Madonna (zangeresse)

Van Wikipedia
Ga naar: Begunplekkn, zoeken
Madonna ip Live 8

Madonna (Bay City, Michigan, 16 ogustus 1958) is een Amerikoanse zangeresse en actrice. De menschn noemn eur soms wel eki de Queen of Pop en z'is de best verkoopnde vrouwlikke artieste ooit.

Eur leevn[bewerkn | brontekst bewerken]

Jeugd[bewerkn | brontekst bewerken]

Familioale situoatie[bewerkn | brontekst bewerken]

Madonna is geboorn als Madonna Louise Ciccone. Loater, toen da ze eur communie deej, koos ze voe de extra name Veronica. Eur volledige name was ton Madonna Louise Veronica Ciccone. Eur pa, Sylvio (of Tony) Ciccone, is van Italioansche ofkomst. Eur ma, Madonna Ciccone-Fortin, was van Fransch-Canadese ofkomst. Achter dochter Madonna kregen zyder nog vuuf kienders: Anthony, Martin, Paula, Christopher en Melanie.

Ze groeide ip in Rochester, e voorstad van Detroit. Ton da ze vuuf joar was, stierft eur ma op 30-joarige leeftyd an kanker. Eur pa ertrouwde loater met de huishoudster van de familie, Joan Gustafson. Met eur krygt Sylvio nog twee kienders: Jennifer en Mario. Wellicht omdat ze als 5-joarige nie verstoat vowuk da eur ma wor ofgenomen en da ze ton zo'n droevoard was, a ze gin goeie reloatie met eur stiefma.

Muzikoale ipvoedieng[bewerkn | brontekst bewerken]

Ols kind volgde Madonna piano- en balletlessn. Ip schole dee ze goed mee an de artistieke activiteiten. Achtr 't middelboar kreeg ze ton e studiebeurze voe de Universiteit van Michigan. Achter twi joar (in 1978) go ze weg van de universiteit voe met 35 dollar in e taxi te stappn en te vraagn an de chauffeur voen eur ip e plek of te zettn woa da 't ollemolle gebeurt. De chauffeur zette eur of ip Times Square in 't middn va New York City.

Doa begunt eur professionele dans- en acteercarrière. Ze speelt in e korte film (A certain sacrifice). Ook ziengt ze in verschillende punk-bandjes lik Emmy. Bovendien werkte ze ook nog een endje als verkopster by Dunkin' Donuts.

De joaren '80[bewerkn | brontekst bewerken]

Ipkomst[bewerkn | brontekst bewerken]

In '82 kreeg ze eur eeste ploatncontract achter da ze op den oek van et ziekbedde van Seymour Stein, de directeur van platenmaatschappieje Sire Records, e liedje aad gezoengn. Da nummer, Ain't No Big Deal, verschynt joarn loater ip de B-kant van de singel 'Papa Don't Preach'. Bovendiên is 't in 1998 uutgebrocht ip 't (ounofficiële) album "In the beginning".

Madonna eur eeste singel noemde 'Everybody', e liedje da ze ook zelve et geschreevn. Vele menschn peisdn tonne da ze e zwarte zangeresse was, ook omda der gin foto van eur op de hoes stot. De videoclip van 'Everybody' was e low-budget clip woarin daj eur kost zien dansn met eur danseurs in e nogal dounkere dancing in New York.

Succes[bewerkn | brontekst bewerken]

Ook e bitje deur MTV kreeg ze zêre e krachtig en sexy imago. In 1983 kaamt eur debuutalbum 'Madonna' uut. De eeste grote hit van da album is 'Holiday'. Da nummer wierd e wereldwyde hit. Ook vanip da album bekend zyn 'Borderline', 'Lucky Star' en 'Everybody'. In die fase van eur leven was eur tounmoalig lief John 'Jellybean' Benitez e goeie steun.

In 1984 brocht ze nog een album uut, Like a Virgin, da goe wierd ountvangn deur fans en critici. Et trokt aandacht deur de uutdagende titel en hoes, en der kaamn vier hits van: Like a Virgin, Angel, Dress You Up en Material Girl.

