Hendrik IV (HRR)

Hendrik IV (Goslar, 11 november 1050 - Luuk, 7 ogustus 1106) was Rôomsche keunienk van 1053 tout 1087, keunienk van Arles van 1056 tout 1105, keunienk van Italië van 1080 tout 1093 en keizer van 't Hillig Rôoms Ryk van 1084 tout an zyn gedwoungn trôonsofstand in 1105. Je was de derde keizer van 't Salisch Huus.

Hendrik IV was den oudste zeune van keizer Hendrik III en Agnes van Poitou. End 1053, an zyn drie joar, wierd ie ols Hendrik VIII benoemd tout hertog van Beiern. Os zyn voader in 1056 stierf, kwam zyn moeder zyn regente. In 1065 kwamt ie mêerderjoarig volgns de wettn van dien tyd en kost ie zelfstandig regeern.

Binst zyn regerienge krêeg Hendrik IV te moakn met de investiteurestryd met et pausdom en verschillige burgeroorloogn vo zyn trône in Italië en Duutsland. Je veroverde Rome in 1084, je verdrêef paus Gregorius, en je liet e nieuwn paus benoemn (teegnpaus Clemens III). Clemens krôonde Hendrik ip 31 moarte 1084 tout keizer.

Zyn zeune Konrad, die van 1087 Rôoms-Duutsche keunienk was, rebelleerde teegn hem en binst e byêenkomste in Mainz, in april of meie 1098, liet Hendrik hem ofzettn. Zyn joungere broere Hendrik V wierd in zyn plekke verkoozn tout keunienk.

In 1105 kwam Hendrik V ook in ipstand teegn zyn voader. Hendrik IV most ofstand doen en je wierd gevangn gezet. Je kost ountsnappn noa Luuk, woa dat ie in 1106 gestorvn is. J'is begroavn in den dom van Speyer.

Vrouwn en jounges

Hendrik IV trouwde in 1066 me Bertha van Savoye (†1087). Under jounges:

• Adelheid (1070-1079)
• Hendrik (1 ogustus 1071-2 ogustus 1071)
• Agnes van Waiblingen (1072-1143), getrouwd met hertog Frederik I van Zwaabn († 1105), en in 1106 me markgroaf Leopold III van Ôostnryk (1073-1136)
• Konrad (1074-1101), hertog van Neder-Lotharingen, (1076-1087), Rôoms-Duutsche keunienk (1087-1098) en keunienk van Italië (1093–1098)
• Hendrik V (1086-1125), Rôoms-Duutsche keunienk (1099-1125) en keizer van ‘t Hillig Rôoms Ryk (1111-1125)

Je trouwde in 1089 met Eupraxia van Kiev.

Ofbeeldiengn die ier by passn ku je vien in de categorie Henry IV, Holy Roman Emperor van Wikimedia Commons.