Koter

Dit artikel es geschreevn in 't Ypers, en da zou best ozô bluuvn.

---

Koter
E koter me kieksjes
Taxonomische indêlienge
Domein: Eukaryootn Ryk: Animalia (Bêestn) Stamme: Chordata (Chordabêestn) Klasse: Aves (Veugels) Orde: Gruiformes (Kroanveugelachtign) Familie: Rallidae (Ralln) Geslacht: Fulica
Sôorte
Fulica atra Linnaeus, 1758

Fulica atra

E koter (Fulica atra, Nederlands: meerkoet) is e sôorte woaterveugel uut de familie van de ralln.

Uutzicht

Koters zyn hêlegans zwort, buutn nunder bek en nunder vôoroofd, die snêeuwwit zyn en ezô indeliks ofsteekn teegn de reste van nunder lyf. Ze kommn tout 38 cantimeiter lank en nunder pôotn zyn groene me tintjes die roundachtig zyn en woamei dan ze goed over ’t woater kunn loopn voun an te zettn an ze wulln vliegn (dan ze nie ol te vele doen).

Leefgebied

Ze kommn vôorn in woater die stille stoat of die nie ol te zêre stroomt, verre overol in Europa en grôte dêeln van Azië, Australië en Nôord-Afrika. In West-Vloandern kuj ze viendn up de mêeste grôte vyvers.

Leevnswyze

E joungsje van e koter

Koters moakn nestn van taksjes, riet en aar plantn an de bôord van vyvers en pittn of up stikkn out die uut ’t woater zitten. Up die nestn leggn ze toet 10 eiers, dan d’ouders tope uutbroedn in e dag of 25. De joungn kunn ol vliegn achter e weke of 8. Mêestol bluuvn nie olle joungn leevn omdan ze upefret zyn deur snoeks of dôodepekt zyn deur nunder eign ouders. Ze doen dadde an ze ounder druk stoan, bevôorbeeld a ’t er gin teetn enoeg is en de joungn tevele ankern. Ze zien der nog hêel aars uut dan nunder ouders. Ze zyn miender zwort en z’en ouk nog gin wittn bek en nundern kop is rôod.

’t Zyn agressieve en territorioale veugels die e bitje vanolles eetn, zowel plantn of bêestn. An ze duukn achter woaterplantn, spriengn z’êest no boovn. Z’eetn dus plantn, zoad, slekkn, wormes en fernient. Ze kunn 10 joar oud kommn.

Ofbeeldiengn die ier by passn ku je vien in de categorie Fulica atra van Wikimedia Commons.