In 1985 speelde ze voe den eeste ki in e film. In Vision Quest, ook wel bekend als Crazy for You deur eur liedje da derin speelde, speelt ze eurzelvn. Ze treedt ip in e dancing en ziengt doa 'Crazy for You' en 'Gambler', twee hits da ze ton ook echt uitbrocht. Loater da joar speelde ze e belangrykere rol in de film 'Desperately Seeking Susan'. Ze kreeg goeie commentoar voen eur acteerprestoaties derin. Van die film komt ook eur liedje Into The Groove da op nieuwere uutgaven van et album Like a Virgin als extra liedje op die cd stoat.

De 16sten augustus 1985, de dag daze 27 joar wier, trouwde Madonna met den acteur Sean Penn. Met em speel ze in de film Shanghai Surprise, e grote flop. 't Koppel kreeg al rap e slechte reputoatie deur Sean Penn z'n agressieve ouding teegnoovr de media en de fotograafn.

In 1985 begost ze an eur eeste tournee, The Virgin Tour, mo da dee ze allene in Amerika. Pas twèè joar loater begost ze voe den eeste ki an eur echte wereldtournee.

Loater, in 1986, brocht ze eur derde album True Blue uut, da ze ton opdraagt an 'the coolest guy in the universe', eur vint Sean Penn. Van da album wiern Open Your Heart (met e uutdagende en choquerende videoclip), Live to Tell (e schone ballad uut de film At Close Range woar da Sean Penn e rol in aat), La Isla Bonita en Papa Don't Preach grote hits.

Schandoal[bewerkn | brontekst bewerken]

Ton oungeveer verscheenn der in ene ki e poar naaktfoto's van eur in de media, gemakt in de tyd da ze nog nie bekend was en liet maken voe e bitje geld te en voe van te kunn leven. Ze wouwt den ophef e bitje wegwimpeln deur te zeggen "So what?".

Grodder succes[bewerkn | brontekst bewerken]

In die periode veranderde Madonna eur imago en eur uuterlik. In plekke van eur rebels, punkerig kapsel koos ze nu voe de stijl van eur idool Marilyn Monroe. Ze speelde ook in de film Who's That Girl. Die film flopte were, mo 't leverde eur wel were 3 hits op: Who's That Girl, Causing a Commotion en The Look of Love.

In 1987 begost Madonna an eur eeste echte wereldtournee: de 'Who's That Girl World Tour'. Ier wierd ze voe den eeste ki begeleid deur eur achtergroundzangeressen en -danseressen Donna DeLory en Nikki Harris. DeLory danst nu nog assan by Madonna en Harris gieng loater ook meeziengn ip liedjes van Snap!. Madonna gaaft in augustus 1987 2 uutverkochte concerten in de Kuip in Rotterdam, mo no Belgïe kaam ze nie. Eén van eur concerts in Italïe in september, in Turijn, wierd live uutgezondn up tv en miljoenen menschn keekn dernoar.

Ook kaam ze da joar met eur album You Can Dance of, een album met remixen van bekende liedjes van eur, mo ook albumtracks die an mekoar gemixt zyn. Der stoeg ook e nieuw liedje op: Spotlight, die alleen in Japan e singel is gewist. Da album verkocht nie zo denderend glik eur vorige albums. Deurda ook de film 'Who's That Girl' flopt, zeggn de critici da ze eur oogtepunt nu wel get et en da eur carrière got ofbouwn. In 1988 pakt ze ton ook e pauze, woa da ze ounder andere in e toneelstik op Broadway speelt (Speed the Plow) en klêne rolln vervult in de films Bloodhounds of Broadway en Shadows & Fog van Woody Allen.

