Na-Cho Nyak Dun

Van Wikipedia
Ga naar: Begunplekkn, zoeken

De First Nation of Na-Cho Nyak Dun of geweune de Na-Cho Nyak Dun zyn e stamme van indioann of First Nations in Canada die nunder land hen in de streke round Mayo, Yukon.

Noame[bewerkn | brontekst bewerken]

De noame Na-cho Nyak Dun wult zeggen menschn van de grôte riviere. Met de grôte riviere (Na-cho Nyak) wulln ze Stewart River zeggn, die by Mayo passirt.


Toale[bewerkn | brontekst bewerken]

Verspreidienge van de toaln uut de Na-Denefamilie

Olhoewel dan de mêeste nu Iengels koutn, zyn der nog surtout oudere menschn die d'oude toale Northern Tutchone uut de toalfamilie Na-Dene kunn. Aar stammn die e toale uut die familie klappn, zyn de stammn van Selkirk, Pelly Crossing en Little Salmon, Carmacks. Jerry Alfred, die ebôorn is in Mayo, mo van de Selkirk First Nation is, tracht van de toale te reddn, oundermêer deur muziek te moakn in de traditionale toale.

Geschiedenisse[bewerkn | brontekst bewerken]

Olhoewel dat de streke van Mayo en de Stewart ossan de kerne van nunder leefgebied ewist het, haddn ze e land van mêer of 160 000 km² (mêer of 4 keirs de grotte van België), woavan 30 000 in wuk die nu North West Territories is. De Na-Cho Nyak Dun hen ossan eleefd van wuk dat er up nunder land te viendn wos: vis, veugels en zoogdiern lik rendiern en elandn, mor oek olle sôortn plantn. Doavôorn han ze e grôot stik land nôdig, ze moestn hêel 't joar deure verhuuzn voun enoeg teetn te viendn.

Buutn zevve joagn, hen ze oek ossan commerce edoen met aar indioann, lik de Tlingit van de kust en loater oek met de êeste kolonistn. Lik olle indioann van Canada, muchtn de Na-Cho Nyak Dun e plekke kiezn voun en eign dorp te begunn. 't Wos Julius Kendi, e dominee die zevve en indioan wos, die vôornstelde voun dadde by Mayo (die der ekommn wos deur de zilvermynn in 't geburte) te doen, mo noader van de Stewart, e kilomeiter of 2. Nu noemn ze die plekke the Old Village.

Ze woarn d'êeste stamme die de Yukon Land Claims têeknde, e overêenkomste tusschn de regerienge van Canada en de First Nations, woarin dan der compensoasjn vaste eleid woarn voun 't land dan ze verlôorn beisn de Klondike Gold Rush van 't begun van de joarn 1900. D'êeste ounderhandeliengn begustn in 1973, mo 't wo mor in 1993 dan de Na-Cho Nyak Dun t'akkôord gienkn, achter da 't zelfbesteur en 't houdn van de First Nations in de Land Claims ezet woarn, van de Selkirk en de Little Salmon First Nations deurde 't nog 3 joar langer.

Nu zyn der nog e stik of 600 Na-Cho Nyak Dun First Nation, die zelve wettn moakn voun nunder eign. Z'hen e stik land van 4700 km² ekreegn en 14 meljoen dollars voun de missn van 't verleedn goed te moakn.

Externe koppelienge[bewerkn | brontekst bewerken]