Meter (grôotmoedre)
Een meter of metje is de moeder van je moeder of de moeder va je voader. Z'is de vrouwe van je grôotvoader. Meter is ôok dikkers de dôopmeter van d'oudste klêenkiendjes. Kykt ôok noa Meter vô andere betêkenissen.
Omdat e kiend mêestol twêe grôotmoeders et, gebruukt et soms een andere noame om ze uut makoar t'oudn. Da ku zyn met een ander wôord (simpelweg 'meter' versus 'metje'). Of met een andudienge va woa da ze wunt (byvôorbeeld 'meter Yper' versus 'meter Brugge'). Soms wordt de vôornoame gebruukt vô 't verschil te moakn, vb mémé Mariette.
Omda dôopmeter en grômoedre dikwils dezelfde zyn lôopt de ansprekienge ôok dikwils deur mekoar. Oat 't oudste kind marraine zegt tegen zyn grômoedre omdat 't ôok zyn dôopmetre es, ton goan d'andre kindrs da tiene-neegne ôok zeggn.
De meter ansprekienge kan styf vele verschillen van streke tut streke. Ier en lystje wa dat er ol gebreukt es en in wulke streke:
- meter en metje: courant in Westoek
- meetr, mémé en meetje: de vôorkeure vô ZO WVL
- marraine: in Kortryk een maniere om te tôogn da je van de beetre bougeoisie zyt; courant in de Fransche grensstreke en Blanknberge
- mammie: Fransken invloed, uutzounderlik in Kortryk, mêer gebruukt vô ipvang-, pleeg- en stiefmoeders
- bomma, bobonne, moemoe: in Blanknberge
- oma: d'Ollanse versie vô degêenen die wa modernistisch willn doen
- grôotje: idem dito, vô in de boekskes en de sprookskes
Verdere anvulliengen van de West-Vlamsche lezers zyn welgekommn ier of ip 't discuusje blad.