Nog meer succes deur controversje[bewerkn | brontekst bewerken]

In 1989 veranderde Madonna were van uuterlik en imago. Ze wou eki gin geblondeerd oar, mo wel bruun oar, mèèr lik eur natuurlike oarkleur. Ze brocht et album Like a Prayer uut. Deur de videoclip van de titelsong van da album kaamt der vele iphef. In de clip kuje namelijk zien da Madonna oltemets e getuuge is van e verkrachting en e moord, woavan dat er een andere voorbyganger ounterecht beschuldigd en gearresteerd werdt.Ierachter go ze nor e kerke, woada e beeld van de heilige Martinus van Porres toe leven komt en eur e dikke kus gift. Doarachter zeg ze wien da der 't echt gedoan aat en magt de onschuldigen were vry, en deen is eigenlik de tot leven gekomn Martinus van Porres. 't Vaticaan zei da 't e godslasterlike video was, omda katholieke symbooln en erotiek tope kaamn. Doadeure annuleerde ook Pepsi Cola e contract mè Madonna. Oundanks, of messchies juuste deur al die commotie wierd 'Like a Prayer' e nummer 1-hit over de hele wereld, da loater nog vele gecoverd en live gezoungen gewist is deur vele artiesten, gelik Blue en Mel C van de Spice Girls.

Et album Like A Prayer, da opgedraagn was an Madonna eur ma die eur 'lèèrde biddn', leverde eur nog e poar grote hits op, woarounder Express Yourself (da in die tyd de kostelijkste videoclip ooit aat), Cherish, Dear Jessie (opgedraagn an de dochter van e producer), Oh Father (over de band met eur voader en over under reloatie ten da Madonna nog e kiendje was) en Keep it Together (over eur band met eur familie). Behalve da stoegt er ook nog e duet met Prince op, Lovesong, en et nummer Till Death Do Us Part over eur scheidieng met Sean Penn woamee da ze op 14 september 1989 scheidde. Et latste liedje van de cd is Act of Contrition (= Akte van Berouw) woarin daje de muziek van et liedje Like a Prayer achterstevoren oort terwijl da Madonna eest e poar gebedjes fluustert en ton vertelt. In tegenstellienge toe sommige liedjes die achteruut gedroaid worden, zit der ier gin verborgn boodschap in. Wel zyn der menschn die in Like a Prayer achterstevoren Hear our Saviour Satan oorn wanneer da ze "Life is a Mystery" achterstevoren droain.

De joarn '90[bewerkn | brontekst bewerken]

In 't joar 1990 speelde ze de rolle van Breathless Mahoney in de film Dick Tracy' en hier krieg ze goeie commentaar ip. Voe de rest scoorde ze ook e grote hit mè Vogue, êen van eur klassiekers die nu nog assan bekend is deur et byhorend plastrongsje en de iconische clip. Vogue stound op et album I'm Breathless, e verwyzieng no eur rolle in de film Dick Tracy. Vogue was 't enigste liedje op da album da nie uut die film kaamt of geinspireerd was deur die film, en wier der verzekers igpezet zoda menschn die nie zo voe die cabaret-achtige stijl woarn toch da album giengn koopn. Eigenlik was 't ni de bedoelieng da Vogue e singel gieng wordn. Zaat da nummer geschrevn me Shep Pettibone voe de B-kant van de single Keep it Together, mo ton da de ploateboazn et nummer oorde, voen ze et veels te goed voe e B-kantje. Doarom beslootn ze voe et als singel uit te briengen. Vogue is 't begun van Madonna eur soamnwerkieng met de producer Shep Pettibone, me wien da ze loater nog gieng samenwerken. Vo de reste brocht ze ook nog Hanky Panky uut van da album, en da wierd ook e hit. Uut gebrek an tyd voen e clip te maken en ze geweun e performance van Hanky Panky uut eur Blonde Ambition Tour gepakt en gedubd met de studioversie van 't lied. Normaal gieng ze ook nog Sooner or Later en Now I'm Following You van da album uutbriengen, mo da wier uitgesteld voe Justify My Love, en zent uuteindelik geweun nie gedoan.

