Opossums

Van Wikipedia
(deureverweezn van Didelphidae)

Opossums of budelrattn (Didelphidae) vormn e familie van budelbêestn, d' ênigste overgebleevn familie van d' orde Didelphimorphia. Van de drie groepn budelbêestn ip 't Amerikoans continent hèn d' opossums de mêeste sôortn, bykans 100 sôortn in 19 geslachtn. Z' hèn ook 't grotste verspreidiengsgebied: van Canada toet Patagonië, 't zudelik ende van Zuud-Amerika.

Opossums woarn d' êeste budelbêestn woarmee dan Europeoann in anroakienge kwoamn en êen van d' êeste bêestn uut de Nieuwe Weireld die were meegepakt wierdn noar Europa. 't Was John Smith, de stichter van Jamestown (Virginia), die vo den êeste kèe 'n opossum in 't Iengels beschreevn hèt en de noame "opossum" gebruukte, e verbasterienge van 't Algonkisch apasum, wat da "witte bêeste" wil zeggn.

Opossums zyn klêene toet middelgrôte zoogbêestn. De klèinste sôorte is de Chacodelphys formosa, met e lengte van oengeveer 6,8 cm. De grotste sôorte is de Didelphis virginiana, die toet 55 cm lank en 5,5 kg zwoar kan kommn. De steirt van de budelrattn is over 't algemêen langer of 't lyf.

Opossums hèn e lange, spitse snute mè lange tasthoarn. Hunder zicht is over 't algemêen goed oentwikkeld. De mêeste sôortn hèn bolle peireloogn, wat dat er ip wyst dan ze by nacht leevn. Z' hôorn styf goed en hunder ôorn zyn constant in bewegienge.

De kleur van hunder vacht varieert van grysde toet bruun of zelfs goudkleurig. Sommigte sôortn hèn e mascher in hunder oanzichte of striepn. De roende steirt is over 't algemêen kletse of mè winnig hoar. Vele sôortn hèn e grypsteirt. Nie al de sôortn budelrattn oentwikkeln e budel, oendanks hunder noame.

Taxonomie[bewerkn | brontekst bewerken]

De familie omvat oengeveer 97 sôortn in 19 geslachtn. De geslachtn zyn:

  • Caluromys
  • Caluromysiops
  • Chacodelphys
  • Chironectes
  • Cryptonanus
  • Didelphis
  • Glironia
  • Gracilinanus
  • Hyladelphys
  • Lestodelphys
  • Lutreolina
  • Marmosa
  • Marmosops
  • Metachirus
  • Micoureus
  • Monodelphis
  • Philander
  • Thylamys
  • Tlacuatzin
Wikimedia Commons