Maria van Champagne

Maria van Champagne (1174 - Akko, 9 ogustus 1204) was e dochter van Hendrik I van Champagne en van Marie van Vrankryk, dochter van Lodewyk VII. Deur heur trouw mè Boudewyn IX van Vloandern in 1186, was ze gravinne van Vloandern en Henegouwn.

In 1199 hen ze tegoare de kruusvoardersgelofte ofgeleid in de Sint-Donoaskerke van Brugge, en de 14stn april 1202 is Boudewyn vertrokkn vo de vierde kruustocht.

Maria, die in verwachtienge was, is mor achter gegoan o ze genoeg hersteld was van de geboorte van under dochter Margaretha. Ze vertrok uut Marseille en landde in Akko (Israël), woa da z’hoorde van de veroverienge van Constantinopel en de benoemienge van heur vint toet keizer. Ze wilde vertrekkn no Constantinopel, mo z’is ziek gekommn en de 9stn ogustus 1204 is ze gestorvn.

Maria en Boudewyn IX haan twê dochters:

• Johanna (1199-1200 † 1244), gravinne van Vloandern en Henegouwn, getrouwd mè:
  1. in 1212 Ferrand van Portugal
  2. in 1237 Thomas II van Savoye
• Margaretha II (1202 † 1280), gravinne van Vloandern en Henegouwn, getrouwd mè:
  1. in 1212 (geschid in 1221) Bouchard van Avesnes
  2. in 1223 Willem II van Dampierre