Wereldtournee[bewerkn | brontekst bewerken]

Ook al in 1990 begost ze met eur twêede echte wereldtournee, de Blonde Ambition Tour. Op diesndag 24 juli 1990 et ze ton opgetreden in de Kuip in Rotterdam, die tonne nie uutverkocht was. In België kwaam ze were nie. De tour wier gekenmerkt deur vele gevloek en seksuele handelingen. Azo 'zaagde' ze in Ollan bevoorbeeld over dat nog te kloar was buutn, woadeure daje de lichtshow nie goe koste zien. In Montréal en ze gedreigd voe Madonna te arresteern a ze eur show nie gieng aanpassen. 't Schynt da sommige bezoekers aan geklaagd omda ze zo pervers dee. Verzekers aan zet over eur act beist de oosterse versie van eur hit Like a Virgin, woarin da ze eerst eur bostn en eur kruus betastte en opt ende dee lik da ze een orgasme et, deur wild round te droaien op et bedje beest da twee achtergrounddansers eur betastten. Ze weigerde eur show an te passn en voerde et nummer toch op. Toch et de politie eur nie gearresteerd, want vanos da de show gedoan was, was zel were ounderweg no 't vliegveld voe te vertrekkn nor eur nieuwe bestemmieng voe de show van de dag derachter.

Spil met de paus[bewerkn | brontekst bewerken]

De show was wreed controversieel en uuteenloopnd; juust achter eur seksuele Like a Virgin zoung ze Like a Prayer uut berouw, beist dat er e kruus boven eur zweefde en da der priesters en nunnen met eur dansn. Dorom wilde de paus van tonne, Johannes Paulus II dat de bevolkieng van Italïe de concerts in Rome boycotte. Ton et Madonna inderdoad één van eur shows in Rome moetn oflastn. Vo die reden was ze nogal vies en ze verstound et nie dat de paus azo eur tegenwerkte beist dat n nie eens de show aa gezien. Zaat de paus trouwens ook voe een van eur shows in Rome uutgenodigd as reactie, mo nis nie ofgekomn.

Ook in 1990 brocht ze eur eerste Greatest Hits-album uut, The Immaculate Collection (den oenbevlekte collectie), een album da ze opdroeg an de paus. Nooit en de menschn zeker geweetn ot echt over de paus gieng of over eur broere Christopher, want em ze biename is Pope (dus paus in 't Iengels). De cd was 't eeste album ooit da gemixt was in Q-sound, woamee daje de muziek in 3-dimensionoale styl kut oorn. De nummers ip de cd woarn ook e bitje geremixt. Op 't album stoegn der ook 2 nieuwe liedjes, Rescue Me en Justify My Love, e soamnwerkieng me Lenny Kravitz, en ze wierdn alletwee grote hits. De videoclip van Justify My Love was weeral zo choquerend en expliciet. 't Was zelfs zo erg da MTV em nie wou uutzendn. Daarom et Madonna ton e videocassette uutgebrocht met de clip op, da was den eeste video-single ooit. Van die videoclip-cassette zyn der 400.000 verkocht gewist. In de clip kuje trowens ook eur tonmoalig lief Tony Ward zien. Em is bekend als e naktmodel voe homobladjes en -films.

Vroege joarn '90[bewerkn | brontekst bewerken]

In 1991 speelt Madonna de hoofdrol in een documentaire over haar leven beist de Blonde Ambition Tour, genaamd Truth or Dare. In Europa kreegt de film de name In bed with Madonna. In de documentaire kaamt Madonna no voorn als een ambitieuze, sexy en veeleisende vrouw, mor ook zachte trekken van eur karakter kaamn no voren. Zo is te zien da ze regelmoatig 't graf van haar moeder bezocht. Ze bezocht et filmfestival van Cannes voen eur documentaire meer bekendheid te geevn.

E joar loater speelde ze in de film A League of Their Own, over e vrouwnhonkbalteam. Critici woarn enthousiast over eur acteerprestaties deze ki. Uut die film kwaamt eur liedje This Used To Be My Playground, die in de V.S. eur tienste nummer 1-hit wier, mo roar genoeg nie op de soundtrack van de film stoat.

