Koriander

Van Wikipedia
(deureverweezn van Coriandrum sativum)

Koriander of Coriander (Coriandrum sativum) is e plante uut de familie van de schermblommigen (Apiaceae). 't Is d'ênigste sôorte in 't geslacht Coriandrum.

Koriander is ofkomstig uut Zuud-Europa en 't Middn-Ôostn.

Kenmerken[bewerkn | brontekst bewerken]

De korianderplante wordt 30–60 cm hoge en is nie zindelik over de kwaliteit van de bodem. Uut de witte blommetjes ountstoan kogelvormige, rounde, bruungilwe geribbelde vruchtn met e diameter van 1,5–3 mm. De zoadn wordn gedroogd en gemoaln.

Verwante sôortn[bewerkn | brontekst bewerken]

Koriander trekt ip perselle, zowel de bloarn of de blommetjes. Ze wordn alletwêe ip de zelfste maniere verwerkt, want de bloarn kunnen nie teegn warmte en droogte.

Geschiedenisse[bewerkn | brontekst bewerken]

Koriander is één van d'oudste kruudn. 't Stoat al in de Bybel vermeld lik één van de kruudn die gebruukt wierdn mè Poaschn. De zoadn zyn ook weregevoundn by ipgroaviengn van neolithische overbluufsels. En by ounderzoek van de piramides is uutgekommen dat er in 't oude Egypte koriander meegepakt wierd noa den hemel.

Geneeskunde[bewerkn | brontekst bewerken]

Koriander bevat etherische olie. 't Helpt by stôornissn in 't moag-dermkanoal en 't kalmeert de zenuwn.

Toepassienge[bewerkn | brontekst bewerken]

Koriander wordt soms in brôod, speculoasje en zoetekoeke verwerkt. 't Wordt surtout gebruukt in gerechtn uut de Thaise, Indische, Mexicoansche en Brazilioansche keukn. De zoadn zyn een ingrediënt van likeur en absinth en in de Middelêeuwn wierdn ze gebruukt by 't brouwn van bier.

Korianderbladjes en de wortels wordn ves gebruukt. Gedroogd verliezn z'hunder aroma.

Wikimedia Commons