Deutsches Eck
Deutsches Eck, (Duutschn hoek in 't Vlams), is e kunstmoatig angeleide landtoenge in Koblenz an de moendienge van de riviere de Moezel in de Reyn.
In 1897 èn ze der e nationaal monument ip gezet vo de Duutsche êenwordienge in 1871 t' herdenkn, e ruuterstandbeeld van keizer Wilhelm I ip een hoge sokkel.
In de Twêede Weireldoorloge is 't standbeeld deur artillerievier verwoest. Achter den oorloge wildn de g'allieerdn ook de sokkel ofbreekn, moa deur geldgebrek is da nie gebeurd en de sokkel blêef stoan. In 1953 wierd 't monument vôorzien van de woapnschildn van al de dêelstoatn van Duutsland inclusief de vroegere gebiedn van van 't Duuts Ryk in 't ôostn en 't wierd ingewyd ols monument vo de Duutsche êenheid. Boovn ip de sokkel stoend e vlaggemast met de vlagge van Duutsland.
In 1987 oentstoend er e burgerinitiatief vo 't ruuterstandbeeld te reconstrueern en were te zettn, moa da lag politiek moeilyk in 't ton nog gesplitste Duutsland. Achter de herênigienge van 't land verloor 't monument zyn politieke loadienge en in 1993 wierd er e nieuw ruuterstandbeeld gezet.
Deutsches Eck is nu uutgegroeid toet 't symbool van de stad Koblenz. De locoasje wordt ook gebruukt vo grôote evenementn.
|
Ofbeeldiengn die ier by passn ku je vien in de categorie Deutsches Eck van Wikimedia Commons. |