In 1992 bracht ze 't album Erotica uut op eur eign nieuw ploatnlabel Maverick, woa by da ounder andere Alanis Morissette e contract tèkende. Ip 'Erotica' stoegn de nieuwe singles Erotica, Deeper and Deeper, Fever (e cover van Peggy Lee), Bye Bye Baby, Bad Girl en Rain. Over 't latste liedje vroegen vele menschn under of worom da et eigelik up da album stoeg, want twas te lief vergeleekn met de reste. Ton zei Madonna dat da liedje eigelik e verborgn boodschap aat en daddet over sperma gienkt. Ip da album, geproduceerd deur Shep Pettibone, got de zangeressen e bitje meer de electronischen kant ip. Ze wildn vo de hoes van da album eur helemalle in eur blootn ip de foto, mo da mocht nie van eur ploatenmoatschappy Warner Music. Doarom e ze ton gekoozn voen e detail van een van de foto's van eur boek Sex da ze kort achter het verschynn van da album uutbrocht. In da boek brocht ze eur erotische fantasieën in beeld en ounder woordn. 't Publiek leekt echter tydelik moe te zyn van eur erotiek, want 't album verkocht teleurstellend voe e Madonna-album en der wier vele geklapt over 't boek Sex. Tegenwoordig is da boek vele gezocht en e moeilik te viendn verzamelobject. Normaal gieng et boek eigelijk geweun X noemen, mo ton da Madonna oorde da der round die periode e film gieng uutkomn over et leven van Malcolm X da ook X gieng noemen, e ze beslootn voen eur boek te ernoemen.

In 1993 begost ze met eur nieuwe tour, die The Girlie Show noemt, e concert met vele circusachtige elementn en zelfs e topless paaldanseresse die de show opende. Ook zaatn der vele seksueel getinte elementn in, lik orgies en SM. Deze ki dee Madonna buutn Londn en Parys gin Europese steedn an, dus ook Olland en België kaamt ze nie nortoe. 't Was wel den eeste ki da ze no Australië, Zuud-Amerika, Israël en Turkije giengt.

Middn joarn '90[bewerkn | brontekst bewerken]

In 1994 brocht Madonna et liedje Human Nature uut. 't Was een aanval op alle critici die klaagde over Madonna ton daze Erotica uutbrocht. In da liedje zei ze dus ook da ze nie wist da ze nie over seks, eur fantasieën en eur mening mochte klappn.

Human Nature stot op et album Bedtime Stories da ze uutbrocht in 1994, worop da de hits Secret, Take a Bow (met als achtergroundzanger/producer Babyface) en Bedtime Story stoegn da ze tope me Björk geschreven et.

In 1995 brocht Madonna e ballad-verzamel-cd uut, getiteld Something to Remember, wa da ook de titel was van een van de liedjes van eur I'm Breathless-album. Ierip et Madonna eur lieveliengsballads ip gezet, mo ook drie nieuwe liedjes: You'll See (da ze loater ook in 't Spoans et gezoungn), One More Chance en I Want You (tope mè Massive Attack).

In 1996 speelde ze in de film Evita over Evita Peron, de vrouwe van de Argentynsche dictator Juan Peron waaruut dat de hit Don't Cry for Me Argentina kaamt. Ook uut die film kaamt de grote hit You Must Love Me, da een Oscar kreegt voe beste filmsong. De film was e groot succes. Beist de opnames van die film ountdekte ze da ze in verwachtieng is.

In oktober 1996 kreeg Madonna eur eeste kiend, dochter Lourdes Maria Ciccone Leon van eur tonmoalig lief en ex-fitnesstrainer, Carlos Leon.

