]

An 't begun van 'n Twintigsn êeuw gaavn de Woaln de noame Flandrien an de Vlamsche boern die na de Woalsche steejs woarn ofezakt om werk te viengn. Dat wos e ruw volksje da dufste vichtn, en dikkers vele droenk. Flandrien wos dus êerst e spotnoame, die moa loater van tyd etwot kwaam om preus op te zyn.

De noame voa coureurs dateert uut de periode van tusschen 'n Êestn en 'n Twiddn Weireldôorlog. In dien tyd wost er vele miender ploegtaktiek dan nu, en de coureurs dein mêer nunder goeste. Ze wistn oek miender goed wie dat er vôorn lag of achter lei, en met oevele tydverschil.

Romantiserieng[bewerkn | brontekst bewerken]

De mythe van de Flandrien is styf egroeid deur Karel van Wijnendaele, 'n stichter van de Rounde van Vloandern. E schrêef geirn over coureurs van simpeln komaf die grôte kampioen kustn komn deur vele kroaizje. In zyn oogn moest dat eigentlik e coureur uut Ôost- of West-Vloandern zyn.

E Flandrien zou dus eigentlik gin rostn sou meugn en, êerlik koersen, e met 't verstand op nul. Moar dat klopt dus nie hêlemoale. Oek in 't verleedn verdiende de coureurs ol goed nunder brôod (angers goeng ze wel na de fabrikke goan werkn). En oek in 't verleedn durvnde z'ol koersn te verkoopn, en muuln te trekkn om te geboarn da ze kapot zaatn in de finale.[1]

Typiese Flandriens[bewerkn | brontekst bewerken]

De noame sloeg volgens van Wijnendaele dus eigentlik ollêne op coureurs uut de Vloanders. Moa nu en ton zyn d'r oek buutnlanders die deezn titel verdienn mi nunder maniere van koersn. Kritiese volgers van de koers zeggn da Briek Schotte de latsn echtn Flandrien wos. Mêer toegeeflikke kykers beschouwn etwien lik Johan Museeuw oek lik e Flandrien.

Gala van de Flandrien[bewerkn | brontekst bewerken]

't Gala van de Flandrien is een organisoasje van de gazette Het Nieuwsblad. Idder joar verkiezn nunder lezers de bestn coureure van 't sezoen by de nieuweliengn, juniors, beloftn en d'elite.

Bronn[bewerkn | brontekst bewerken]

  1. De Flandriens, Opkomst en ondergang van een wielersoort - Herman Chevrolet, ISBN 978-90-295-6457-1