Bloewost

Bloewost of bloelienk is een worst die normoalgezien bestoat uut een miengsel van bloed (mêestol van een zwyn, olhoewel dat er ook bloewost van koeiebloed bestoat)mè vet of smout, spek, kruudn en vulmiddels (rogge, brôod, gerst en/of hoavermout). 't Is een byprodukt van 't slachtn van bêestn.

België

In België is een bloewost omtrent de zelste grôotte gelik een bananne. De wost wor vantydn up zyn hêeln gebakkn, of in den helt deuregesneen, of in stikstjies van omtrent 2 cm dikte gesneen. 't Kan ook oungebakkn g'geetn wordn.

In de Kempn wodt een bloewost beulingen genoemd, binst dan z' in 't Hageland en Klêen Brabant van zwarte pensen klappn wordt, en round Oalst zeggn ze zwarte triepen.

Nederland

Receptn verschilln van streke to streke: vantydn wordt er ajuun bygestookn of klêne blokstjies spek. Ook de vorm verschil nogol, van een geweune wost in een derm toet een "wost" die in een gietvorm gemakt wordt. In Holland wor bloewost mêestol in schyvn van een grôte wost (diameter van nie mêer dan 10 cm) gesneen.

Andere landn

Ook in andere landn wordt er by 't slachtn bloewost gemakt van bloed t' hope mè goekope stikkn vlêes. In Spanje hèn ze butifarra negra en morcilla, in Vrankryk boudin noir, in Iengeland black pudding, in Duutsland Blutwurst, en in Itoalië sanguinaccio insaccato.

Ofbeeldiengn die ier by passn ku je vien in de categorie Black pudding van Wikimedia Commons.