Loatere joarn '90[bewerkn | brontekst bewerken]

In 1998 verscheen et album Ray of Light, woavan da Frozen de eeste single en hit wierdt. Met die cd sloeg Madonna e nieuwe weg in, qua sound mo ook tekstueel. Producer William Orbit was verantwoordelik voe de electronische sound van et album en tope met ounder meer Patrick Leonard schreef Madonna eur meest spirituele tekstn toet tonne toe. Achter de teleurstellende verkoop van eur twèè vorige albums, betekende Ray of Light eur terugkèèr no de top. Critici woarn zot van de sound en eur stemme, die siends da ze zanglesse most volgn vo Evita vele sterker gewordn was. Ook van da album woarn de hits Ray of Light, Drowned World/Substitute for Love, The Power of Goodbye en Nothing Really Matters.

In 1999 ziengt ze de soundtrack voe de Austin Powers-film 'The Spy Who Shagged Me'. Domee kriegt ze èèn van eur grotste hits van de joaren '90: 'Beautiful Stranger'.

Achter 't millenium[bewerkn | brontekst bewerken]

Madonna an et kruus beist Confessions Tour in Amsterdam Arena

In 2000 speelde Madonna e hoofdrolle in de film The Next Best Thing, neffest Ruper Everett. Voe die film pakte ze ook 2 liedjes ip: Time Stood Still en American Pie, e cover van de klassieker van Don McLean.

In 2000 verscheent ook eur album Music, da technische nieuwe synthesizermuziek liet oorn, geproduceerd door Mirwais en William Orbit. Neverst de titeltrack, Music, verschynn ook Don't tell me en What it feels like for a girl ip singel. Als extratje wierdt in Europa ook de eerdere hit American Pie toegevoegd, e beslissieng van eur ploatenmoatschappie woa da Madonna nie content mee was.

In ogustus van da joar wierdt Madonna vo de twidde ki moeder: achter e moeilikke bevallieng kaam zeuntje Rocco Ritchie in Los Angeles ter wèreld. De voader is regisseur Guy Ritchie.

In december van dazelfste joar trouwde ze met regisseur Guy Ritchie. Ritchie makte vo de remix van de single What it feels like for a girl e controversiële videoclip woarin da Madonna met e bomma styfrap over de stroate rydt en uutendelik tegen e boom vlamt. Ook maakn ze tegoare vo BMW de commercial Star woarin da ze e verwende, ambetante ster speelt (e parodie op eurzelvn).

Were tourn[bewerkn | brontekst bewerken]

In 2001 besloot Madonna voe 't est in acht joar were te gon touren. Eur Drowned World Tour startte ip 9 juni in Barcelona. Ze speelde vele nummers van de populaire albums Ray of Light en Music. Weeral dee ze met die tournee Olland en België nie an. Wel speelde ze voe de eeste ki zelve gitaar en verboasde ze eur fans me sommige ruige passages.

An 't ende van 2001 brachtt Madonna eur twèède verzamel-cd uit, getiteld GHV2 (Greatest Hits Volume 2). In tegenstellieng toe eur eeste verzameloar The Immaculate Collection, bevat GHV2 gin nieuwe nummers.

In 2003 briengt Madonna et album American Life ut. Ze besloot de video voe de eeste single American Life op 't latste moment terug te trekkn. In de video zyn oorlogsbeelden te zien en de clip bevat openlik kritiek ip president Bush. Omda ip da moment een oorlog in Irak uitbrikt, viendt Madonna de clip oungepast. Andere singels van da album zyn Hollywood, Nothing Fails en Love Profusion (dat ook wier gebruukt als oundersteunende muziek en video voen e parfum van Estee Lauder). Ook stoat ier et nummer Die Another Day op, de titelsong van de James Bond-film, woarin Madonna e kleene rol et. De film en singel stammn uut 2002. Oewel et album American Life binnkomt op nummer 1 in de Amerikaanse albumlysten, volt de verkoop uutendelik tegen.

Wederom controversje[bewerkn | brontekst bewerken]

Beist de MTV Awards in september 2003 veroorzaakn Madonna, Christina Aguilera en Britney Spears wereldwyde opschuddienk deur mekoar e toungzoen te geevn beist de vertolkieng van e medley van Like A Virgin en Hollywood. Under "soamnwerkieng" schynt goed te bevolln, want voe Britney's album In The Zone neemn Madonna en eur e duet op da ook up single verschynt: Me Against The Music.

