Pimpelmêze

Dat artikel es geschreevn in 't Westhoeks.

---

Pimpelmêze
E pimpelmêze
Taxonomische indêlienge
Ryk: Animalia (Bêestn) Stamme: Chordata (Chordata) Klasse: Aves (Veugels) Orde: Passeriformes (Zangveugels) Familie: Paridae (Echte mêezn) Geslacht: Cyanistes
Sôorte
Cyanistes caeruleus Linnaeus, 1758

Cyanistes caeruleus caeruleus

Pimpelmêezn (Cyanistes caeruleus, vroeger Parus caeruleus) zyn klêne zangveugeltjes, die trekkn up koolmêezn, mo wel e bitje klinder zyn. In de wienter kuj ze vele zien aj teetn legt of hangt (surtout oapenotjes, mor oek vetbolln).

Uutzicht

Pimpelmêzetjes kommn mor e grôte 10 cantmeiter.

Ze zyn schône ekleurd, me nunder gilf buuksje en nundern rik en nunder vlerkn die blauw en groene zyn. Nunder koptje is wit met e bitje zwort (oundermêer e strieptje over nunder oogn). De boovnkant van nundern kop is blauw.

Verspreidieng en leefgebied

Pimpelmêezn kommn vôorn in bykan hêel Europa toet in 't zuudn va Scandinoavië en in 't westn van Azië. De mêeste trekkn in de wienter nie no 't zuudn. Eigentlik zyn 't busveugels, mor oundertusschn kommn ze e bitje overol vôorn, in de wienter oek vele in hovetjes woa dat er teetn uphangn is. 't Zyn echte akroboatn, die stief goed an gevulde zaksjes kunn hangn.

Leevnswyze

Teetn

Z'eetn juste lik koolmêezn en de mêeste aar mêezn olle sôortn zoadn (mor oek oapenotjes) en vele sôortn fernient, zeker an ze joungn henn.

In Iengeland zyn der die mekflosschn oopn doen (van die oude modelln die up de zulle stoan) voun 't vet die der vanboovn updryft.

Vôortplantienge

Ze moakn nunder nest in olle sôortn gatjes en ze leggn oek gemakkelik eiers in nestkassn (met e gatje die te klêne is voe koolmêezn). Ze moakn e zocht nestje va mos, hoar, wulle en pluumtjes. Ze leggn oungeveer 8 eiers, mo 't kun der oek mêer zyn. Oltemets leggn der mêer of 1 wuvetje in 't zeste nest.

Ofbeeldiengn die ier by passn ku je vien in de categorie Cyanistes caeruleus van Wikimedia Commons.