Re-Invention Tour[bewerkn | brontekst bewerken]

In 2004 voundt de Re-Invention Tour platse. Beist die tournee treedde Madonna voornamelik ip in Amerika. In Europa treedde ze ip in Olland, Ierland, Lissabon, Londn en Parys, mo weeral nie in België. Beide concerts in Olland woarn direct uutverkocht. Den orlog in Irak, vrede, den elektrieke stoel, e skateboarder, e doedelzakspeler, John Lennons Imagine, Madonna die over et publiek heenkomt, etc. woarn allemole elementn uut die wereldtournee. In tegenstellieng toet eur vorige show - de Drowned World Tour - zoeng ze beist de Re-Invention Tour vele hits. Van elk album dat ze aat uutgebrocht, zoeng ze minimum êen nummer. Voe et eest siends The Who's That Girl-tour uut 1987 giengt achtergroundzangeresse Nikki Harris nie mee. Ze was juste bevollen van e kiend en wou bovendien e bitje meer aandacht aan eur eigen carrière besteedn. Voe vervangster werdt Siedah Garrett gevraagd, e zangeresse die surtout bekend was van eur duet in 1987 met Michael Jackson, I just can't stop loving you. Zy verzorgde ook al achtergroundvocalsn ip Madonna's derde album True Blue uut 1986.

Et concert begost met e videovertonieng van The beast within (e remix van et nummer Justify my love uut 1990) woarip da Madonna verzn uut de Openboaring voornleest, begeleid deur beeldn uut X-static Process, e video- en foto-impressie, geschootn door topfotograaf Steven Klein voe ze tentoonstellieng.

Dat de ton 46-joarige Madonna nog wel een aantal jaren gieng meegoan, bleekt wel as ze achter et openen van de videoscherms uut het podium opkomt: Strike a pose; een andestand kost eur winnig moeite als ze inzet met eur nummer Vogue.

Live 8[bewerkn | brontekst bewerken]

Ip zoaterdag 2 juli 2005 treedde Madonna ip in et Londnsche Hyde Park vo et grotste popconcert aller tyden, Live 8, voe e 200.000-koppig publiek en nog eki 3 miljard tv/internet/gsm-kijkers. Ze zoengt eur hits Like a Prayer, Ray of Light en een extended-version van Music. Achter 't concert makt ze bekend dat eur nieuwe album Confessions on a Dance Floor got noemen.

't Album bleekt e terugkeer te zyn nor eur muzikale roots: dance. De schyve wierdt in november 2005 uutgebrocht en bevatte de hit Hung Up, e catchy en dansboar nummer roundom e sample van et ABBA-nummer Gimme, Gimme, Gimme. Da succes wierdt vorsgezet met et uutbriengn van de singles Sorry, Get Together en Jump.

Ip diesendag 16 augustus 2005, eur 47ste verjordag, brikt Madonna e sleutelbèèn, een and en drie rebbn by e vol van eur peerd op eur landgoed in Wiltshire (Iengeland). E moand later gieng ze weer aan 't werk. Me vele pijnstillers nimt ze de videoclip voe Hung Up op.

Plagioat[bewerkn | brontekst bewerken]

Ip vrydag 18 november 2005 wierdt Madonna veroordeeld voe plagioat. De eeste vier moaten van eur nummer Frozen (1998) komen overèèn met et nummer Ma vie fout le camp (1993) van de Belgischen componist Salvatore Acquaviva uut Moeskroen. Et gevolg van de veroordelieng is da in België cd's en dvd's waarop Frozen te oorn is uit de schappn moen wordn ghoald en 't nummer ier nie mi mag worden gedroaid op radio en televisje.

Begun 2006 zette Madonna twèè nieuwe wereldrecords op eur name. Ze was de eeste artiest die met een album, Confessions on a Dance Floor, in 40 landen de nummer èèn positie bereikte. Hung Up deed etzelfste in de single charts in mo liefst 41 verschillende landen.

In meie 2006 begost Madonna aan e nieuwe wèreldtournee, de Confessions Tour. De tour startte ip 21 mei in Los Angeles. De show wierdt gepreezn deur critici. Et iptreden wierdt controversieel genoemd: azo berydt Madonna eur dansers lik peerden en angt ze aan e kruus. Achter verschillige stops in de VS en Canada, kwaam ze end juli ook nor Europa. Ook Olland is angedoan gewist. Verder speelde ze in Iengeland, Wales, Duutsland, Italië, Denemarkn, Vrankryk, Tsjechië en Rusland. Achter Europa stoegn olf september de latste vier concerts gepland, in Japan.

Madonna zorgde in 2006 ook voe veel commotie deur het Malawische joungetje David van 13 moanden oud te adopteern. Madonna kreeg et joungetje in 't vizier, ton da ze Malawi bezocht in 't koader van e project woa da ze an meewerkte. De zangeresse doneerde vele geld voe twee weesuuzn te bouwn voe weeskienders van ouders die gestorvn zyn aan AIDS. David was ook zo'n weeskiend, die twee weken achter ze geborte in e weesuus belandde. Ze moeder was aan AIDS overleden, ze voader leefde nog wel. David was by z'n eeste ountmoeting met Madonna wreed ziek. Ne leed aan malaria en scheurbuuk. David ze voader aat in tusschentyd ze goedkeurieng aan den adoptie gegeevn. Toch was ni iedereen content met de adoptie. Madonna zou de adoptiereegls an eur voetn gevaagd en. De zangeresse et in e oopnhartig interview met Oprah Winfrey gezeid dat da nie azo is en dat den adoptie van David volkoomn legaal is.

Weetjes[bewerkn | brontekst bewerken]

  • Broere Christopher Ciccone is e binnenuusarchitect voe bekende sterrn.
  • Madonna et ooit gezeid dat ze beroemder wilde wordn dan God.
  • Madonna is verre familie van Céline Dion.
  • Maverick Records (het platenlabel van Madonna toe ze et in 2004 verkocht aan Warner Music) verzorgde successen van sterren gelik Alanis Morissette, Deftones, Me'shell Ndegeocello en Michelle Branch.
  • Ze kreeg de rolle van Meryl Streep aangeboden in Music of the Heart, Michelle Pfeiffers rol in The Fabulous Baker Boys en Sharon Stones rol in Casino mo sloeg ze allemolle af; alle genoemde films wierden genomineerd voor een Oscar voor die rolln.
  • Madonna et een IQ van 140.
  • Haar voder, Silvio (of Tony) Ciccone, et e wienzake, Ciccone Vineyard & Winery (Externe koppelienge)) in Suttons Bay, Michigan, eur geboortestaat.
  • Tiedens de hitshow Celebrity Deathmatch van MTV "vocht" Madonna tegen (en versloeg) Michael Jackson in e "konienklik gevecht" als de "King and Queen of Pop".
  • Madonna et vuuf kienderboeken geschreevn: De Engelse rozen, De appels van Mr. Peabody, De avonturen van Abdi, Jacob en de Zeven Dieven en Lotsa de Casha.
  • Madonna et kledieng voor meisjes ountworpen, getiteld English Roses, no de titel van eur èèste kienderboek. Eur dochter Lourdes draagt hier ook kledieng van.
  • Madonna et verschillende bynamen: Nonnie (toen ze nog e kiendje was), Maddy, Mo, Boy Toy, Mads, Madge, Material Girl, Veronica Electronica, M, Varla, Dita, Queen Of Pop, Mother of Re-invention, Queen of Dance en Queen of Shock.
  • In eur kienderjoaren was Marilyn Monroe eur grote voorbeeld.
  • Madonna's nummer "Ray of Light" van et gelyknamige Album is deur Microsoft gebruukt tijdens under Windows XP reclamecampagne.

Externe koppelienge[bewerkn | brontekst bewerken]

Wikimedia Commons